Atuun 25

Pɔɔl bí yii u là gɔmina Seesaar nín sòoǹ u-bɔti

1 Feestuusi nìn bàn̄ Juudee watil. Iwiin ita boonee ní u yíkì Seesaaree ki nín jɔ́ḿ Jeerusaleem. 2 Ní bisaraaŋakpilib nì Juuda yab nikpaambi dɔ́miń ki kàan̄ Pɔɔl bɔti ki tùkū-u, ní ki gbāam̀ Feestuusi 3 yii ú jī kimɔtii kí yàntī Pɔɔl ń dāan̄ Jeerusaleem. Di sá yii bi bɔ́ntì ki cí kí kpɔ̀-u nsanni. 4 Ní Feestuusi kíí-bi yii: «Pɔɔl kā sarkan Seesaaree, man m-ba bíi bɔ́ntí kí fàtīí gítí niin ní nee.» 5 Ní u gíti bí-bi yii: «Mimmee, ni-kpilib ń nóó-mi tí cù Seesaaree bí tin sòoǹ kí kpèè uninja gbanti yaa ŋá tikpitil tiba.»

6 Feestuusi nìn ŋá iwiin inii kii saalaa pu bi-kansikin, ní ki fātìi gítìń Seesaaree. Kutaa wúntèe ní u kɔ́ ki kāl̀ kubɔsoondiin ní ki bí bí yíiń Pɔɔl. 7 Pɔɔl bāańee Juuda yab bin nyánní Jeerusaleemee yú ki kɔ́ĺ-u ki sòoǹ u-pu yii u ŋáaǹ tibɔkpaandi tikpil. Ama baa nìn ŋūǹ kí cáań tiba bí béé yii tin pu bi sòoǹee sá ibaamɔn. 8 Ní Pɔɔl mun yōoǹní tin u cááyee ki lī yii: «Maa yīntì nì Juuda yab marab ubɔ, kaa tí yīntì nì kunimbɔtidii, kaa yīntì nì gɔminakpaan Seesaar mun.» 9 Feestuusi nìn là án mɔ̄ɔkiǹ Juuda yabee, ní u bālifì Pɔɔl yii: «A là kí jɔ̄m̀ Jeerusaleem bí sòoǹ a-bɔti nee m-nimbiinaaa?» 10 Ní Pɔɔl kíí-u yii: «Gɔminakpaan Seesaar bɔsoondiikun ní man sí ki bí nee, niin ní an máaǹ bí sòoǹ m-bɔti! Kun puee maa ŋá Juuda yab tikpitil tiba, sii a-ba gba nyí míǹ tiŋan. 11 M yaa sá unikpiti ní ki ŋá tin tin máaǹ ŋkúmee, mimmee maa mɔ́tí ŋkúm pu. Ama, an yaa tí sá yii tin bi sòoǹ m-puee yaa sá nnyimɔn, ubɔ kaa ŋūǹ kí dū-mi kí tīī-bi. See ḿ bà gɔminakpaan Seesaar nimbiin!» 12 Niinee ní Feestuusi nì u-kpilib kāl̀ ki sòon̄ ki kpōotì tɔb, ní ki kíí-u yii: «Kéè, a bí yii a là kí cù gɔminakpaan nimbiinaa! Ti kíí á lafun cù u-nimbiin.»

Pɔɔl yú Agriipa nì Beereeniisi nimbiin

13 Iwiin ili boonee, ní ubɔti Agriipa nì Beereeniisi bāań Seesaaree kí jāam̀ Feestuusi. 14 Bi kāl̀ iwiŋkaaŋkaa iba poonee, ní Feestuusi dū Pɔɔl bɔti ki kàan̄ ki tùkū ubɔti yii: «Feeliikisi yāntì uninja ubɔ sarkan doo. 15 M nín nìn cūtì Jeerusaleemee ní bisaraaŋakpilib nì Juuda yab kpilib tùkū-mi yii u nìn ŋá ikpiti ní, ní ki mēē-mi yii ḿ dáaĺ u-tafal. 16 Ní m kíí-bi yii Room yab bíǹ kaa dù unil kí tīī bí dáaĺ u-tafal, asee bí pɔ̄-u kinyɔkɔ u mun ń sòoǹ u-nannanliibi nimbiin kun pu ní bi bí ki jáàyee. 17 Bi dɔ́miń doo nee, kutaa wúntèe maa nìn gíti tāaǹ-bi, ní ki kɔ́ ki kāl̀ m-bɔsoondiikun ní ki bí bí cáań uninja gbanti. 18 Ní u-nannanliibi mun kàan̄. Ama maa ká tikpitil tin ní m bàà dàkafī yii u máaǹ ki ŋée. 19 An nìn sá bíǹ bi-ba marab nì un bi yíì Yeesu u kpíì kin Pɔɔl bí yii u bée ŋmaniŋma pu ní bi bíi kpákà. 20 Maa nìn nyí m nín làá ŋá pu kí béé tibɔti gbanti yilee, an pu ní m bālifì Pɔɔl yii u yaa là kí cù Jeerusaleem ḿ sòoǹ u-bɔti gbanti niin. 21 Ní Pɔɔl yíì ki lī yii bí yàntī ú nīn bí sarkan kí nīn cí ŋyunti ŋun ní gɔminakpaan Seesaar làá dāá sòoǹ tibɔti gbantee. Ní m bí bí dū-u kí pìin̄ kí nīn cí ŋyunti ŋun m làá dāá dū-u kí tīī gɔminakpaanee.» 22 Ní Agriipa bí yii: «Man m-ba bàà là uninja gbanti ń sòoǹ ḿ pīlifì.» Ní Feestuusi kíí-u yii: «Tin u yaa cááyee, fool a fu gbìl̀.»

23 Kutaa wúntèe ní binib tikpil fōō Agriipa nì Beereeniisi, ní bi nì bisoojakpilib nì kitiŋ poon nikpaambi táá ki kɔ́ kubɔsoondiin. Ní Feestuusi yāntì bi cáań Pɔɔl, 24 ní ki bí yii:

«Ubɔti Agriipa nì nimbi bin kɔkɔwoooo kpáfì doo nee, Juuda yab kɔkɔ dɔ́miń m-cee Jeerusaleem nì doo ki yíiń uninja un ni wāĺ nee ibeeyiin, ní ki tátí yii bi máaǹ kí kpɔ̀-u. 25 Ama man nyí yii waa ŋá tin máaǹ ŋkúmee, ní úǹ u-ba dāa bí yii gɔminakpaan ń sòoǹ u-bɔti. M kpēē yii an lafun máaǹ mimmee, ní m là kí dū-u kí tīī-u. 26 Maa láá nyí u-bɔti pu tiba kí ŋmà kí tīī ti-yidaaŋwu Seesaar kɔŋkɔnnee. Míǹ pu ní m cáań-u ni-cee, nì sii a-ba ubɔti Agriipa nimbiin, ní bi yaa bíi bàlifī-u anyɔɔbunee, ḿ ŋmā kí ká tiba poon kí ŋmà. 27 Di sá yii an kaa kítì ḿ dū usarkadaan kí tīī míǹ, kaa lī tin pu ní bi ŋúb́-uee.»