Neeyeemiya i

Kugbɔŋu kun sòoǹ

Neeyeemiya

puee

Tibɔkilkaal

Neeyeemiya gbɔŋku nìkì ki sòoǹ tin kā Eesiraasi gbɔŋkunee ní. Tigbɔn gbantee nìn dáá sá kubaantiiu ní. Tibɔti tin ŋmàn̄ ki kā poonee sá tin ní Neeyeemiya nìn ŋmàn̄ ki yóoǹ u-bee ní.

Neeyeemiya un kaa nìn sá usaraaŋalee nìn bí usaraaŋal Eesiraasi yuntiŋu ní. U nìn sá ukàlinjakpaan ní Peeriisi yab bɔtiu Aritaseerseesi cindin. U-kpiliu nìn pú-u nsan ú cù Jeerusaleem kí ŋāŋkì bi nín làá nīn kpòotī u-tiŋki puee bɔti nì ki-nimbisàmbiyaamu bɔti nì ki-nib kansikin bɔti (1.1–2.10). U nín bàn̄ee, nì min kɔkɔ binannanliibi biba yíkì kaa kííyee, u-yab tikpil dɔ́miń ki tíkiǹ-u ní u nì bi máń Jeerusaleem gundi (2.11–7.72). Míǹ boonee, u nìn yú ki kɔ́ĺ Eesiraasi dinimbɔtinool kpafikpaandi diba poon. Dikpafil gbanti poonee, Eesiraasi nìn kàan̄ Unimbɔti marab. Leefii yab nìn cántí bi-taapu ki tùkù binib ní ki nìn cáa nàatī bin kaa nìn gbìl̀ Eebru sooŋyee, ní samaa fātìi pɔ̄ntì bi nín nìn pōoǹ kí nīn nóó Unimbɔti puee (8.1–10.40). Neeyeemiya bɔ́ntì bi nín làá nīn kpòotī kitiŋ puee marab (11.1–12.26). Boonee ní u kpōotì bi nín ŋáŋkì kitiŋ puee jiŋaaliu (12.27-43), ní ki kàan̄ marab bin nyɔkɔm u bɔ́ntì bí nīn kíǹ ki dī ki nóó Unimbɔtee (12.44–13.31).

Neeyeemiya naŋku kun kugbɔŋu kun bi dū u-yindi ki pú nee nyāntí ki dàkà-tee di sá unil un cáá difaŋgiil ditundi poon, ki lìntī binib nyɔkɔpu bi tūǹ atuun, ki sá ubulcinnil, ki cáá dipɔbil ní ki cáá ŋwimmeem ki tīkintí u-tuuŋŋi kɔkɔee.