Atuun 26

Pɔɔl sòon̄ ki mɔ́tì u-ba pu Agriipa nimbiin

1 Niinee ní Agriipa bí Pɔɔl yii: «A ŋūǹ kí nīn sòoǹ tin a cááyee.» Ní Pɔɔl yōoǹ u-ŋal ki jáam̀ samaa, ní ki yōoǹní tin u cááyee ki lī yii: 2 «Ubɔti Agriipa, an mɔ̄ǹ-mi díǹ wiiŋŋu tikpil ḿ yūĺ a-nimbiin kí sòoǹ kí nyāntí m-ba tibɔti tin kɔkɔ Juuda yab cáa tūntí m-puee ni. 3 Di sá yii a nyí Juuda yab bimbim nì bi-nikpɔŋkpɔkɔku kɔkɔ pu. Míǹ puee m gbāam̀-si á jī kimɔtii kí pīlifiǹ-mi.»

4 «Juuda yab kɔkɔ nyí doooo m-naacimpɔntin m nín nìn bí miŋyee. Di sá yii doooo ŋkilkaamee, m nìn bí Jeerusaleem ní, m-yab kansikin. 5 Bíǹ bi-ba nyí-mi dooooyee. Bi yaa là gba, bi ŋūǹ kí lì yii m nìn sá Fariisa yab bin ŋúb́ marab tiŋanee kansikin ubɔ^a. 6 Kun di yāntì bi bíi sòoǹ m-bɔti kɔŋkɔnnee di sá m nín máká Unimbɔti nín nìn pōoǹ ti-naanjab puee. 7 Ti-samaau tinaakɔti saalaa nì tilee máká yii bi làá dāá ká an poondi. An pu ní bi pɔ̄ɔntí ki nóó Unimbɔti ŋwiimpu nì kunyeeu. Too, ubɔti, m nín máká tin pu Juuda yab ŋúb́-mee dee. 8 Míǹ puee, ba pu ní nimbi nyí yii Unimbɔti kaa làá dāá fìkitī bitaŋkpiibi ní? 9 Man m-ba nìn dākafì yii an máaǹ ḿ dū iciin kɔkɔ kí já nì Yeesu Naasaareeti yɔu yindi. 10 Min min m nìn ŋáań Jeerusaleemee dee. Bisaraaŋakpilib nìn tīī-mi mpɔn m cútí bin fōō Yeesu ki kííyee tikpil ki tòó sarkan, ní ŋyunti ŋun bi yaa là kí kpɔ̀-bee, man di nìn lì yii bi lafun máaǹ ŋkúm. 11 Ŋyunti sá kamaayee, m nìn dátí bi-tafal akpafidiinni, ki bàà là bí yíí Yeesu. M nìn fōō diŋuul bi-pu an tin lákatì, áli ki nìn cá ntimu mubɔn ki tin páb̀-bi.»

Pɔɔl máafì u nín kpántì u-ba puee

(Kpèè Atuun 9.1-19, 22.6-16)

12 «Míǹ pu ní bisaraaŋakpilib nìn tú-mi ki tīī-mi mpɔn, ní m búntì Damaasi. 13 M bí nsanni kuwiŋkuluu ki cée, ní ki ká ŋwalifi ŋubɔ nyánní yilpu, ki wāĺ nyáka nyaka ki jítiǹ ŋwìiń, ki māntìi tú man nì bin nìn nóó ki cá nsanee. 14 Niinee ní ti-kɔkɔ lítì kitiŋ, ní m gbìl̄ nneen ŋubɔ sòon̄ nì mi eebru sooŋyin yii: <Sɔɔl, Sɔɔl, ba ŋá ní a páb́-mi míǹ? An làá nīn pɔ̄ɔ̄ ki tīī-si á tɔ̄ ipiin pu ŋgbèen.> 15 Niinee ní m bālifì yii: <An sá sii ŋma, m-Dindaan?> Ní ti-Dindaan bí-mi yii: <An sá man Yeesu un a páb̀ee! 16 Ama yīkìí yūĺ a-taaŋi pu. M dɔ́miń kí dū-si kí ŋá m-tɔntɔnliu ní. Sii di làá tùkù bin kíǹee tin a ká m-cee díǹee, nì tin tin m làá dāá tí yàntī á kée. 17 M làá dāá tɔ̄-si Juuda yab nì bin kaa sá Juuda yabee cee, ki làá dāá mɔ̄tì a-pu bí taa ŋá-si tiba. 18 A làá cù kí ŋúbití bi-nimbiliŋ, kí nyāntiń-bi dibɔmbɔndin kí cáań-bi ŋwalifin, kí fōō-bi Sitaan pɔŋŋun kí cáań Unimbɔti cee. Bi yaa fōō-mi ki kííyee ní bí ká bi-kpitii pɔ̄tam nì tipaal tin Unimbɔti làá dāá tīī bin u gāntì bi sá u-yabee.>»

Pɔɔl sòon̄ u-tundi pu

19 «Míǹ pu ní, ubɔti Agriipa, maa kpēē tin nyánní yilpu m kée fám. 20 M nìn kíĺ ki tùkū Damaasi yab ki wāatì, ní boonee ní m tùkū Jeerusaleem yab, ní ki póotì Juudee tiŋki nib kɔkɔ, nì atimbun ŋin kɔkɔ kíǹee yab, yii bí fá bi-kpitii kí gítiń Unimbɔti cee, kí nīn cáá mbimbim min dàkà yii bi lafun kpántì bi-bee^b. 21 Kun di yì-tì ní m nìn bí kunimbɔtidiin Juuda yab dɔ́miń ki cúú-mi ki bàà là kí kpɔ̀-mee dee. 22 Ama Unimbɔti mɔ́tì m-pu áli ki dāa sāā díǹ. M gbíntìi bí ki lèekī m-seerau biwɔfib nì biyidambi nimbiin. Maa ti cáá tiba ki kútì tin tin Unimbɔti bɔnaatiliibi nì Mooyiisi nìn lī ki yóoǹee pu, 23 yii Meesiya làá dāá jī falaa áli kí dāá kpú. Úǹ di dāa sá upeepeekaa un làá fìkitī bitaŋkpiibi kansikin, kí cáań Juuda yab nì bin kaa sá Juuda yabee ŋwalifee^c.»

Pɔɔl gbāam̀ Agriipa ú fōō Yeesu kí kíí

24 Pɔɔl bíi sòoǹ tin u cááyee, ní Feestuusi téeń mpɔn yii: «A wáatì ní, Pɔɔl! A nín bífì tigbɔn tikpil puee di bíil̀ a-yil.» 25 Ní Pɔɔl kíí-u yii: «Ukpil Feestuusi, maa wáatì. Tibɔti tin m sòoǹee sá ibaamɔn ní ki sá tibɔmɔntiil. 26 Ubɔti béè-tì, míǹ puee ní m ŋūǹ kí sòoǹ u-nimbiin kaa fàŋkí. M nyí yii u nyí tikɔkɔ, kun puee an kaa nìn sá dibalin ní tibɔtee nìn jítì. 27 Too, ubɔti Agriipa, a fōō ki kíí yii Unimbɔti bɔnaatiliibi nín nìn sòon̄ tiŋyee sá ibaamɔnaaa? Man nyí yii a fōō ki kíí yii an sá ibaamɔn.» 28 Ní Agriipa bí Pɔɔl yii: «An kíǹ fiii, á bàà dū-mi kí kpántí Kriisitoo yɔu!» 29 Ní Pɔɔl kíí-u yii: «An yaa kíǹ fiiiyaaa, an yaa làá tí yúntáaa, m bàà là Unimbɔti ń ŋá míǹ. Án taa nín̄ sá gba sii baba, ama án nīn sá ki kpáaǹ bin kɔkɔ bíi pílifíǹ-mi díǹ nee, ama bí taa nín bóob́ nimbi nì ikusaka nee ní!»

30 Niinee ní ubɔti nì gɔmina nì Beereeniisi nì bin kɔkɔ nìn kā bi-ceeyee 31 yíkì ki nyáń, ní ki bíi lì yii: «Kijapaai nee kaa yīntì tiba tin máaǹ bí kpɔ̀-ueeyaaa, kaa tí máaǹ bí cáá-u kí ŋá sarka mun.» 32 Ní Agriipa bí Feestuusi yii: «Kijapaai nee yaa kaa nìn bí yii bí cáá-u gɔminakpaan cee, ti bàà ŋūǹ kí gíiǹ-u kí líí.»