A Maraay na Barita Galin ki
Lucas
1
Kapinonan
1 Malana po kadakul ka nag-ingoa na magsorat ko manga bagay na nangyari sadi kanamu. 2 Arug ko manga isinorat kanamu ko manga nakabayad sagkud ko manga minandaan na ipangadal so Oosipun ka Diyos. 3 Kaya, magin a sadiri ko maigut kong pinag-adalan a ngamin na bagay poon sa kapinonan sagkud pinagmaraay kong isorat so pasonod-sonod na nangyari para kanimo, kagalang-galang na Teofilo, 4 tanganing maisiyan mo a kamatoran ka manga bagay na naitottoro na kanimo.
A Pagpapaayag ka Ipingngigin na si Juan na Parabunyag
5 Ko si Herodes amo hadi sa Judea, agko usad na saserdote na a ngaran Zacarias, kaiba sa gropo ni Abias, a kanyang agom si Elisabet na gikan ki Aarona. 6 A mag-agom na adi malangraay sa pagsilung ka Diyos, ta sinosonod nira so ngamin na layi sagkud so pagbuut niya. 7 Uda sira igin ta baog si Elisabet sagkud pareyo na sirang gorang.
8 Ko panawon na adto, so gropo ni Zacarias amo nanungran bilang saserdote na magserbi ki Amang Diyos. 9 Sigon sa pinagtuturan ko manga saserdote napili iya na magsobsob ko kamangyan kaya linnuug iya sadto templo ko Kagorangnan. 10 Ko nagsosobsob na iya ko kamangyan, malakadakul ko manga tawong nagsasamba sagkud nangangadyi sadto lowas.
11 Pangala, nagpabayad kanya so anghel ko Kagorangnan na nagtitindug sa toong parte na pinagsosobsoban sa kamangyan. 12 Ko nabayad ni Zacarias so anghel, nasindakan iya sa maraay sagkud nakatakot. 13 Alagad sinabiyan iya ko anghel: “Diri ika makatakot, Zacarias, ta so pangadyi mo narungug na. Kaya a agom mong si Elisabet mingngigin sa lalaki na ngangaranan mong Juan. 14 Magiging kaogmaan iya sagkud kamuy'an kanimo, sagkud dakul na tawo man a mig-ogma ka pagkamundag niya, 15 ta iya magigin maraay sa pagsilung ka Kagorangnan. Diri iya mig-inom sa alak o onoman na inomon na nakaboborat. Sa boros pa sanayya ka kanyang ina pinangongonaan na iya ka Espirito Santo. 16 Panonombalikun niya a malakadakul na Israelita sa Kagorangnan na sa kandang Diyos. 17 Maoonayya sa Kagorangnan, na agko kapareyong espirito sagkud kapangyariyan na arug ki Propeta Elias, tanganing pag-usadun a manga kag-igin sagkud manga igin, sagkud pabalikun sa raran ka karayan a manga kusung tanganing iandam a banwaan ka Kagorangnan.” 18 Si Zacarias nag-onga sadto anghel: “Paono ko masisigoro na mingyari adi? Ta a kanakung agom sagkud ako gorang na.” 19 So anghel nagsimbag: “Ako si Gabriel. Pirming nakatindug sa presensiya ka Diyos, pinaiyan ako sadi tanganing iatud kanimo a Maraay na Bareta. 20 Poon ngowan diri ika makangangabil sagkud ka alduw na mangyari adi, ta diri ika nagtobod ka sinasabi ko, na adi mingyari ka tamang panawon.”
21 Mantang nag-uulat so dakul na tawo ki Zacarias, nagngalas sira ta lang uban niya sadto luug ko templo. 22 Ko linnowas nayya, di iya makapagngabil kaya nagpasabot na sana. Kaya naintindiyan ko manga tawo na agko ipinabayad kapaayagan kanya a Diyos sadto luug ko templo.
23 Ko tapos na so panawon ko pagserbi niya, napaoli nayya. 24 Pagkatapos kadto, so agom niyang si Elisabet nagmabrus sagkud sa luug sa limang bolan nagtago iya. 25 Nagsabi si Elisabet: “Ngowan kinaerakan ako ka Kagorangnan ta inalin niya ako sa kasusupgan”b.
So Pagpaayag ka Ipingngigin na si Jesus
26 Ko ikaunum na bolan ko pagmabrus ni Elisabet, iminanda otro ka Diyos si Anghel Gabriel sa Nazaret na usad na banwaan sa Galilea, 27 na agko bareta sa usad na birhen na a ngaran Maria. Iya naitoga nang ikasal sa usad na lalaki a ngaran Jose, na galin sa pamilya ni Hadeng David. 28 So anghel rinnapo ki Maria sagkud nagsabi: “Paladan ika sa ngamin na babayi, ta a Kagorangnan isiton kanimo!”
29 Naribaraw sagkud nangalas si Maria kin onong klasing pagsisino adto. 30 Alagad sinabiyan iya ko angel: “Diri ika makatakot, Maria, ta namumuy'an ika ka Diyos. 31 Mingngidam ika sagkud mingngigin sa lalaki, sagkud ngangaranan mong Jesus. 32 Mababantog iya saka babaoyon na Igin ka Kaoroalangkawing Diyos. Itatao kanya ka Kagorangnan tang Diyos a trono ko ginikanan niyang si Hading David, 33 mighadi iya sa Israel sagkud pa man; ta a kahadian niya uda kasagkuran.”
34 “Paono mingyari yan,” onga ni Maria ko anghel: “ta birhen pa 'ko?” 35 Sinnimbag so anghel: “A Espirito Santo mapapakanimo sagkud a kapangyariyan ka Kaoroalangkawing Diyos lilindongan ika. A ipingngigin mo banal sagkud babaoyon na Igin ka Diyos. 36 Maski si Elisabet na pinsan mo na nabantog na baog, mingngigin man maski malana kagorang, ngowan unum na bolan nang mabrus. 37 Ta uda imposible sa Diyos.”
38 Sinnimbag si Maria: “Lingkod ako ka Kagorangnan, mangyari logod a sinabi mo.” Sagkud binayaan na iya ko anghel.
Binisita ni Maria si Elisabet
39 Ko panawon na adto si Maria nagmamadaling napaiyan sa usad na banwaan sa kakolodan ka Judea, 40 na kin sari si Zacarias nag-iistar. Pagkatapos linnuug si Maria sadto baluy sagkud nagtaonggalang. 41 Ko marungug ni Elisabet so pagtaong galang ni Maria, inniwag so igin sadto boros niya sagkud napospos iya sa kapangyariyan ko Espirito Santo. 42 Naparait iya ko sobrang kamuy'an, sagkud sinnabi: “Paladan ika sa ngamin na babayi sagkud a kanimong ipingngigin! 43 Siisay akong bibisitawun ka kag-igin ka kanakung Kagorangnan? 44 Ta pagkarungug ko pagtaonggalang mo, inniwag so igin sadi boros ko sa kamuy'an. 45 Paladan ika ta tinnobod ika na mingyari a ipinasabi kanimo ka Kagorangnan!”
A Kanta ni Maria
46 Sagkud nagsabi si Maria:
“A kalag ko nag-oomaw sa Kagorangnan
47 sagkud a kanakung espirito namumuya sa Diyos na kanakung Paraligtas,
48 ta narumruman niya
ading alang-alang na mamandaan.
Kaya magpoon ngowan a ngamin na henerasyon babaoyon akong paladan,
49 ta a Makapangyariyan ginnibo sa dakulung bagay kanaku-
Banal a kanyang ngaran!
50 A kanyang pagkaerak ipinabayad niya sadto manga agko pagkatakot kanya,
sa ngamin na henerasyon.
51 Ipinabayad niya so kusug ko kanyang kapangyariyan;
alagad itinaas a manga mapagpakombaba.
53 Binosog niya sa manga maraay na bagay so manga nag-aalup,
sagkud isinobol na uda basang dorodara so manga mayaman.
54 Tinabangan niya a kanyang banwaan na Israel,
sa pagrumrum ko kanyang panoga
55 ki Abraham sagkud ko kanyang manga ginikanan sagkud pa man,
pareyo ko sinabi niya sadto kanatung manga kag-igin.”
56 Nag-istar pa si Maria sadto kanda ki Elisabet sa tolong bolan, saka napaoli.
Ipinangigin si Juan na Parabunyag
57 Innabot na so oras ko pangigin ni Elisabet sagkud namundag so igin na lalaki. 58 Narungug ko kanyang manga pag-abayan saka ko manga erinsya niya na a Kagorangnan naerakan iya, kaya so ngamin nakipag-ogma kanya.
59 Ko ikawalong alduw na napaiyan sira ko pagtori ko igin, sagkud gosto nirang Zacarias man a ingaran pareyo ko ama,
60 alagad sinnabi ni Elisabet: “Buku! Juan a ingangaran kanya.” 61 Sinnabi man sira: “Uda pa basang ni usad sa kaninyong manga erinsya na agko arug kan na ngaran.”
62 Kaya pinasabotan nira si Zacarias tanganing maisiyan kin ono gostong ingaran ko igin. 63 Innayat iya sa sosoratan sagkud napangalas sira ngamin ko isinorat: “A ngaran kiton Juan.” 64 Kadto mismo si Zacarias nakangabil na otro saka nag-omaw iya sa Diyos. 65 Nakatakot so kandang manga pag-abayan, kaya pinag-osip-osipan sa intirong kakolodan sa Judea ading manga bagay na adi. 66 Nagngalas so kada usad na nakarungug kadi, kaya nag-orongaan sira: “Ono raw a mingyari ka igin na adi? Ta a kapangyariyan ka Diyos isan kanya.”
A Propesiya ni Zacarias
67 So kag-igin niyang si Zacarias, napospos ko Banal na Espirito, nagpropesiya sa arug kadi:
68 “Pag-omawun a Kagorangnan, a Diyos ka Israel,
ta iya innabot sagkud binalokat a kanyang banwaan.
69 Nagpadara iya kanatu sa usad na Makapangyariyan na Paraligtas,
na galin sa erinsya ka mamandaan niyang si David.
70 Nanoga iya sa paagi ko kanyang banal na propeta ko onang panawon
71 na ililigtas kita niya sa kanatung manga kasogot,
sagkud sa kamut ka manga nauungut kanatu:
72 tanganing ipabayad so pagkaerak niya sadto kanatung manga ginikanan,
sagkud rumrumun so kanyang manga banal na ipinanoga;
73 amo yan so panogang itinao niya ki Amang Abraham,
74 na ililigtas kita sa kamut ka kanatung manga kasogot,
tanganing makapagsirbi kita kanya na uda katakotan
75 tanganing magin banal kita sagkud maraay sa pagsilung kana Diyos, anggan na kita naboboway.
76 Ika man igin ko, babaoyon ikang propeta ka Kaoroalangkawing Diyos:
ta maoona ika sa Kagorangnan tanganing iandam mo a kanyang aagyan,
77 saka itotottoro sa kanyang banwaan kin paono nira matotorakan a kaligtasan,
sa paagi ka kapatawaran kana kandang manga kasalan,
78 ta sa sobrang pagkaerak kana Kagorangnan,
pasisirangun kanatu a alduw ka kaligtasan;
79 tanganing magtao sa liwanag sa nangingit-ngitan,c sagkud sa manga nasa lindong ka kagranan,
sagkud ibanan kita paiyan sa katoninungan.”
80 Nagdakulu si Juan sagkud nagin makusug so kanyang espirito; sagkud nag-istar iya sadto kalangtadan, anggan sa nagpabisto iya sa Israel.