Petelo no Kolonelio
10
Hakabheele muntu ghumwi mu lugho lwa Kalisaalia ^akabheele najhitilwe Kolonelio. Ghoogho akabheele mukulu ghwa situnfi sya bhasilikale ^sikabheele sijhitilwe, Situnfi sya ku Italia. 2 Kolonelio kumwi no mughāna ghwajhe bhakabheele bhamwisighile Kabhumba, akabheele ghwa sighōngo ku bhantu, nfuku syonse akabheele nalikutendajhyuka kwa Kabhumba.3 Lyalikabha ifuku limwi mu mansa ghakukabha isyubha lyahunga, Kolonelio ghaalōla filōli. Mu feefyo filōli ghajhisilwa na musambwa ghweke Kabhumba ghaabhala, “Kolonelio!” 4 Kolonelio ghamusīipisya menso, ghaghubhaha ghaabhala, “Kwabha si Taata Bhusya?” Musambwa ghaabhala, “Kusēegha koobhe ne sighōngo syobhe ku bhapīina fyafīka mwi ighūlu kwa Kabhumba. 5 Nonwe, ghalaghiila bhantu ku Jhyafa, bhakamwite muntu ghumwi ^ajhitilwe Simoni, lindi isiina Petelo. 6 Unyene afīkiile ha Simoni mujhōjhya nsabha, nyumba jhyajhe jhili kwi isinsi.” 7 Ghulya musambwa bhoghakabhanga ghahwa kumutānyisya Kolonelio, ghabhuuka ghaajha. Kundi Kolonelio ghajhita bhabhili mu bhakola milīmo bhaajhe, hamwi no musilikale ghumwi mu bhalya ^bhakabheele ha bhwihi naajhe, ghwakukabha namwisighile Kabhumba. 8 Bhoghakabhanga ghahwa kubhalomba maghāmbo ghonse ghaagho, ghabhalaghiila bhajhe ku Jhyafa.
Petelo alikulōla filōli
9 Mulāabho ghwajhe isyubha lili hakati, bhalya bhantu bhali ku bhwihi no lugho lwa Jhyafa, Petelo ghatanda ku lughamba ku kapungu mukatendajhyuka. 10 Ghaalōla nsāla, ghahensa fyakulya. Mukubha bhalikufijhōojhya, ghakolobhela. 11 Mu kooko kukolobhela, ghaalōla ighūlu lyajhighuka, hajhisa sintu kobhe limwenda ikulu lilikusoosibhwa linīghilwe malebhe ghaajhe ane. 12 Mu leelyo limwenda, mukabheele manywele museleghanyia, gha maghūlu ane, malyasya na nda na manyōnyi.
13 Kundi syahulikika silongo syabhala, “Petelo, bhuuka, usinse ulye.” 14 Petelo ghahindula ghaabhala, “Lekehi Taata Bhusya! Nsinalye sintu syosyonse ^situnyisiibhwe mu Kabhāngo keke Musa.” 15 Silya silongo syahulikika kabhili syabhala, “Fintu fyofyonse fyoghafūla So Bhusya, nosifibhaliko musīlo.”a 16 Silongo seesyo syahulikika myelelo itatu, kundi lilya limwenda lyahelesibhwa kabhili mwi ighūlu.
17 Petelo mukubha nalikufilanganyia feefyo filōli, bhalya bhantu bhatatu ^bhakabheele bhalaghiilwa na Kolonelio bhajhilōla nyumba jhyeke Simoni mujhōjhya nsabha, bhabha bhajhughalele ha mulyāngo. 18 Bhahuula hoti, bhabhasya kubhala, “Munyēnyi ^ajhitilwe Simoni, lindi isiina Petelo, ali hanu?” 19 Mukubha Petelo nalikufilanganyia filya fyoghalōlanga, Mwēgho Mulafu ghweke Kabhumbab ghwamulomba, “Simoni, hali bhantu bhatatu bhalikukuhensa. 20 Sooka bhwangu, no kubha nosilanganyi kandi kulōndekana nabho, bhukohela nine nambalaghiila.”
21 Petelo ghasooka mwifo, ghabhalomba bhalya bhantu ^bhakabheele bhalaghiilwa no Kolonelio kubhala, “Une ghone Petelo. Mulikuhensa si?” 22 Bhalya bhantu bhahindula bhabhala, “Tulaghiisilwe na mukulu ghumwi ghwa bhasilikale, Kolonelio, muntu mughololoke mwēgho ^amwisighile Kabhumba, Bhajhahudi bhonse bhamutikiisye. Ghoogho alaghiisilwe na musambwa ghweke Kabhumba kubhala ti akwite ha lugho hamwajhe, ahulikisye maghāmbo gholakutenda.” 23 Kundi Petelo ghabhasangaanila, ghabhaghansila bhalaala.
Petelo alikwingila mu nyumba jhyeke Kolonelio
Mulāabho ghwajhe ghabhuuka nabho, bhalōndekana na bhandi bhahemba kufuma ku Jhyafa. 24 Mulāabho ghwajhe bhafīka mu lugho lwa Kalisaalia. Mukubha bhafīka bhamusangana Kolonelio nabhahembeele, nali kumwi na bhamughana na bhanywanyi bhaajhe bhwakabheele ghakaatika. 25 Petelo nasyali kujhingila mu nyumba, Kolonelio ghakanyalikanga kunse ghamusangaanila, ghasukama, ghamupākila. 26 Tukubha Petelo ghamulēsya ghaabhala, “Jhughalala, une ndi muntu tue kobhe ughwe.” 27 Mukubha bhalikutenda ghaagho, Petelo no Kolonelio bhajhingila bhonse mu nyumba, ghasangaana bhantu bhengi bhajhīkeele. 28 Petelo ghabhalomba ghaabhala, “Mwense mujhinsi kubhala ti, te Kabhāngo Mujhahudi kwīkala bhakolela kumwi no muntu asili Mujhahudi, ajhe kwijhumbila. Tukubha Kabhumba ghakanānsya kubhala, te musīlo kwīkala no muntu ghoghonse. 29 Feefyo gho fyasūla nanjisa kunu komwantangiila bhusila kusubhiila. Nonwe ndikumubhasya, mwantangililanga si?”
30 Kolonelio ghahindula ghaabhala, “Mafuku atatu ^ghakahitile nkabheele nendi ha lugho nendikutendajhyuka mansa gha kubha isyubha lyahunga. Kobhe nkatipwile, hanyalika muntu ghwakukabha nafwite myenda jhilikujhengajhenga ghajhughalala ha mulombolo ghwane, 31 ghaabhala, ‘Kolonelio kutendajhyuka koobhe ne fintu fyolikufumya ku bhapīina, fyafīka kwa Kabhumba. 32 Kansi ughwe laghiila bhantu ku Jhyafa, bhakabhasye muntu ajhitilwe Simoni lindi isiina Petelo, ghoogho ni munyēnyi afīkiile ha Simoni mujhōjhya nsabha. Jheejhyo nyumba jhili kwi isinsi.’ 33 Kundi nandaghiila bhantu kumoobhe, ghwajhīla fisogha bhoghwajhisa. Nonwe ufwe fwense tuli ha mbele jhyeke Kabhumba, tuhulikisye ghonse gholaghiisilwe naajhe.”
34 Haaho Petelo ghasumbula kutenda kubhala, “Nonwe namānya kubhala ti Kabhumba ni musila bhwisola. 35 Muntu ghwa sihugho syosyonse amwisighile Kabhumba, ghanakola ghonse ghahenseelwe, akopokeelwa na Kabhumba. 36 Umwe mutembekeesye bhulya bhwaku ^bhwakalaghilwanga ku Bhesilaheeli, bhwa kutangaasya Sikūla Sisogha sya maholo ku nsīla jhyeke Jheesu Kiliisito, unyene gho Sibho Bhusya ghwa bhonse. 37 Mughajhinsi ghonse ghakakolekanga mu sihugho syonse sya Bhajhahudi, kusumbulila ku Ghalilaajha mukubha Jhohana ghahwa kubhatisya. 38 Mujhinsi bhuli Kabhumba bhoghakamuhālanga Jheesu ghwa kufuma ku Nasaleti, ghaamuha managha gha Mwēgho ghwajhe Mulafu. Monse mwakabheele nalikujha, Kabhumba akabheele kumwi naajhe. Jheesu akabheele nalikubhēlila maghāmbo gha bhutendeke, no kusisya bhalwele bhonse ^bhakabheele na malwele gha mamisāgha. 39 Ufwe fwense tuli bhakalōla bha maghāmbo ghonse ghakakolekanga mu sihugho sya Bhajhahudi no mu Jhelusalemu. Bhakamujhihaghilanga ku musalabha, 40 tukubha Kabhumba ghamusyula ifuku lya bhutatu, ghamuselula ku bhantu. 41 Teghakalōlekanga ku bhantu bhonse, ghakalōlekanga ku bhakalōla ^bhakabheele bhakabhiikwa na Kabhumba, ufwe twakalyanga twananywa kumwi naajhe bhoghakabhanga ghasyuka kufuma ku bhafu. 42 Unyene gho ghakatulaghiilanga tutangaasye ku bhantu bhonse no kubhalāngulula kubhala ti ghooghu gho alaghiisilwe na Kabhumba ghwa kubhakalila bhali bhupanga na bhafu. 43 Bhaghwelaghu bhonse bhakatendanga mpola syajhe kubhala ti muntu ghoghonse alomujhimbika ghamwisigha, alolesibhwa bhubhi bhwajhe kwi isiina lyajhe.”
Bhantu bhasili Bhajhahudi bhalikuheebhwa Mwēgho Mulafu ghweke Kabhumba
44 Mukubha Petelo nalikutenda ghaagho maghāmbo, bhonse ^bhakabheele bhamuhulikiisye bhajhisilwa na Mwēgho Mulafu ghweke Kabhumba. 45 Bhalya bhahemba Bhajhahudi ^bhakesanga no Petelo kufuma ku Jhyafa, bhalikosa mahi kulōla Kabhumba bhoghabhaha Mwēgho Mulafu bhantu bhasili Bhajhahudi. 46 Bhukohela bhakabhahulikanga bhalikutenda tutendelo tuhya bhalikumulumba Kabhumba. Haaho Petelo ghaabhala, 47 “Bhaabha bhantu bhaheebhwa Mwēgho Mulafu ghweke Kabhumba kobhe bhotwakaheebhwanga nofwe. Kundi nonwe hali muntu ghoghonse alakulēsya bhasibhatisibhwi?” 48 Kundi Petelo ghalaghiila bhabhatisibhwe kwi isiina lyeke Jheesu Kiliisito. Kafumilo ka haaho bhahensa Petelo nasijhi, ajhīkale nabho ku nfuku nse.