2
Ipinangigin Si Jesus
(Mt. 1:18-25)
1 Ko panawon ni Emperador Agosto, nagpalowas iya sa ordinansa na so ngamin na nasasakupan ko Roma magparestro. 2 Amo adi a onang pagpaparestro na ginibo, ko si Quirino a Gobernador ko Siria. 3 Kaya so kada usad nagpaoli sadto kandang sadiring banwaan tanganing magparestro.
4 Galin sa Nazaret, Galilea, si Jose nag-iyan sa Betlehem, Judea, banwaan ni Hading David na ginikanan niya. 5 Kaiba niyang innoli si Maria tanganing magparestro na kanyang mapangangagom, na kadto madali nang mangigin. 6 Ko sadto na sira, nag-abot so oras na pingngigin ni Maria. 7 Ipinangigin niya a kanyang gorang na igin sagkud adi lalaki. Pinotos niya so igin sagkud ibinutang sa babawgan ta uda na logar para kanda sadto paarkilaan.
So Manga Paraataman sa Karnero sagkud So Manga Anghel
8 Arani sadto logar na adto agko manga paraataman sa karnero sadto pasabsaban na magramrag na nagbabantay ko manga karnero nira. 9 Dali-dali na sanang nagpabayad sa atobangan nira so usad na anghel ko Kagorangnan sagkud naluyap sa nakasosolang liwanag so kapalibotan; sagkud nakatakot sira sa maraay. 10 Alagad sinabiyan sira ko anghel: “Diri kamo makatakot, ta agko ako darang maraay na bareta para kaninyo na migtao sa dakulung kamuy'an sa ngamin na tawo. 11 Ta namundag ngowan sa banwaan ni David a kaninyong paraligtas, si Cristo na Kagorangnan. 12 Amo adi tanda para kaninyo: matotorakan ninyo a usad na igin na napopotos sagkud nakabatang sa usad na babawgan.”
13 Dali-daling linnutuw sadto kaabay ko anghel so malaka dakul pang manga anghel na galin sa kalangitan na nag-oomaw sa Diyos sagkud sinnabi:
14 “Omawun a Diyos sa kaitaasan
sagkud sa raga katoninungan sa manga tawong nabubutan niya.”
15 Ko makagalin na so manga anghel paiyan sadto langit, so manga paraataman sa karnero nangag-osip-osip: “Mag-iyan kita sa Betlehem! Baydun ta so manga nangyari na ibinareta kanatu ko Kagorangnan.” 16 Kaya nagdali-dali sirang nag-agi paiyan sa banwaan, sagkud natorakan nira si Maria sagkud si Jose kaiba so igin na nakabatang sa babawgan. 17 Ko mabayad nira so igin inistorya nira so sinabi ko anghel manungud ka igin na adi. 18 So manga nakarungug nagngalas sadto sinabi ko manga paraataman sa karnero. 19 Pinagsabuut ni Maria so manga bagay na adto sa poso niya sagkud pinag-urup-urup. 20 Naggalin so manga paraataman sa karnero na nag-oomaw sa Diyos sagkud nagpapaayag ko kanyang karayan manungud ko ngamin na narungug nira sagkud nabayad arug ko ibinareta kanda ko anghel.
Dinara si Jesus sadto Templo
21 Pag-abot ko ikawalong alduw, tinori so igin sagkud nginaranan sa Jesus, a ngaran na itinao ko anghel bago pa iya ipangigin.
22 Ko omabot na so alduw sa paglinig ki Jose sagkud Jesus,a sigon sa Layi ni Moises nag-iyan sira sa Jerusalem dara so igin tanganing iatang sa Kagorangnan, 23 ta sabi sa Layi ka Kagorangnan: “A kada gorang na igin na lalaki nakatagama na sa Kagorangnan,” 24 tanganing mag-atang sira arug ka sinasabi sa Layi ka Kagorangnan, mag-agom na kalapati o darwang hobin na agbaan.b 25 Agko usad na tawo kadto sa Jerusalem na a ngaran Simeon; iya maraay sagkud banal a lalaking adi na nag-uulat ka kaligtasan ka Israel. Isan kanya a Espirito Santo. 26 Na nagpaayag kanya na diri iya migraan anggan na diri niya nababayad a Paraligtas na ipinanoga ka Kagorangnan. 27 Sa pangongona ka Espirito Santo nagluug iya sa templo. Ko darawun sadto ko manga kag-igin so igin na si Jesus tanganing gibowon so inaayat ko Layi. 28 Kinarga iya ni Simeon sagkud itinaas, saka nag-omaw iya sa Diyos na a sabi:
29 “Ngowan togotan mo nang magraan a oripun mo, Kagorangnan,
sigon ko kanimong ipinanoga,
sa katoninungan;
30 mantang nabayad na ka manga mata ko a kanimong pagliligtas
31 na iinandam mo sa atobangan ka ngamin na tawo,
32 magigin liwanag adi ka manga bukung Judio
saka migtao sa kaomawan ka kanimong banwaan na Israel”.
33 Napangalas si Jose sagkud si Maria sadto manga sinabi ni Simeon manungud kanya. 34 Binindesyonan sira ni Simeon sagkud sinabi ki Maria: “Tandaan mo, a igin na adi nakatagama sa ikakapaamak sagkud ikaliligtas ka kadaklan sa Israel, sagkud usad na tanda galin sa Diyos, na pigtoya-toyaun ka kadaklan. 35 Kaya mababayad a kandang iniisip. Sagkud a poso mo bagana man sana pinagtotosok sa usad na sondang.”
36 Isadto man templo so usad na propetang babayi, na a ngaran A, igin ni Fanuel, sa tribo ni Aser. Malana niya ka gorang; pitong taon sana sirang nag-iba ko agom niya, 37 ko iya mabalo. Kaya ngowan otsenta e kwatro anyos nayya. Pirmi iya sadto templo alduw gab'i nag-oomaw sa Diyos sa paagi ka pag-aayono sagkud pangangadyi. 38 Ko oras na adto nagpasalamat iya sa Diyos. Nag-osip man iya manungud ki Jesus sa ngamin na nag-uulat sa pagtobos ka Diyos sa Jerusalem.
Pag-oli sadto Nazaret
39 Ko magibo na ko manga kag-igin ni Jesus so ngamin na bagay sigon ko Layi ka Kagorangnan, nagpaoli na sira sa kandang banwaan sadto Nazaret, Galilea. 40 So igin nagdakulung makusug, pono sa kadonongan; sagkud maraay sa atobangan ka Diyos.
A Igin na si Jesus sa Luug ko Templo
41 Taontaon, pagpipyista ka Paskua so manga kag-igin ni Jesus mag-iiyan sa Jerusalem. 42 Ko doseng taon na iya nag-iyan sira sadto arug ko dati nirang ginigibo. 43 Pagkatapos ko piyesta, napaoli na sira, nagpatagak si Jesus sa Jerusalem, alagad diri namangno ko manga kag-igin niya. 44 Pag-una nira kaiba iyang napaoli, nagpadagos sira sa maggapon na pagbabaklay, ko maisiyan na diri iya kaiba inanap iya sadto manga kapipinsanan sagkud manga kabisto. 45 Diri nira iya natorakan, kaya nagbalik sira sa Jerusalem tanganing anapun iya. 46 Ko ikatlong alduw na, natorakan si Jesus na nakaula sadto templo na kaiba ko manga paratottoro, nag-iirungug kanda sagkud nag-oonga. 47 So ngamin na nakarurungug kanya nagngalas ko kadonongan niya. 48 Ko matorakan iya ko manga kag-igin niya, nangalas sira, sagkud sinnabi kanya so kanyang ina: “Igin, ngata ta arug man kan a ginibo mo kanamu? Diri kami napamumutang sa kaaanap kanimo!” 49 Sinnimbag iya: “Ngata ta pigpaparaanap ninyo 'ko? Diri ninyo isi na kaipowan na nasa baluy ako ka kanakung Ama?” 50 Kindi diri nira naintindiyan so sinabi niyang adto.