Kusābhulwa kweke Sauli
9
Mu mafuku ghaagho, Sauli akabheele ghakasūpika bhantu nalikubhala kubhehagha bhahemba bheke Sifwe Bhusya Jheesu. Ifuku limwi ghakajhanga kwa mupeesi mukulu,a 2 ghasōna lupapulo lwa kumulānsya akulinga ajhe mu nyumba sya kusangaanilamo Bhajhahudib ^sikabheele mu lugho lwa Damesiki. Ghakēlanga teetyo akukabha kubha ghabhasangana bhali mu jheejhyo Nsīla jhyeke Jheesu, bhakeema ku bhaghoosi, abhanīghe abhalente ku Jhelusalemu.3 Tukubha, nali mu nsīla kwihi na ku Damesiki, ghapampamuka nali mwi ilangaasi kufuma mwi ighūlu lyamulafisya honse. 4 Kundi ghaghwa hansi, ghahulika silongo kubhala, “Sauli, Sauli, kusi ulikumbunusya?” 5 Sauli ghabhasya, “Ee Taata Bhusya, ughwe uli ghanyi?” Silya silongo syabhala, “Une ndi Jheesu ghone ulikumbunusya. 6 Nonwe bhuuka ujhingile mu loolo lugho, kooko kuli muntu alokutānyisya bhwakwīla.” 7 Bhantu ^bhakabheele naajhe lwēndo lumwi, bhahumbula nakele bhukohela bhakahulikanga silongo, tukubha tebhakamulōlanga ^akabheele nalikutenda. 8 Sauli ghabhuuka hansi, ghasinsuka menso ghaajhe akūnge, tukubha teghakakobholanga kulōla sintu syosyonse. Haaho bhamunīgha ku kubhoko, bhaajha naajhe mpaka ku Damesiki. 9 Sauli ghakēkalanga nfuku itatu nali muhofu, bhusila kulya kokonse, ajhe kunywa syosyonse.
10 Kooko ku Damesiki kukabheele muhemba ghumwi, ^akabheele najhitilwe Anania. Sifwe Bhusya ghamulānsya filōli, ghaabhala, “Anania!” Anania ghajhitabhuka, “Ndi hanu Taata Bhusya.” 11 Sifwe Bhusya ghamulomba ghaabhala, “Kajhe mu nyumba jhyeke Jhuuda, jhili mu nsīla jhijhitilwe Ngololoke, ukabhasye mu jheejhyo nyumba muntu ajhitilwe Sauli ghwa ku Taaso. Bhukohela nonwe bhoobhu alikutendajhyuka. 12 Ghoogho Sauli mu filōli, ghamulōla muntu ajhitilwe Anania nalikwingila mu nyumba jhyalimo, ghamughambikako mabhoko akulinga menso ghaajhe ghasumbule kulōla kabhili.” 13 Tukubha Anania ghahindula ghaabhala, “Ee Taata Bhusya, nankahulika mpunda sya ghoogho muntu ku bhantu bhengi. Maghāmbo ghonse mabhi gho alikukola ku bhahemba bhoobhe bha ku Jhelusalemu. 14 Bhwalelo ghajhisa no kunu ku Damesiki ali na malaghi gha kufuma ku bhapeesi bhakulu kubhajhīghalila bhonse bhakwisighile ughwe.” 15 Tukubha Sifwe Bhusya ghamulomba Anania ghaabhala, “Ughwe kajhe, bhukohela ghoogho ni sibhya sya kumwane syonankahala, atangaasye isiina lyane mu bhantu bhasili Bhajhahudi no mu bhaami bhaabho no ku Bhajhahudi bheene. 16 Une nenyene nankumulānsya bhwalakulijhyukila isiina lyane.”
17 Kundi Anania ghaajha mu jhilya nyumba, ghajhingila mukati. Ghaghambika mabhoko gha kumwajhe kwa Sauli, ghaabhala, “Hulikisya Sauli, Taata Bhusya Jheesu nyene ^ghakakwisilanga noli mu nsīla, ghandaghila kumoobhe akulinga usumbule kulōla kabhili, uheebhwe Mwēgho Mulafu ghweke Kabhumba.” 18 Haaho na haaho fyahona fintu kobhe mapamba kufuma mu menso gheke Sauli, menso ghaajhe ghasumbula kulōla kabhili. Ghajhughalala, ghabhatisibhwa. 19 Mukubha ghahwa kulya, ghapāta managha.
Sauli alikutangaasya Ighāmbo lyeke Kabhumba ku Damesiki
Sauli ghakēkalanga na bhahemba bheke Jheesu bhakabheele ku Damesiki kobhe nfuku singana. 20 Kusumbulila haaho, ghasumbula kubhalāngulula bhantu mu nyumba sya kusangaanilamo Bhajhahudi kubhala ti Jheesu gho Mwana ghweke Kabhumba. 21 Bhantu bhonse bhakamuhulikanga Sauli bhalikosa mahi, bhabhala, “Teeti, ghooghu muntu ti gho ghulya ^akabheele nalikubhasūpika nkana bhahemba bheke Jheesu ku Jhelusalemu? Ne leelyo gho lyakamulentanga hanu, abhanīghe bhahemba bhonse bheke Jheesu, abhafele ku bhapeesi bhakulu!” 22 Sauli ghabha na managha, ghajhililika na mulīmo ghwa kulāngulula. Bhajhahudi ^bhakabheele ku Damesiki bhabhulwa ha kusumbulila kughatuna ghwakabheele nalikutenda. Ghabhatembekesesya bhantu kubhala ti Jheesu gho Muhosya.c 23 Syalikahita nfuku singi, Bhajhahudi bhajhīkala kalimbo ka kuhensa kumujhihagha Sauli. 24 Nfuku syonse bhufuku ne isyubha tebhamubhwelamila ha musīgho ghwa lugho. Tukubha fyonse fyobhakajhīkalanga kalimbo ka kumujhihagha, ghafihulika. 25 Ifuku limwi bhufuku bhahemba bhaajhe bhamutwala, bhamubhiika mwi ikapo ikulu, bhamusoosya kuhitila mwi ihoolo ^likabheele ku lukande.
Sauli alikuheleela ku Jhelusalemu
26 Sauli bhoghakafīkanga ku Jhelusalemu, ghakalingisyanga kwipampika ku bhalya bhahemba bheke Jheesu. Tukubha bhonse bhamughubhaha, bhukohela tebhakabheele bhatembekeesye kubha ti Sauli naagho ni muhemba ghwajhe fyene ghweke Jheesu. 27 Kundi Bhalinaabha ghamutwala Sauli, ghaajha naajhe kwa mintengwe, ghabhalomba bhuli Sauli bhoghakasangaananga no Jheesu mu nsīla, no bhuli Jheesu bhoghakasāhulanga naajhe. Ghakabhalombanga bhuli Sauli bhwakabheele nalikutangaasya ku managha Ighāmbo lyeke Kabhumba ku Damesiki. 28 Haaho Sauli ghajhīkala nabho, bhakolela kumwi, ghatangaasya ku managha isiina lyeke Jheesu honse mu Jhelusalemu ku bhusimu. 29 Akabheele nalikusāhula ghanatensanyia nabho Bhajhahudi ^bhakabheele bhatenda Sijhunani, tukubha bheene bhakabheele bhalikuhensa kumwihagha. 30 Bhalya bhenaajhe bhakabheele kumwi naajhe bhobhakabhanga bhamānya bhoobho, bhamufela Sauli ku Kalisaalia, kafumilo ka haaho bhamufela mu lugho lwa Taaso. 31 Mafuku ghaagho milēgha jhyonse jhya bhahemba bheke Jheesu ^bhakabheele mu Jhudea, ku Ghalilaajha no ku Samalia bhabha na maholo. Bhahemba bhonse bhaajha bhujhakumwi, bhamujhimbika Sifwe Bhusya Jheesu, bhabha na managha gha Mwēgho Mulafu, bhaghungilika nkana.
Kusila kweke Alinea
32 Petelo mu nyēndo syajhe ^syakabheele nalikujha kooku no kooku, ghakabhajhumbilanga na bhahemba bhandi ^bhakabheele bhajhīkeele ku Liida. 33 Kooko ghamusānga muntu ghumwi ajhitilwe Alinea, ghoogho akabheele na ndwala jhya ighōnde. Ku myaka munane tyakabheele ghabhuuka hwaleele. 34 Petelo ghamulomba, “Alinea, Jheesu Kiliisito alikukusisya, bhuuka ughānse bhulīli bhoobhe.” Haaho na haaho Alinea ghabhuuka. 35 Bhekasi bhonse bha ku Liida no ku sihugho sya Saloni ^bhakamulōlanga Alinea nalwele, bhanamulōla no bhoghasila nalikulyāta, bhamwisigha Sifwe Bhusya Jheesu.
Petelo alikumusyula Tabhita
36 Hakabheele mwanamukeema ghumwi mu lugho lwa Jhyafa, isiina lyajhe Tabhita,d ajhe Dolikasi, gho kubhala ti kasya. Akabheele muhemba ghweke Jheesu. Ghoogho akabheele muntu ghwa nsansa no kujhemeeta bhantu. 37 Mafuku ghaagho Tabhita ghalwala, ghasumaalika. Bhantu bhaghujhōojhya ghulya mutūmba, bhaghubhiika kukati mu nyumba jhya kapungu. 38 Bhukohela lugho lwa Jhyafa telukabheele hale no lugho lwa Liida, bhahemba bhobhakahulikanga ti Petelo ali ku Liida, bhalaghiila bhantu bhabhili kumwajhe bhakamulebhelesye kubhala, “Tulikukusēegha ujhise nositindi.” 39 Kundi Petelo ghalōndekana nabho, mukubha ghafīka bhamufela ku kapungu kulya kukati. Kooko bhajhisa bhalekwa bhengi bhamulibhisya Petelo bhalikulīla, bhalikumulānsya nkanjo ne myenda jhindi jhyakabheele nalikulanda Dolikasi nasyali bhupanga. 40 Petelo ghabhafumya kunse bhonse ^bhakabheeleko kukati, kundi ghasukama ghatendajhyuka kwa Kabhumba, ghaghujhelekela ghulya mutūmba ghaabhala, “Tabhita, bhuuka.” Tabhita ghasinsuka menso ghaajhe, bhoghakabhanga ghamulōla Petelo, ghajhīkala. 41 Petelo ghamunīgha ku kubhoko ghamubhuusya, kundi ghabhajhita bhalya bhalekwa kumwi na bhandi bhahemba, ghamukabhisya kumwabho nali bhupanga. 42 Seesyo mpunda syakwila honse mu Jhyafa, bhantu bhengi bhamwisigha Sifwe Bhusya Jheesu. 43 Kafumilo ka haaho Petelo ghajhīkala nfuku singi ku Jhyafa nali ha lugho ha Simoni mujhōjhya nsabha.