3
Iinandam Ni Juan na Parabunyag so Aagyan
( Mt. 3:1-12; Mk. 1:1-8; Jn. 1:19-28)
1 Sa ikakinsing taon na paghahadi ni Emperador Tiberio, ko si Poncio Pilato a gobernador sa Judea, si Herodes a tetrarkaa sa Galilea, sagkud so ngod man niyang si Felipe amo tetrarka sa Iturea sagkud Traconite, si Lisanias a tetrarka sa Abilinia. 2 Si Anas sagkud Caifas man so manga pinakanamomoon ko manga pagkasaserdote kadto. Ko panawon na adto, so oosipun ka Diyos narungug ni Juan na igin ni Zacarias sadto kalangtadan. 3 Kaya iniyanan niya so manga banwaan na nakapalibot sa Jordan sagkud nagtottoro. “Magsulsul na kamo sagkud magpabunyag tanganing patawarun kamo ka Diyos kana manga kasalan ninyo”. 4 Pareyo sadto nasosorat sa libro ni Propeta Isaias:
“Agko usad na boses na nagbabaoy sa kalangtadan:
'Iandam ninyo a aagyan ka Kagorangnan,
tolidun ninyo a raran para kanya!
5 Tatambonan a manga ababang logar,
papareyowon a bokid sagkud manga kakolodan.
Totolidun a manga tiko-tikong aagyan,
pakakarayun a manga lobak-lobak.
6 Ta mababayad ka ngamin na tawo a pagliligtas na gigibowon ka Diyos.’ ”b
7 Kadakul na tawong nagrapo ki Juan tanganing magpabunyag. Sabi niya kanda: “Kamong manga gikan sa rimoranun! Siisay a nagpatanid kaninyo tanganing makadulag sa kasakitan na omaabot? 8 Ipabayad ninyo sa manga gibo na kamo nagsusulsul. Di ninyo pagsabiyun na kamo makaliligtas ta igin kamo ni Abraham. Sinasabi ko kaninyo, na sa manga batong adi kayang makagibo a Diyos sa tonay na manga igin ni Abraham. 9 Ngowan pa sana nakaanda na a pisaw sa gamot ka kawoy; kada kawoy na diri nagbobonga sa maraay, pupuludun saka isosogba sa kalayo.”
10 Inonga iya ko manga tawo: “Ono po a maraay namung gibowon?” 11 Nagsimbag si Juan: “Kin agko ika darwang bado, itao mo a usad sa uda bado. Amo man a gibowon ka agko manga pagkaun.” 12 Nag-abot man so manga parasingil sa bowis tanganing magpabunyag, sagkud inonga iya: “Maestro, ono po a kaipowan namung gibowon?” 13 Nagsimbag iya: “Diri kamo magsingil sa sobra ka kaipowan ninyong singilun”. 14 Inonga man iya ko manga soldados: “Ono man a kaipowan namung gibowon?”
Nagsimbag niya: “Diri kamo magparaayat kin kiisay man sa paagi ka pamimirit o pagsasawut sa bukung matood. Makontinto kamo ka sweldo ninyo.” 15 So manga tawo nag-uulat na agko paglaom sagkud nag-uuna sira sa kandang poso na si Juan amo na si Cristo. 16 Kaya sinabi ni Juan kanda ngamin: “Bubunyagan ko kamo sa tobig; Alagad agko usad na mas makapangyariyan kanaku na mig-abot, na dawa a sintas ka sandalyas niya di ako angay na mag-alin; bubunyagan niya kamo sa Espirito Santo sagkud kalayo. 17 Kaput niya a pangkagkag tanganing alinun a ragami. Titiponon niya a trigo sa balayan niya; Alagad a manga apa sosoloon sa kalayong di napaparung.” 18 Dakul pang manga bagay so ipinagtottoro ni Juan sa manga tawo manungud ka Maraay na Bareta. 19 Alagad pinagsabiyan niya si Herodes na tetrarka ta sangbay niya so konyadaun niyang si Herodias, sagkud so iba pa niyang manga gibong maraut. 20 Kaya ipinapriso niya si Juan, sagkud nakarogang pa adi sadto manga kasalan niya.
Binunyagan Si Jesus
(Mt.3:13-17; Mk. 1:9-11)
21 Nabunyagan na kadto so manga tawo, sagkud si Jesus nabunyagan naman. Ko nangangadyi iya, naboksan so langit, 22 saka binnaba kanya so Espirito Santo na arug sa usad na kalapati. Usad na boses galin sa langit a nagsabi: “Ika a nabubutan Kong Igin na namumuy'an ko saigo.”
So manga Ginikanan Ni Jesus
(Mt.1:1-17)
23 Migtrayentang taon na si Jesus ko magpoon iyang mangadal. Pag-una ko manga tawo, iya igin ni Jose
Si Matatias na igin ni Levi na igin ni Melki,
si Melki igin ni Jana na igin ni Jose.
25 Si Jose igin ni Matatias na igin ni Amos.
Si Amos igin ni Nahum na igin ni Esli,
na igin ni Matatias. Si Matatias igin ni Semei,
na igin ni Jose. Si Jose na igin ni Juda
27 na igin n Joana, sagkud si Joana igin man ni Resa,
na igin ni Zorobabel na igin ni Sealtiel,
na igin ni Adi. Si Adi igin ni Cosam,
na igin ni Elmadam, na igin ni Er.
29 Si Er man igin ni Josue na igin ni Eliezer,
igin ni Jorin na igin ni Matat,
na igin ni Juda. Si Juda igin ni Jose,
na igin ni Jonam, na igin ni Eliakim.
31 Si Eliakim igin ni Melea, na igin ni Menna.
Si Menna igin ni Matata, na igin ni Natan,
na igin ni Obed, na igin ni Boaz.
Si Boaz igin ni Salmon, na igin ni Naason.
33 Si Naason igin ni Aminadab, na igin ni Admin, na igin ni Arni;
si Arni igin ni Esrom, na igin ni Fares,
na igin ni Isaac, na igin ni Abraham.
Si Abraham igin ni Tera, na igin ni Nacor.
35 Si Nacor igin ni Serug, na igin ni Reu,
na igin ni Peleg, na igin ni Heber,
na igin ni Arfaxad. Si Arfaxad igin ni Sem,
na igin ni Noe. Si Noe igin ni Lamec,
37 na igin ni Matusalem. Si Matusalem igin ni Enoc,
na igin ni Jared, na igin ni Mahalaleel,
na igin ni Set. Si Set igin ni Adan,
na igin sa Diyos.