Krooniiki Gbɔnliliitiiku 36

Joowakaasi nì Yooyakiim nì Yooyakiin, Juuda bɔtiibi

(Kpèè 2 Bib 23.30–24.17)

1 Juuda yab nìn yōoǹ Joosiyaasi jipɔɔn Joowakaasi ki kāaǹ ubɔti Jeerusaleem, u-baa yil pu. 2 Joowakaasi nìn cáá abin mmuŋku nì ata ní ki kpántì ubɔti ní ki kāl̀ Jeerusaleem ki jíń dibeel iŋmal ita. 3 Eejipiti bɔtiu nìn kpákatì-u dibeel Jeerusaleem, ní ki gíí Juuda yab lampoo animbil kúti kiiloobi kutukub bita nì sindaariya kiiloobi mmuŋku nì saalaa. 4 Míǹ boonee ní Eejipiti bɔtiu yōoǹ u-naal Eeliyaakiim ki kāaǹ Juuda nì Jeerusaleem pu ubɔti, ní ki kpántì-u diyindi yii Yooyakiim. U nìn yōoǹ Yooyakiim maan Joowakaasi ki cūnnì Eejipiti^a.

5 Yooyakiim^b nìn cáá abin mmuŋku nì aŋmoo ní ki kpántì ubɔti, ní ki kāl̀ Jeerusaleem ki jíń dibeel abin saalaa nì diba. U nìn ŋá tin kaa kítì ti-Dindaan, u-Nimbɔtiu nimbiinee. 6 Babiloon bɔtiu Neebukadineesaar nìn dɔ́miń ki jáń nì u. U nìn dū tasa kusakai ki bóob́-u tiŋan ki cáa cūnnì Babiloon^c. 7 Neebukadineesaar nìn gíti yōoǹ kunimbɔtidii poon tiwan tikpil ki cáa cūnnì ki síiǹ úǹ u-ba beecindin Babiloon.

8 Yooyakiim tuuŋŋi ŋin kíǹee nì ntimbiil tuuŋŋi ŋin u ŋée nì tin bāań-uee kɔkɔ ŋmàn̄ ki kā Isirayeel nì Juuda yab bɔtiibi tuuŋŋi gbɔŋkun.

9 Yooyakiin nìn cáá abin anii ní ki kpántì ubɔti ní ki kāl̀ Jeerusaleem ki jíń dibeel iŋmal ita nì iwiin saalaa. U nìn ŋá tin kaa kítì ti-Dindaan nimbiinee. 10 Dibindi cá kí kúntée ní Neebukadineesaar tú u-janjaliibi bí cùú cúuń Yooyakiin, kí kpáaǹ tiwammɔntiil tin bí kunimbɔtidiinee Babiloon tiŋkin. U nìn dū u-nabiki Seedeesiyasi ki kāaǹ ubɔti Juuda nì Jeerusaleem^d.

Seedeesiyasi, Juuda bɔtiu

(Kpèè 2 Bib 24.18–25.21, Yeer 39.1-10, 52.1-27)

11 Seedeesiyasi^e nìn cáá abin mmuŋku nì diba ní ki kpántì ubɔti ní ki kāl̀ Jeerusaleem ki jíń dibeel abin saalaa nì diba. 12 U nìn ŋá tin kaa kítì ti-Dindaan, u-Nimbɔtiu nimbiinee. Waa nìn sīntiǹ u-ba Unimbɔti bɔnaatiliu Yeereemii un nìn bíi nàatī-u ti-Dindaan bɔtee nimbiin. 13 Ubɔti Neebukadineesaar nìn yāntì u pūtì ti-Dindaan Unimbɔti yindi pu, ama nì míǹ kɔkɔee, waa nìn kíí u-ba pu ní ki yíkìi bíi jáà nì u^f. U nìn ŋá ntafapɔn ní ki pɔ́ɔkì u-pɔbil, ní ki yíì kaa kpántì u-ba ki fātìi gítìń ti-Dindaan, Isirayeel Nimbɔtiu cee. 14 Abɔtibil nì bisaraaŋaliibi nì samaa kɔkɔ kaa nìn yúl̀ nì Unimbɔti deedee. Bi nìn ŋá ntimbiil tuuŋŋi ŋin ní atimbun ŋin māntìi tú-bee ŋáańee ki kɔ́ǹ kunimbɔtidii kun bí Jeerusaleem ti-Dindaan dūu sú u-bee tijɔkɔndi. 15 Ti-Dindaan, bi-baabi Nimbɔtiu nìn túnní binib ŋfunyɔm kupaau bí kpāafì-bi, di sá yii u-nibooliŋu nì u-saraafaŋŋu nìn gbí-u inimɔɔn. 16 Ama Isirayeel yab nìn bēel̀ Unimbɔti tuuŋyi gbanti, ki kpēē u-nyɔɔbundi fám ní ki láń u-bɔnaatiliibi. Niinee ní ti-Dindaan ŋuul jéetì u-nibul pu nnyɔkɔ gíti kpá. 17 Ti-Dindaan nìn cáań Babiloon yab bɔtiu^g ki tɔ́ bi-pu. Úǹ nìn dū kitàataajiki ki kūū bi-naacimpɔmbi áli gba circir kɔŋkooŋŋun. Waa nìn súń unaacimpɔɔnaaa, usapɔɔnaaa, utikpilaaa, unicikitikaa saai. Unimbɔti nìn dū tikɔkɔ ki ŋá u-ŋaan. 18 U nìn yōoǹ tiwan tin sá tikpaandi nì ŋwaamu ki nìn bí kunimbɔtidiinee kɔkɔ ki cáa cūnnì Babiloon tiŋkin. U nìn yōoǹ ki kpáaǹ tigaajawan tin bí kunimbɔtidiinee nì tin bí dibeecindinee nì u-kàliŋkpilib yati. 19 Bi nìn gāā ŋŋmi ki tūū kunimbɔtidii ní ki gbáń ki wīī digundi din bi nìn máń ki tú Jeerusaleem tiŋkee. Bi nìn gāā ŋŋmi ki tūū adimɔnti kɔkɔ ní ki gbáń ki bíil̀ tiwan tin cáá kunyampoouee kɔkɔ^h. 20 Babiloon bɔtiu nìn yōoǹ bin nìn kíǹ kaa kpíìyee ki cūnnì Babiloon ní bi kpántì úǹ nì u-jipɔmbi yumbui ki cáa sāā ŋyunti ŋun ní Peeriisi yab fōō dibeelee. 21 Ti-Dindaan nín nìn dī u-bɔnaatiliu Yeereemii pu ki sòon̄ tiŋyee ŋá míǹ dee yii: «Kitiŋ làá dòon̄ kí ŋùŋfì. Ŋyunti ŋun ní binib kaa ti kóò ki-puee, kì làá ŋùŋfì kí cáá sāā abin imuŋku ita nì saalaaⁱ.»

Siirusi pú kinyɔkɔ bí fàtīí mā kunimbɔtidii

22 Peeriisi bɔtiu Siirusi nín jíń dibeel dibimpeepeekaal poonee, ní ti-Dindaan lēē kí ŋá kii u nín nìn dī u-bɔnaatiliu Yeereemii pu ki sòon̄ pu ki síiǹee. Ti-Dindaan nìn gbēē Siirusi pɔbil ní ki yāntì u báakì u-beel kɔkɔ poon, ki ŋmàn̄ mun ki síiǹ yii: 23 «Peeriisi bɔtiu Siirusi nín sòon̄ puee sɔ̀. Ti-Dindaan, yilpu Nimbɔtiu dū abee ŋin kɔkɔ bí kitiŋ puee ki ŋá m-ŋaan ní ki lēē-mi yii ḿ mā-u kudii Jeerusaleem, Juuda tiŋkin. Ni-kansikin un sá u-nibul yɔuee, ti-Dindaan u-Nimbɔtiu ń nīn bí udaan cee ú jɔ̄m̀ Jeerusaleem!»