Eesiraasi 9

Juuda yab cáá binicannimpoobi

1 Tíǹ jítì boonee ní Isirayeel kpilib biba dɔ́miń ki tùkū-mi yii: «Isirayeel nibul nì bisaraaŋaliibi nì Leefii yab kaa gāntì bi-ba nì kitiŋ nee pu nibuliŋ ŋin kíǹee. Bi mun bí ki ŋáań ntimbiil tuuŋŋi kii Kanaan yab nì Eeti yab nì Peeriisi yab nì Jeebusi yab nì Amɔn yab nì Moowaab yab nì Eejipiti yab nì Amɔɔr yab nín ŋáań puee ní. 2 Bíǹ bi-ba cáá niin tiŋkin binimpoobi, ní ki cáá ki tīī bi-jipɔmbi mun ní dinibul din bí circiree dūu ŋmālim̀ niin tiŋki nibin. Adican kpilib nì abɔtibil di péé péé ki kɔ́ tijɔkɔndi gbantin.»

3 M nín gbìl̄ an bɔtee ní m dáaĺ ki cátì tiwan tin m pēēyee, ní ki dáaĺ ki fùkū m-yikpiti nì m-nyimpul, ní ki kíǹ ki kā nì kunimbaau. 4 Bin kɔkɔ nìn tɔ́ Isirayeel Nimbɔtiu bɔtee nín gbìl̄ atuŋkpiti ŋin bin nyánní kuyuŋuee ŋée, ní bi kóoǹní ki dɔ́miń ki kpáfì m-cee. Ama mamee, m nìn pée kā nì kunimbaau míǹ ní áli kujoou saraau yuntiŋu.

Eesiraasi mēē ki tīī Juuda yab bin yīntèe

5 Kujoou saraau yuntiŋu ní m nyáń m-nimbaaku poon. M nìn gbíntìi pēē m-wanti tin m nìn dáaĺ ki cátèe, ní ki gbāaǹ m-tabiŋyiliŋ pu, ní ki yōoǹ m-ŋalii ki túĺ ti-Dindaan m-Nimbɔtiu watil pú. 6 M nìn mēē-u yii: «M-Nimbɔtiu, icoo cúú-mi ní m bākatì, maa ŋūǹ kí wáaǹ kí kpèè sii m-Nimbɔtiu watil pú gba. Di sá ti-kpitii wíiǹ ki lákatì ti-yil pu ní ti-yìntitam kpúkú ki tin sāā kutagbɔŋu. 7 Kí yòon̄ ti-naanjab yuntiŋu kí dāá sāā díǹ nee, ti yīntiǹ-si ŋkpitim pu. Ti-kpitii puee a dū timbi nì ti-bɔtiibi nì ti-saraaŋaliibi ki líiǹ kitiŋ pu bɔtiibi nì kujaau, ki yāntì bi cúú-ti kuyuŋu ki fúkúl̀-ti ki kɔ́ǹ-ti icoo, kii an nín bí-ti díǹ pu nan ní. 8 Ama kɔŋkɔnnee, ti-Dindaan ti-Nimbɔtiu, a dàkā-ti kulaŋŋaŋfitiiu ki yāntì ti-kansikin biba dáá gbíntìi bí dimaŋfalin ki gítìń ki kāl̀ a-circir tiŋkin. Ti-Nimbɔtiu, a ŋá míǹ ki yāntì ti-nimbiliŋ ŋāatì ní ti ká dimaŋfapɔndi ti-yuŋku poon. 9 Di sá yii ti nìn sá iyumbu ní, ama ti-yuŋku gbanti poonee, sii ti-Nimbɔtiu kaa nìn dū-ti ki fá. A yāntì Peeriisi yab bɔtiibi dàkā-ti kulaŋŋaŋfitiiu. A tīī-ti dimaŋfal ti ŋúń ki fātìi máń sii ti-Nimbɔtiu diiku, ní ki ŋáŋkì ku-digbuŋŋi ní ki ŋúń ki máń agun ki tú Jeerusaleem nì Juuda timmu mun kíǹee.

10 «Kɔŋkɔnnee ti-Nimbɔtiu, tilati ní ti cáá kí lì tin bāań nee pu? Di sá yii ti fātì ti-boon ki tīī a-marab 11 bin ní a nìn dī a-tɔntɔnliibi bibɔnaatiliibi pu ki tīī-tee. A nìn kpáafì-ti ki lī yii: <Kitiŋ kin ni làá cùú fōō kí nīn kóò nee kɔ́ tijɔkɔndi binib bin kóò ki-nee jɔkɔntuuŋŋi pu. Di sá yii kí yòon̄ laakin kitiŋ nee kífée kí cáá kúntí ki-gbeennyɔkɔee, an sá ntimbiil tuuŋŋi ŋin bi tūǹee ŋma ní bi dūu gbéeǹ-kì. 12 An puee ní taa dū ni-bisalib kí tīī bi-jipɔmbi ticati, kí taa cáá bi-bisalib kí tīī ni-jipɔmbi. Ni yaa là kí nīn cáá mpɔn kí jī kitiŋ gbanti naam, ni-biyaamu mun ń dāá yīkì kí tɔ́kɔń kí nīn pée jīǹ ki cá jaanjaanee, ní taa dī isaŋkpiti in pu bíǹ bí an bútì-bee pu, kí taa nyàab̀ bi-gbansɔŋfiŋu juti ŋwindal^a.> 13 Tin kɔkɔ pée bāań-ti nee nyánní ti-tuŋkpitiŋ nì ikpitikpaan in ti ŋée pu ní. Óò ti-Nimbɔtiu, nì míǹ kɔkɔee, aa dáaĺ ti-tafal ki bàn̄ ti-kpitii nín sá puee nyɔkɔm, ní ki yāntì ti-nibul poon biba kíǹ kaa kpíì. 14 Tinee boonee, ti bàà gíti cáá nsan kí tí kíĺ kí nīn yìntīǹ a-marab ti nì anibul ŋin ŋáań ntimbiil tuuŋŋee ń ŋá ubaanti, ti cāab̀ tɔbaaa? Aa fòol̄ ti-pu diŋuul áli kí kúntí-ti ubɔ ń taa kíń, àá ubɔ ń taa ŋmátáaa? 15 Ti-Dindaan Isirayeel Nimbɔtiu, a sá deedeedaan ní. Díǹ pu nee a yāntì ti-kansikin biba kíǹ kaa kpíì. Kpèè timbi di yú a-nimbiin ti nì ti-kpitii nee, ama ubɔ kpá ki bí tin poon timbi bí nee kí ŋmā kí yūĺ a-nimbiin.»