Neeyeemiya 8

1 Samaa kɔkɔ nìn kóoǹ ki kpáfì ki ŋá kii unibaantee Jeerusaleem, Inyiŋfi punyɔkɔki nnimbiin pú. Bi nìn bí Eesiraasi un nyí Unimbɔti marab tiŋanee yii ú cáań kugbɔŋu kun Mooyiisi Marab bin ti-Dindaan nìn tīī Isirayeel yabee kēe. 2 Usaraaŋal Eesiraasi nìn cáań kugbɔŋuee samaa kɔkɔ nimbiin. Bininjab nì binimpoobi nì mbiyaamu mun nìn ŋūǹ kí gbìl̄ tibɔti taapuee nìn kpáfì ki bí niin. An nìn sá uŋmaluluúti wimpeepeekaaŋu dal ní. 3 Eesiraasi nìn yúl̀ Inyiŋfi punyɔkɔki nimbiin pú ki kàan̄ kugbɔŋu doooo kutaafaau ki cáa sāā kuwiŋkuluu bininjab nì binimpoobi nì bin kɔkɔ nìn pée ŋūǹ kí gbìl̄ tibɔti taapuee nimbiin. Báà ŋma nìn pée yú soooo ní ki pílifí bi nín bíi kàaǹ Marab gbɔŋku puee.

4 Bi nìn dū idɔ ní ki ŋá dikɔl dikpafil gbanti pu, ní Eesiraasi un nyí Unimbɔti marab tiŋanee tɔ́kɔ́ di-pu. Bin nìn yú ki kɔ́ĺ-u ŋŋaŋgiil púee di sá Matatiya nì Seema nì Anaaya nì Uriya nì Ilikiya nì Maseeyawuu. Bin nìn yú u-ŋaŋgan púee di sá Peedaya nì Miikayeel nì Maalkiya nì Asuum nì Aseebadana nì Seekariya nì Meesulam. 5 Eesiraasi nìn kpátì kugbɔŋu samaa kɔkɔ nimbilin, kun puee úǹ nìn tɔ́kɔ́ yilpu. Ŋyunti ŋun ní u kpátì kugbɔŋuee, samaa kɔkɔ nìn yíkìi yúl̀. 6 Ní Eesiraasi jáam̀ ti-Dindaan Unimbɔti un sá ukpaanee, ní samaa kɔkɔ kíí yii: «Ameeni! Ameeni!» ki yōoǹ bi-ŋalii yilpu. Bi nìn gbāaǹ ti-Dindaan nimbiin ki jáam̀-u. 7 Niinee ní Leefii yab Yeesuwa nì Banii nì Seereebiya nì Yaamiini nì Akuub nì Sabeetayi nì Oodiya nì Maseeyawuu nì Keeliita nì Asariya nì Yoosabaadi nì Anan nì Peelaya kíĺ ki bíi bɔ́bití marab taapu ki dàkà, ní samaa gbíntìi yú bi-paaŋyi pu. 8 Bi nìn kàaǹ Unimbɔti marau gbɔŋku ki lèekī ajan kɔkɔ taapu ki cántí, án nín làá ŋá pu báà ŋma ń gbìl̄ tin bi kàan̄ee taapuee.

9 Bi nín kàan̄ Unimbɔti marau gbɔŋku samaa gbìl̄ee, ní bi bíi sūǹ. Niinee, Neeyeemiya un sá gɔminee nì Eesiraasi un nyí Unimbɔti marab tiŋanee nì Leefii yab bin nìn bí ki lèekī taapu ki dàkèe bí yii: «Díǹ wiiŋŋu nee sá ti-Dindaan ni-Nimbɔtiu wiiŋŋu ní. Ní taa nín̄ sūǹ kí nīn bí kunimbaaun.» 10 Eesiraasi nìn gíti bí-bi yii: «Nín̄ kùm̀maan kí cùú ŋá tijimmɔntiil kí jī, kí nyɔ̀maan ndamɔntiim. Ní pɔ̄maan bin kaa ŋúń ki ŋá tijinee bí jī, kun puee díǹ wiiŋŋu nee sá ti-Dindaan wiiŋŋu ní. Ní taa nín̄ bí kunimbaaun, kun puee dipɔɔpindi din ti-Dindaan tììyee di sá ti-pɔŋŋu!» 11 Ní Leefii yab bí ki ŋmēentí samaa ki lì yii: «Ní ŋmīĺmaan! Díǹ wiiŋŋu sá ti-Dindaan wiiŋŋu ní. Ní taa nín̄ bímaan kunimbaaun!»

12 Niinee ní samaa kɔkɔ nìn nín kùǹ ki cūtìi jíń ki nyùn̄. Bi nìn tīī biwɔfib mun jíń ní ki ŋá jiŋaakpaan, kun puee bi nìn gbìl̄ tibɔti tin bi sòon̄ nì bee taapu.

Tibìń jiŋaaliu

13 Kutaa wúntèe, Isirayeel dicaŋŋi kpilib nì bisaraaŋaliibi nì Leefii yab kóoǹ ki kpáfì Eesiraasi un nyí Unimbɔti marab tiŋanee cee kí mɔ̀tīí bīfì marabee taapu mmɔntiim. 14 Bi nìn ká marab bin Unimbɔti yāntì Mooyiisi nìn ŋmàn̄ ki tīī-bee poon yii, tibìń jiŋaaliu un bi jīǹ uŋmaluluúti poonee, Isirayeel yab máaǹ kí nīn kóò tibìń poon ní, jiŋaal gbanti wiiŋyi kɔkɔ poon. 15 An puee bi nìn báakì Jeerusaleem timmu kɔkɔ poon yii: «Nyāmaan kí jɔ̄m̀ ajoon pu kí bátímaan ɔliifi un bi kùn̄ee nì un nyáń kumoounee faati nì miirti faati nì tikpakpati nì isufi in cáá tifaapɔnee kí cáań tí gāā tibìń kii an nín ŋmàn̄ puee^a.»

16 Niinee ní samaa nyáń ki cūtìi cáań nsupamu nì tifaal ki gāā tibìń bi-diiŋŋi nyɔkɔpu nì bi-mɔŋkii, nì kunimbɔtidii mɔŋkiŋu nì Inyiŋfi punyɔkɔki paaŋŋu pu, nì Eefiraayiim punyɔkɔki paaŋŋu pu. 17 Bin kɔkɔ nìn kóoǹ ki kpáfì niinee, an dàkà yii bin kɔkɔ nìn nyánní kuyuŋu ki fātìńee nìn gāā tibìń ki kɔ́ ki bí niin. Doooo Nuuni jipɔɔn Joosuwa yuntiŋu ní Isirayeel yab kaa nìn gíti jíń jiŋaal gbanti. An puee bi nìn jíń jiŋaal gbanti ŋkpaamin nì ifaal ní. 18 Kí yòon̄ jiŋaal wimpeekaaŋu kí cáá sāā ŋwinjoolkaa dalee, Eesiraasi nìn pée kàaǹ marab gbɔŋku ní baabadal. Bi jíń jiŋaal gbanti iwiin iluli, ní winnii dalee bi ŋá dikpafikpaandi, kii an nín ŋmàn̄ mara poon puee.