Eesiraasi 1

Kugbɔŋu kun sòoǹ

Eesiraasi

puee

Siirusi pú kinyɔkɔ bí fàtīí mā kunimbɔtidii

1 Peeriisi yab bɔtiu Siirusi beel bimpeepeekaal poonee, ti-Dindaan nìn là kí ŋá min u nìn dī u-bɔnaatiliu Yeereemii pu ki sòon̄ee. U nìn tīī ubɔti Siirusi nlandɔkɔ ú bāakì u-beel kɔkɔ poon, kí ŋmà kugbɔŋu mun ki síiń yii: 2 «Man Peeriisi bɔtiu nín sòon̄ tiŋyee sèé: <Ti-Dindaan yilpu Nimbɔtiu dū kitiŋ pu kɔkɔ beeŋi ki ŋá m-ŋaan, ní ki bí-mi yii ḿ mā-u kunimbɔtidii Jeerusaleem, Juuda tiŋkin^a. 3 Ni-kansikin un kamaa sá u-nibul yɔuee, ti-Dindaan u-Nimbɔtiu ń nīn bí udaan cee ú jɔ̄m̀ Jeerusaleem, Juuda tiŋkin kí fàtīí mā ti-Dindaan Isirayeel yab Nimbɔtiu kunimbɔtidii. Úǹ di sá Unimbɔti un bí Jeerusaleemee. 4 Laakin kamaa ní u-nibul din kíǹee yaa bée, niin yab ń tīī-bi animbil kúti nì sindaariya nì tigaajawan nì tiwaŋkuti nì nlammɔntiim saraabi bí dūú tɔ̄ kunimbɔtidii kun bí Jeerusaleemee tundi.»

5 Niinee ní Juuda yab nì Beenjameen yab dicaŋŋi kpilib nì bisaraaŋaliibi Leefii yab, an dàkà yii bin kɔkɔ Unimbɔti nìn tīī nlandɔkɔee yíkì ki nín jɔ́ḿ Jeerusaleem kí fàtīí mā kunimbɔtidii kun bí niinee. 6 Bi-kɔŋkɔnnaatɔb nìn cáań animbil kúti nì sindaariya wanti nì tigaajawan nì tiwaŋkuti nì tiwan tin pɔ̄ɔ̄ kudaauee kí tūtuǹ-bi, ní kí nín kūtì tiwan tin bi nìn tīī-bi nì dipɔbil dibee.

7 Ubɔti Siirusi nìn kóoǹ tiwan tin kɔkɔ ubɔti Neebukadineesaar nìn yōoǹ kunimbɔtidiin Jeerusaleem ki cáań ki yóoǹ u-waadiiŋŋinee ki kpáfì^b. 8 Peeriisi yab bɔtiu Siirusi nìn yāntì Miitireedati un kpèé animbil bɔtee dū an wantee ki ŋúbiǹ Seesbasaar, Juuda yab kpiliu. 9 Bi nín kàan̄ tiwan gbantee, ti-nyɔkɔm sɔ̀. Sindaariya sambiliŋ nìn sá mmuŋku nì saalaa, animbil kúti sambiliŋ nìn sá kutuku ubɔ, njimu nìn sá kiba kpá mmuŋku nì saalaa, 10 sindaariya sampeemu nìn sá mmuŋku nì saalaa, animbil kúti sampeemu nìn sá alaataa anaa nì saalaa, ní tiwan tin kíǹee kɔkɔ nìn sá kutuku ubɔ. 11 Sindaariya nì animbil kúti wantee kɔkɔ nìn nyáń kutukub biŋmoo nì alaataa anaa ní. Ŋyunti ŋun bi nìn nyáń kuyuŋu Babiloon ki fàtīi gítí Jeerusaleemee ní Seesbasaar kpáaǹ an wanti gbanti kɔkɔ.