Eebru 2

Difiikpaandi dilal díǹ bulifi dee!

1 An puee, an máaǹ yii tí ŋúb́ ibaamɔn bɔti tin ti gbìl̄ee tiŋan án nín làá ŋá pu tí taa wāŋkèe. 2 Kun puee Unimbɔti nín nìn yāntì ituun sòon̄ tibɔti tiŋyee^a, bi ká ti-baamɔŋyi. Di sá yii bin nìn yīntì kaa tɔ́ ituunee nín lī puee nìn ká ditafadaaldi din máaǹ-bee. 3 Ti mun yaa yíì kaa fōō difiil dikpaandi din bí neeyee, mana ní ti làá ŋá kí ŋmátí kí nyā ditafadaaldin? Ti-Dindaan Yeesu di péé ki sòon̄ difiil gbanti bɔti ní bin gbìl̄-tèe tùkū-ti tì nín sá ibaamɔn miŋyee. 4 Ní Unimbɔti ŋáaǹ tidaandi nì maamaacib^b ki dū u-pɔŋŋu ki túń atuun kupaau kí dàkà yii tin bi sòon̄ee sá mbaamɔn, ní ki yākatì u-Fam pɔŋŋu min fáatì-uee ki tīī binib.

Kriisitoo di fìil̄

5 Di sá duulinya un bí ki dòoń ti bí ki sòoǹ u-pu nee, an kaa sá ituun di làá dāá nīn kpòotī-u. 6 Ubɔ lī Unimbɔti gbɔŋku poon laaba yii:

«Unil sá ba ní a téetí u-pu ní?

Nisaal bí tilatin ní a kpèé-u ní?

7 A sīntiǹ-u taapu ŋyunti ŋubɔ fiii

ituun ń jītíǹ-u.

Ama kɔŋkɔnnee a tīī-u tinyool

nì kupampakau poon,

8 ní ki tīī-u mpɔn tiwan kɔkɔwoooo pu^c.»

Unimbɔti nín tīī-u mpɔn tikɔkɔ puee dàkā yii tiba kaa kíǹ kaa bí u-taapu. Nì míǹ kɔkɔee, taa láá wāĺ tiwan kɔkɔ nín bí u-taapu kɔŋkɔnnee puee. 9 Ama tin ti dáań ki kée di sá yii Yeesu un ní Unimbɔti sīntiǹ taapu ituun jítiǹ-u ŋyunti ŋubɔ poon fiiiyee, kɔŋkɔnnee ti wāĺ-u tinyool nì kupampakau poon ní. Ŋkúm min u jíń falaa ki kpíìyee pu ní Unimbɔti yōoǹ-u yilpu míǹ. Unimbɔti ŋanti pu ní Yeesu kpíì an kúm binib kɔkɔ pu. 10 Unimbɔti di náań tikɔkɔ nì tikɔkɔ ní u-pu ní tikɔkɔ bí. U là inibool tikpil ń kpántí u-biyaamu kí kɔ́ u-nyootin. Di sá yii Yeesu di fìil̄-bi, míǹ puee an kítì yii Unimbɔti ń dī u-falaabi bin u jíńee pu kí yàntī ú kpántí mmɔm.

11 Un kpántí binib circiree nì bin kpántì circiree kɔkɔ Baa sá ubaanti ní, an pu ní an kaa cáá Yeesu icoo ú yíiń-bi u-naalib. 12 U lī yii:

«Unimbɔti, m làá sòoǹ nì m-naalib

a nín sá uŋyee,

kí gāā ilan kí pàkà-si

kunipaau kansikin^d.»

13 Ní ki gíti lī yii:

«Sii pu ní m làá nīn pée máká.»

Ní ki gíti kūbitì ki lī yii:

«Kpèè, man nì mbiyaamu mun Unimbɔti tīī-mee sèé^e.»

14 Mbiyaamu gbantee nín sá binib tiwun nì fatiku puee ní Yeesu gíiǹ u-ba tiwun nì fatiku kii bíǹ nín bí puee. U ŋá míǹ kí ŋmā kí kpú, u-kúmee ń nàan̄ Sitaan un ŋúb́ ŋkúm pɔŋŋuee, 15 kí nyāntí bi nín pée màl̄ bin bi bí kuyuŋu poon kun puee bi fàŋkí ŋkúmee. 16 Di sá yii an kaa sá ituun ní u dɔ́miń ki tútúǹ, ama an sá Abraam biyaamu ní u dɔ́miń ki tútúǹ^f. 17 An pu ní an sá yii ú dū u-ba kí nántíǹ u-naalib tikɔkɔ poon kí ŋmā kí nīn sá bi-saraaŋakpiliu ki cáá disaasɔl ki tūǹ u-tundi deedee Unimbɔti nimbiin, án nín làá ŋá pu bí ká bi-kpitii pɔ̄tamee^g. 18 U nín jíń falaa icɔŋki poon ki kée di yì-tì ní u ŋūǹ kí jòò bin bí icɔŋkinee.