Lupola lweke Petelo ku Jhelusalemu
11
Mintengwe bhaajhe Jheesu na bhandi bhahemba ^bhakabheele mu sihugho syonse sya Jhudea, bhahulika kubhala ti bhantu bhasili Bhajhahudi bhaaliswa Ighāmbo lyeke Kabhumba. 2 Petelo bhoghakabhanga ghaheleela ku Jhelusalemu, bhalya bhahemba Bhajhahudi ^bhakabheele bhahensile bhantu bhasili Bhajhahudi bhaputwe nkōpa,a bhajha kung'wing'a, 3 bhabhala, “Ughwe ukajhiile ku bhantu bhasiputilwe nkōpa ghwanalya nabho!”4 Kundi Petelo ghajha kubhatānyisya ghonse ku mitontelo ghaabhala, 5 “Ifuku limwi nkabheele nendikutendajhyuka kwa Kabhumba nendi mu lugho lwa Jhyafa, namba kobhe nankolobhela. Mu kooko kukolobhela, nandōla filōli kobhe limwenda ikulu linīghilwe malebhe ghaajhe ane, lilikusoosibhwa kufuma mwi ighūlu lyajhisa bhulunga honkabheele. 6 Bhonankabhanga nankūnga mu leelyo limwenda, mukabheele manywele gha maghūlu ane, manywele gha mwi isala, malyasya na nda na manyōnyi.
7 “Nanhulika silongo sya kubhala, ‘Petelo, bhuuka usinse, ulye.’ 8 Nanhindula nambala, ‘Lekehi Taata Bhusya, sintu syosyonse sya musīlob tesinajhingile mu kanywa ka kumwanehi.’ 9 Silongo syahulikika kabhili kufuma mwi ighūlu, ‘Fintu fyofyonse fyoghafūla So Bhusya, nosifibhaliko musīlo.’ 10 Ighāmbo leeli lyakoleka myelelo itatu, kundi lilya limwenda lyahelesibhwa kabhili mwi ighūlu.
11 “Kafumilo ka haaho, bhantu bhatatu ^bhakabheele bhalaghiisilwe kufuma ku Kalisaalia bhafīka ha nyumba honkabheele. 12 Mwēgho Mulafu ghweke Kabhumbac ghambalila inōndekane nabho nensijhīli bhwisola. Bhaabha bhenaane mukaagha naagho bhajhisa, twalōndekana nabho kujha mu nyumba jhyeke Kolonelio. 13 Ghatulomba bhuli musambwa bhoghamunyalikilanga mu nyumba jhyajhe, ghwamulomba kubhala, ‘Laghiila bhantu ku Jhyafa bhakamutangiile muntu ajhitilwe Simoni, lindi isiina Petelo. 14 Ghoogho alokulomba maghāmbo ghakukabha ughwe na bhamughana ghoobhe bhonse mulosābhulwa.’
15 “Bhonambanga nansumbula kutenda nabho Ighāmbo lyeke Kabhumba, Mwēgho Mulafu ghweke Kabhumba ghabhasookela kobhe bhoghakatusookelanga ufwe ku bhusumbulilo.d 16 Haaho nangajhisukila ghalya maghāmbo ghakatendwanga na Sifwe Bhusya Jheesu kubhala, ‘Jhohana ghakabhatisyanga ku mansi, tukubha umwe mulobhatisibhwa ku Mwēgho Mulafu.’e 17 Nonwe, kubha Kabhumba ghakabhahanga Mwēgho Mulafu kobhe bhoghakatuhanga nofwe ^twakamwisighanga Sifwe Bhusya Jheesu Kiliisito, une ndi ghanyi ghwa kutuna fyoghabhala Kabhumba?”
18 Bhobhakahulikanga ghaagho tebhakabhanga na lya kutenda kabhili. Bhakatendanga tu gha musīimoe kwa Kabhumba, bhabhala, “Kabhumba ghabhaha bhasili Bhajhahudi mpeghupeghu jhya kughalaghala bhubhi bhwabho, bhapāte bhupanga bhwa nfuku syonse.”
Kupambulilwa kwa bhahemba bha ku Antiokia
19 Bhoghakabhanga ghajhihaghwa Sitefano, bhahemba bhengi bhakasambalananga bhajhiluka kwihaghwa. Bhandi bhakakilimilanga ku Foinike, kalila ka Kiipulo no mu lugho lwa Antiokia. Kooko bhakatangaasya Ighāmbo lyeke Kabhumba ku Bhajhahudi bhuhela. 20 Tukubha mu bhalya bhakakilimanga, bhakabheelemo bhantu bha kufuma ku Kiipulo no ku Kilene. Bhaabho bhobhakabhanga bhafīka ku Antiokia bhakajhanga kubhalāngulula bhantu Ighāmbo lyeke Jheesu kumwi no ku bhantu bhasili Bhajhahudi. 21 Managha gheke Sifwe Bhusya ghakabheele kumwi nabho, bhantu bhengi bhamumānya Jheesu, bhamwisigha.
22 Bhahemba bha ku Jhelusalemu bhobhakabhanga bhahulika ghaagho, bhamulaghiila Bhalinaabha ajheeko ku Antiokia. 23 Mukubha ghafīkako, ghaalōla bhuli Kabhumba bhoghakabhapambulila bhaabho bhantu, ghasangabhala nkana. Haaho ghabhaha managha, ghabhalomba bhajhililike kubha bhatendeke kwa Sifwe Bhusya Jheesu. 24 Bhalinaabha akabheele muntu mutendeke nabhumbiike Mwēgho Mulafu ghweke Kabhumba no kumwisigha Kabhumba. Bhantu bha kumwisigha Sifwe Bhusya Jheesu bhaghungilika nkana.
25 Kundi Bhalinaabha ghaajha ku lugho lwa Taaso mu kumuhensa Sauli. 26 Bhoghakabhanga ghamulōla ghajhisa naajhe ku Antiokia. Bhalinaabha no Sauli bhakakolanga mwaka ghumwi ketebhaajha mukatendajhyuka hamwi na bhahemba, bhalikulāngulula linyabhwingi lya bhantu. Ku Antiokia kobhasumbuliile bhahemba kujhitwako Bhakiliisito. 27 Mafuku ghaagho bhandi bhaghwelaghu bhakasookanga kufuma ku Jhelusalemu kwisa ku Antiokia. 28 Ghumwi mu bhaabho isiina lyajhe Aghabho. Ku managha gha Mwēgho Mulafu ghweke Kabhumba ghaghwa ilaghu kubhala, halakubha nsāla nkulu ha bhweleelo. Jheejhyo nsāla jhyakesanga mu nfuku syakabheele Kilaudio najhimile. 29 Bhahemba bha ku Antiokia bhajhīkala ibhalasa bhabhala, “Muntu ghoghonse, ku kasintu kokonse kwalinako, abhafumbuule bheneetu bhali ku Jhudea.” 30 Kundi bhasānsya, bhabhaheekesya Bhalinaabha no Sauli bhabhafelele bhaghosibhakulu bha kaniisa jhya ku Jhelusalemu.