Krooniiki Gbɔmpeepeekaaku i

Krooniiki gbɔmpeepeekaaku

Tibɔkilkaal

Isirayeel tiŋkin nikitil dibaantiil di ŋmàn̄ Krooniiki gbɔnti liitil. An máaǹ ki sá bisaraaŋaliibi di ŋmàn̄ kugbɔŋu gbanti, ní ti-liitil kpáfì ki sá kugbɔmbaantiiu. An sá kii kugbɔŋkpaaŋŋu kun di máafí Unimbɔti nibul bɔti, kí yòon̄ doooo di-kíltam kí tin cáá sāā ŋyunti ŋun bi cúú di-nib ki cūnnì Babiloon tiŋkin kuyuŋuee.

Baa máafì tibɔti gbanti kii unil un tundi baasii sá ú nīn máafí tibɔti tin jítèe puee. Ama bi máafì-tì kii unil un tundi sá ú nīn bɔ́bití Unimbɔti bɔtee, àá unil un tundi sá ú nīn sòoǹ Unimbɔti bɔti ki tùkù binibee ní. Tibɔti tin u ŋmàn̄ee tikpil kā tigbɔn tin bi péeǹ-ku ki ŋmàn̄ee tiba poon, cilinjee Samiyeel gbɔnti nì Bibɔtiibi gbɔnti poon ní ugbaŋŋmal nee lēē tibɔti tikpil ki ŋmàn̄. Ama tin ní u lēē tigbɔn gbanti poonee dàkà tiŋan didàkal din di baasii kā u-naŋki puee. Didàkal gbanti di sá yii Unimbɔti baba di máaǹ kí nīn kpòotī Isirayeel nibul, bibɔtiibi bíǹ pée sá u-tɔntɔnliibi ní. Bi-tundi di sá bí fōō u-yil kí nīn kpòotī u-nib tikɔkɔ poon bi-maŋfal wiiŋyin. Ti yaa kpēē kii mimmee, Daafiidi di sá ubɔti un yúl̀ nì Unimbɔti deedeeyee. Di sá yii úǹ di jáń ki fōō Jeerusaleem tiŋki kin dāa kpántì circir tiŋki kunimbɔtidii puee. Úǹ di tí dàkā Isirayeel tiŋki poon binib nín máaǹ kí nīn bí pu bi-maŋfal wiiŋyi poonee, ní ki bɔ́ntì bi nín làá nīn nóó Unimbɔti puee. Ubɔtimɔnti Daafiidi kúm boon ní un ŋmàn̄ kugbɔŋu nee dū ŋyunti ki sòon̄ u-biyaamu nì u-naantiibi bin di nìn jíń dibeel Juuda tiŋkinee pu.

Krooniiki gbɔmpeepeekaaku nín kíĺ puee kúlifí tibɔti tin jítì doooo Adam yuntiŋu kí tin cáá sāā Daafiidi yuntiŋuee. Ugbaŋŋmal máafì an bɔti kúlkul ní, kii bi nín ŋmà nnyeen ŋubɔ nib yiŋŋi kí kíliń doooo bi-naanja upeepeekaa puee ní (abɔyil 1–9). Kugbɔŋu nee janliliitiil (abɔyil 10–29) poon ní Daafiidi nín jíń dibeel puee bɔti ŋmàn̄ ki kā. Ugbaŋŋmal yāntì tibɔtee jaŋŋi aba kaa máafì. Ajan gbanti di sá kii Daafiidi biyatin bɔti, nì u nín yìin̄ puee bɔti, nì u nì Saayuul jaaku bɔti, nì u nín jíń dibeel Eebrɔn tiŋkin abin aluli nì dijandi puee bɔti, nì tin jítì u nì Batiseeba kansikinee bɔti, nì Abisaloom nín jáń nì u puee bɔti, ní kí kūtì ajan aba mun. Ama kugbɔŋu jandi dililiitiil nee poon ní an bɔ́bitì ki dàkā kun yì-tì ní Daafiidi ká nlandɔkɔ ki bɔ́ntì bí mā kunimbɔtidii Jeerusaleem tiŋkinee, nì u nín yāntì bi fātìi cáań Mpèé dakaau Jeerusaleem tiŋkin puee, nì u nín ká nlandɔkɔ ŋun ki yāntì bi kàan̄ Isirayeel nibulee. Dikàandi gbanti boonee, bi nìn máń nsaraafan ŋubɔ. Nsaraafan gbanti paaŋŋu pu ní bi dāa máń circir kɔŋkooŋŋu. U nìn gíti bɔ́ntì binib bin làá nīn tūǹ Unimbɔti diikun tuuŋŋee, an dàkà yii bisaraaŋaliibi nì Leefii naakookun yab nì bilaŋgaaliibi nì bin kpèé mpunyɔmuee, nì bin kíǹee.