Eesiraasi 10

Juuda yab jìn̄ binicannimpoobi bin bi cááyee

1 Ŋyunti ŋun Eesiraasi gbāā ki sūǹ kunimbɔtidii nyɔkɔpu ki mèé Unimbɔti bi-kpitii pɔ̄tam puee, Isirayeel yab dinikitikpaandi, bininjab nì binimpoobi nì mbiyaamu dɔ́miń ki māntì tú-u ní ki bíi sūǹ tikpil. 2 Niinee ní Yeeyiyeel jipɔɔn Seekaniya un sá Eelaam maaliŋunee bí Eesiraasi yii: «Taa yúliǹ ti-Nimbɔtiu deedee ki cáá binicannimpoobi bin sá kitiŋ nee poon nimpubiyaamuee. Ama nì míǹ kɔkɔee, dimákal diba gbíntìi dáá bí ki tīī Isirayeel yab. 3 Tí lēēmaan ti-pɔbiliŋ poon kɔŋkɔnnee kí ŋá mpèé nì ti-Nimbɔtiu yii ti làá jà binicannimpoobi gbanti kɔkɔ ki kpáaǹ bi-biyaamu, kii sii ti-kpiliu nì bin kɔkɔ fàŋkí ti-Nimbɔtiu marabee nín sáŋkì-ti puee. Ti làá ŋá kí nóó nì mara. 4 Yīkìm̄, kun puee sii di làá ŋāŋkì tibɔti nee. Timbi yú a-boon, ká kunyannyaau kí ŋá min máaǹee kí taa gùgufì.»

5 Niinee Eesiraasi yíkì ní ki yāntì bisaraaŋaliibi nì Leefii yab^a nì Isirayeel yab kɔkɔ pūtì yii bi làá ŋá kii Seekaniya nín sòon̄ puee, ní bi-kɔkɔ pūtì. 6 Ní Eesiraasi nyáń kunimbɔtidii cindin ki cūtìi kɔ́ Eeliyasiib jipɔɔn Yoowanan diikun ki dōoǹ, ama waa nìn jíń báà tiba kaa nìn nyùn̄ mun. Di sá yii bin nìn nyánní kuyuŋuee nín nìn ŋá ikpitikpaan iŋyee nìn sá-u kii dikpoolee ní u kā.

7 Bi nìn báakì Jeerusaleem nì Juuda timmu mun kíǹee poon yii bin kɔkɔ nìn nyánní kuyuŋuee ń kpāfì Jeerusaleem. 8 Adican kpilib nì abɔtibil nìn sòon̄ ki yóoǹ yii nì iwiin ita poonee, un yaa kaa dɔ́mińee, bí fōō u-wanti tin kɔkɔ u cááyee, ní kí jà úǹ u-ba kí nyāntí bin nyánní kuyuŋuee kansikin.

9 Niinee ní Juuda yab nì Beenjameen yab bininjab kɔkɔ kóoǹ ki kpáfì Jeerusaleem tiŋkin iwiin ita gbanti poon. An nìn sá uŋmawawati poon iwiin mmuŋku dal ní. Binib kɔkɔ nìn kpáfì kunimbɔtidii mɔŋkiŋu tiwun jìkì tin poon bi bée pu. Kí kūtèe utaa nín bíi nì. 10 Usaraaŋal Eesiraasi nìn yáatìi yúl̀ ní ki bí-bi yii: «Ni nín cáá binicannimpoobee, naa yúliǹ Unimbɔti deedee, ní ki yāntì Isirayeel yab bɔkpil gíti nyāŋkì. 11 Kɔŋkɔnnee, ní tīīmaan ti-Dindaan ni-baabi Nimbɔtiu tinyool, kí ŋámaan min u lèe. Ni nì kitiŋ nee pu yab ń yàkatī tɔbin ní ní jà binicannimpoobi bin ni cááyee.»

12 Bin kɔkɔ nìn kpáfì niinee nìn kíí mpɔn yii: «A cáá mbaamɔn! Án pée sá tí ŋá kii a nín lī pu nee ní. 13 Ama ti wīikí ní an sá kuseeun mun. Taa ŋūǹ kí nīn yú mpaampiin pu míǹ. Kí wàatī muee taa ŋūǹ kí dū ŋwiin ŋubɔ àá ili gba kí ŋāŋkì tibɔti nee, kun puee ti-kansikin tikpil bí ki ŋá ikpiti tibɔti nee poon. 14 Míǹ puee ti-kpilib ń gbíntí doo samaa kɔkɔ yil pu. Bí yóoń bin kɔkɔ cáá binicannimpoobee iyunti ní báà ŋma ń nīn dòoń ŋyunti ŋun bi yóoǹ-uee, u nì u-tiŋki kpilib nì ki-bɔsoonliibi, ní bí kpèè tibɔti gbanti kí tin sāā ŋyunti ŋun ní Unimbɔti ŋuul làá sɔ̀ŋkì timbi puee.»

15 Asayeel jipɔɔn Joonatan nì Tiisfa jipɔɔn Yasiya baba di kaa nìn kíí ki tɔ́kɔǹ nlandɔkɔ ŋun bi cáańee pu. Meesulam nì uleefiija Sabeetayi mun nìn yú bi-boon. 16 Ama Isirayeel yab bin nìn nyánní kuyuŋuee nìn fōō an bɔtee ki làá ŋá míǹ. Usaraaŋal Eesiraasi nìn sāā kudicaŋu kamaa poonee bininjab kansikin ubɔ diŋambil, ki lēē-u ú nīn sá kudicaŋu kpiliu. An nibee nìn kpáfì uŋmaliliiti wimpeekaaŋu dal ki kíĺ kí kpèè tibɔti gbanti. 17 Bi dāa ŋáŋkì bininjab bin kɔkɔ cáá binicannimpoobee bɔti ki dóò dibindi poon uŋmapeepeekaa wimpeepeekaaŋu dal ní.

Bininjab bin nìn ŋá ikpitee yiŋŋi

18 Bisaraaŋaliibi kansikin bin nìn cáá binicannimpoobee yiŋŋi sɔ̀.

Yoosadaaki jipɔɔn Joosuwa maaliŋun yab nì bi-nabiyaamu kansikinee, Maseeyawuu nì Eeliyeeseer nì Yaariiba nì Geedaliya. 19 Bi nìn pūtì yii bi làá jà bi-nimpoobi ní kí dū upìja ki ŋá dibɔkpil saraau.

20 Imeer maaliŋun yab kansikinee, Ananii nì Seebadiya.

21 Ariim maaliŋun yab kansikinee, Maseeyawuu nì Eeliya nì Seemaya nì Yeeyiyeel nì Usiyasi.

22 Pasuur maaliŋun yab kansikinee, Eeliyooweenayi nì Maseeyawuu nì Isimaayeel nì Neetaneeyeel nì Yoosabaadi nì Eeleeyasa.

23 Bi-kansikinee bin sá Leefii naakookun yabee di sá Yoosabaadi nì Simeeyii nì Keedaya, (bi gíti yíì-u yii Keeliita) nì Peetayia nì Yeewuda nì Eeliyeeseer.

24 Biwambɔɔliibi kansikinee, Eeliyasiib. Bipunyɔɔciitiliibi kansikinee, Saaluum nì Teeleem nì Uurii.

25 Isirayeel yab bin kíǹee kansikinee,

Pareeyoosi maaliŋun yab di sá Ramiya nì Yiisiya nì Maalkiya nì Miiniyaamiini nì Eeleeyasaar nì Maalkiya nì Beenaya.

26 Eelaam maaliŋun yab di sá Mataniya nì Seekariya nì Yeeyiyeel nì Abidii nì Yeereemooti nì Eeliya.

27 Satu maaliŋun yab di sá Eeliyooweenayi nì Eeliyasiib nì Mataniya nì Yeereemooti nì Sabaadi nì Asiisa.

28 Beebaayi maaliŋun yab di sá Yoowanan nì Ananiya nì Sabaayi nì Atilayi.

29 Banii maaliŋun yab di sá Meesulam nì Maluuki nì Adaaya nì Akuub nì Seeyal nì Yeereemooti.

30 Paati-Moowaab maaliŋun yab di sá Adina nì Keelaal nì Beenaya nì Maseeyawuu nì Mataniya nì Beesaleel nì Binuyii nì Manasee.

31 Ariim maaliŋun yab di sá Eeliyeeseer nì Yisiya nì Maalkiya nì Seemaya nì Simeeyɔn,

32 nì Beenjameen nì Maluuki nì Seemariya.

33 Asuum maaliŋun yab di sá Mateenayi nì Mataata nì Sabaadi nì Eeliifeeleeti nì Yeereemayi nì Manasee nì Simeeyii.

34 Banii maaliŋun yab di sá Maadayi nì Amiiraam nì Uyeel 35 nì Beenaya nì Beediya nì Keeluyii 36 nì Faniya nì Meereemooti nì Eeliyasiib 37 nì Mataniya nì Mateenayi nì Yaasayi 38 nì Banii nì Binuyii nì Simeeyii 39 nì Seeleemiya nì Naatan nì Adaaya 40 nì Makinaadibayi nì Saasayi nì Saarayi 41 nì Asareeyeel nì Seeleemiyawuu nì Seemariya 42 nì Saaluum nì Amariya nì Jooseefi.

43 Neeboo maaliŋun yab di sá Yiyeel nì Matitiya nì Sabaadi nì Seebina nì Yadidayi nì Jooweel nì Beenaya.

44 Bininjab gbanti kɔkɔ di nìn cáá binicannimpoobi, ní bi-kansikin tikpil nìn màl̄ mbiyaamu.