Eesiraasi i

Kugbɔŋu kun sòoǹ

Eesiraasi

puee

Tibɔkilkaal

Bisaraaŋaliibi kitil din ŋmàn̄ Krooniiki gbɔnti liitilee di ŋmàn̄ Eesiraasi nì Neeyeemiya gbɔnti mun (kpèè 1 Krooniiki bɔkilkaati). Eesiraasi nì Neeyeemiya gbɔnti nìkī tibɔti tin kā Krooniiki gbɔnti gbanti poonee ní. Nlandɔkɔbaanti nì dimákabaantiil poon ní bi ŋmàn̄ tigbɔn gbanti naatil.

Eesiraasi gbɔŋku kíĺ nì Peeriisi yab bɔtiu Siirusi nín nìn pú Juuda yab nsan yii bí cùú fàtīí mā kunimbɔtidii Jeerusaleem puee ní (diyil 1). Binib bin bi nìn cúú ki cūnnì kuyuŋuee tikpil fātìi kíliń nsan ki nín gítiń (ayil 2). Bi-tumpeepeekaal din bi làá tin tɔ̄ Jeerusaleemee di sá bí fàtīí mā nsaraafan ní kí mɔ̀tīí cítí dinimbɔtinool (ayil 3). Ama bi nín bíi bɔ́ntí kí kíĺ kunimbɔtidii mātamee, binannanliibi biba yíkì kaa kíí. Niinee ní bi ŋmàn̄ ŋmàn̄ tɔb tigbɔn ní an dāa kúntì yii Peeriisi yab di pú Juuda yab nsan yii bí fàtīí mā kunimbɔtidii (ayil 4–6).

Kugbɔŋu nee janliliitiil máafí boon boonee, ubɔti Aritaseerseesi nín dāa tú usaraaŋal Eesiraasi ú cù kí tīī binib kunyannyaau kí bɔ́ntí dinimbɔtinool saŋŋu Jeerusaleem puee ní (ayil 7–10).

Tibɔti tin pu Eesiraasi gbɔŋku baasii tɔ́kɔ́ ki sòoǹee di sá fookiimɔnti nì circir maŋfal bɔti nín páb́ miŋyee. Kugbɔŋuee dàkà usaraaŋal Eesiraasi nín dū dipɔbil nì difaŋgiil ki fātìi bɔ́ntì dinimbɔtinool saŋŋu Isirayeel tiŋkin puee ní. Úǹ di kāl̀ ki bɔ́ntì Juuda yab nimbɔtinool dibaamɔndi. Dinimbɔtinool gbantin ní abin kupaau boonee, bi dāa màl̄ Yeesu.