4
So Pagtintar ki Jesus
(Mt. 4:1-11; Mc. 1:12-13)
1 Naggalin si Jesus sa Jordan, na pinangongonaan ko Espirito Santo. Sagkud dinara iya sa kalangtadan. 2 Sa luug ko kwarentang alduw tinintaran iya ko demonyo. Di iya nagkaun ko panawon na adto kaya malana niya ka alup.
3 Sinabi kanya ko demonyo: “Kin ika Igin sa Diyos, imanda mo sa manga batong adi na magin tinapay.” 4 Sinnimbag si Jesus: “Nasosorat: 'Buku sana sa tinapay naboboway a tawo.' “
5 Dinara iya ko demonyo sa usad na malang langkaw na logar, pangala ipinabayad kanya so ngamin na kahadian sadi kinaban. 6 Sagkud sinabi niya kanya: “Itatao ko kanimo a ngamin na kapangyarihan sagkud kamorawayan na adi, ta itinao na di kanaku sagkud maitatao ko man sa siisay na gosto kong tawan. 7 Kaya kin ako sasambawun mo, magiging kanimo adi ngamin.” 8 Sinnimbag si Jesus: “Nasosorat: 'Sambawun mo a Kagorangnan mong Diyos, sagkud iya sana a paglingkoran mo.' “a
9 Sagkud dinarayya ko demonyo sadto toktok ko templo ko Jerusalem, pangala sinabi kanya: “Kin ika a Igin sa Diyos, tomalon ika; 10 ta nasosorat: 'Itotogon niya sa manga anghel na bantayan ika, 11 sagkud sasalowon ika nira, tanganing di ika maugsak sa bato.' “
12 Kindi sinimbag iya ni Jesus: “Nasosorat: 'Diri mo pagporbaran a Kagorangnan mong Diyos!' “
13 Pagkatapos iyang sogtan ko demonyo sa ngamin na paagi, adi naggalin na sagkud nagulat sa ibang panawon.
Pinonan ni Jesus so Gigibowon Niya sa Galilea
14 Napaoli na si Jesus sa Galilea, na agko kapangyariyan ko Espirito Santo, nagluyap sa ngamin na logar so bareta manungud kanya. 15 Nagtottoro iya sadto manga sinagoga sagkud inomaw iya ko ngamin.
Diri Inako si Jesus sa Nazaret
(Mt. 13:53-58; Mk. 6:1-6)
16 Napaiyan si Jesus sa Nazaret na amo niya pinagdakul'an. Arug ko dati niyang nakaosowan, nagluug iya sadto sinagoga ko Alduw sa Pagpapaingalo sagkud tinnindug tanganing magbasa. 17 Itinao o libro ni Propeta Isaias sagkud binoksan niya sadto upud ko kinasosoratan sa arug kadi:
18 “A Espirito ka Kagorangnan sadi kanaku;
ta pinili niya ako na
ipangadal a Maraay na Bareta sa manga pobre,
iminanda niya ako tanganing sabiyun sa manga priso na sira makalolowas na
sagkud so manga bota makababayad,
sagkud tawan sa katoninungan so manga nasasakitan,
19 sagkud ipaisi a taon na a Kagorangnan, ililigtas a kanyang banwaan.”b
20 Pagkatapos niyang basawun, linolon niya so kasoratan sagkud isinolit sadto nagtao kanya, sagkud innula nayya, na nakatiurung kanya so ngamin na tawo sadto sinagoga. 21 Sinabi niya kanda: “Ngowan na alduw nangyari a parteng adi ka kasoratan mantang nag-iirungug kamo.”
22 Pinag-omaw iya ko ngamin sagkud nagngalas sira ko magayon niyang manga oosipun sagkud sinnabing: “Bukung amo di so igin ni Jose?”
23 Kaya sinabi ni Jesus: “Diri kamo masasalang sabiyun kanaku a kasabiyan na adi: Parabolong, bolongon mo a sadiri mo; gibowon mo sa sadiri mong logar so manga nababaretaan namung ginibo mo sa Capernaum.”
24 “Sinasabi ko kaninyo a kamatoranan,” padagos niya: uda propeta na aakoon sa sadiri niyang banwaan. 25 Sinisigoro ko kaninyo: kadakul ko babaying balo sa Israel ko kapanawonan ni Elias, ko di innoran sa luug ko tolong taon ikabanga sagkud nagkaagko grabing pagtius sa bilog na logar. 26 Alagad bukung kiisay pa man kanda pinaiyan si Elias, kindi sa usad na balo na bukung Judio sa Sarepta sa karagaan ko Sidon. 27 Sa kadaklan ko manga pudpurun sa Israel ko kapanawonan ni Eliseo, uda basang pinaraay ni usad kanda. Kindi si Naaman sana na bukung Judio na taga Syria.”
28 Kamga nauungut sa biyo ko manga tawo sadto sinagoga ko marungug nira adto. 29 Nagpantindug sira sagkud ginodgod si Jesus palowas sa banwaan sagkud dinara sadto itaas ko kolod na kin sari so banwaan nakatogrok, tanganing iolog sa bangin. 30 Kindi innagi iya sadto bitnga ko manga tawo sagkud naggalin na.
So Lalaking Nasaniban sa Maraut na Espirito
31 Galin sadto, si Jesus nag-iyan sa Capernaum sagkud nagtottoro iya sa manga tawo ko Alduw sa Pagpapaingalo. 32 Nagngalas sira ko pinagtotottoro niya, ta agko kapangyariyan so manga pinagngangabil niya.
33 Agko sadto sinagoga usad na lalaking nasaniban sa demonyo. Inniyak iya sa malang kusug: 34 “Ono labut mo kanamu, Jesus na taga Nazaret? Nag-iyan ika sadi tanganing rautun kami? Isi ko kin siisay ika: ika a Banal na galin sa Diyos!”
35 Alagad pinagsabiyan iya ni Jesus: “Pomondo'y ka! Lomayas ika sa tawong an!” Sagkud sa atobangan ko ngamin na tawo pinatomba ko demonyo so lalaki, sagkud naglowas sadto na di basang naaprusan.
36 Nagngalas so ngamin saka nag-osip-osip sa kada usad: “Onong katottoroan adi? Makapangyariyan sagkud epektibo, pinapalayas niya a maraut na espirito sagkud nagsosonod man sira!” 37 So bareta manungud ki Jesus linnuyap sadto interong logar na adto.
Pinaomayan ni Jesus so Kadakul na Tawo
(Mt. 8:14-17; Mk. 1:29-34)
38 Ginnalin si Jesus sa sinagoga saka nag-iyan sa baluy ni Simon. So panogangan na babayi ni Simon kalintorado sa maraay. Kaya pinakiosipan nira si Jesus na paomayan iya. 39 Tinnindug si Jesus sadto kaabay ko batangan ko babayi, sagkud minandaan niya so kalintora na maggalin sagkud nauda mananggayud na, nagtindug tolos so babayi sagkud nagsirbi kanda.
40 Pagsulnud ko alduw, dinara ko manga amigo nira so ngamin na agko namamatean na ilang ki Jesus. Irinuta ni Jesus so kamut niya sa kada usad sagkud pinaomayan sira. 41 Nagpanlowas so kadakul na manga demonyo, sabay iyak: “Ika so Igin ka Diyos!” Alagad dinawuy sira ni Jesus sagkud di tinogotang magngabil ta isi nira na iya so Mesias.
Nagtottoro si Jesus sa Judea
(Mk. 1:35-39)
42 Ko mararamrag na, naggalin si Jesus sagkud nag-iyan sa kalangtadan. Inanap iya ko manga tawo sagkud ko matorakan iya pinakiosipan na di ngona maggalin. 43 Alagad sinabi niya kanda: “Kaipowan ko man na itottoro sa ibang banwaan a Maraay na Bareta manunungud sa paghahadi ka Diyos, ta amoyan katoyowan ka pagkamanda kanaku.” 44 Kaya nagtottoro iya sadto manga sinagoga ka Judea.