Neeyeemiya 1

Kugbɔŋu kun sòoǹ

Neeyeemiya

puee

1 Tibɔti tin Akaliya jipɔɔn Neeyeemiya máafèe.

Bi máafì Neeyeemiya tin bíi jītí Jeerusaleemee

Ubɔti Aritaseerseesi nín kāl̀ dibeel abin mmuŋku, Kiisileewu ŋmaliu poonee, m nìn bí Suusi ditiŋyil, 2 ní Ananii m-nabiyaamu kansikin ubɔ, u nì Juuda yab dikitil diba dɔ́miń m-cee. M nìn bālifì-bi Juuda yab bin nyáń kuyuŋu ki kùn̄ee nì Jeerusaleem pu. 3 Ní bi kíí-mi yii: «Bin ŋmátì kaa kpíì kuyuŋun ní ki kóò Juuda timmunee bí falaakpaan nì icoo poon ní. Jeerusaleem gundi bátì bátì ki lítì, abun dōoǹ dōoǹ ní punuubi wùn̄ ŋŋmi.»

Neeyeemiya mēē ki tīī Juuda yab

4 M nín nìn gbìl̄ an bɔtee, m nìn kāl̀ ní ki bíi sūǹ. M nìn kāl̀ kunimbaaun iwiin kupaau, ki bóob́ kinyɔkɔ, ki gbāaǹ yilpu Nimbɔtiu nimbiin ki mēē. 5 M nìn mēē yii: «Too, m-Dindaan yilpu Nimbɔtiu, Unimbɔti un sá ukpaan ki sá kuwambiiuee, sii di kaa súntí jaanjaan a nín pōoǹ bin néeń-si ki ŋúb́ a-marabee pu ní ki ŋáań-bi tiŋan. 6 Kpòon̄ a-tafal kí pīlifì, kí ŋúbití a-nimbiliŋ kí wāl̀ man a-tɔntɔnliu nín bí ki mèé-si iyunti nee poon ŋwiimpu nì kunyeeu a-tɔntɔnliibi Isirayeel yab pu puee. M bí ki bìitī ikpiti in ní timbi Isirayeel yab ŋá-see. Ti yīntiǹ-si, tiŋman man nì m-naanjab yīntiǹ-si. 7 Tiŋman ti baasii yīntiǹ-si ní, kun puee taa ŋúb́ marab nì abɔkpaa nì akoobil ŋin a nìn tīī a-tɔntɔnliu Mooyiisi u dūu tīī-tee. 8 Téetí anyɔɔbun ŋin a nìn dī a-tɔntɔnliu Mooyiisi pu ki sòon̄ee. A nìn bí yii: <Ni yaa kaa yúliǹ-mi deedee, m làá dāá jà-ni ní yàl̄ kí kɔ́ atimbun aban^a. 9 Ama ni yaa láa fātìi gítìń m-cee, ki ŋúb́ m-marab, ki ŋáań bi nín bí ní ŋá puee, báà ni yaa láa bíń kitiŋ gbeennyɔkɔ, m làá dāá kóoǹní-ni kí kpāfì kí yàntī ní dāan̄ laakin m làá lēē bí nīn jáaḿ-mee.> 10 Ti-Dindaan, bi sá a-tɔntɔnliibi ní ki sá a-nibul din a dū a-pɔŋkpaaŋŋu nì a-kpabil ki dée. 11 M-Dindaan, m gbàam̄-si, kpòon̄ a-tafal kí pīlifì man a-tɔntɔnliu nì a-tɔntɔnliibi bin an mɔ̄ǹ bí nīn fàŋkí-see wimmeem. Yàntī án kàlīǹ man a-tɔntɔnliu tiŋan díǹ ubɔti ń fōō-mi nì tiniti.» Ŋyunti gbantee, m nìn sá un tìì ubɔti ndaamee ní.