Milīmo jhya Mintengwe 8

Bhahemba bheke Jheesu bhalikubhunusibhwa bhanasambaalana

Sauli mukubha lilikukoleka leelyo lya kumwihagha Sitefano, akabheele nabhwene ni isogha. Ifuku leelyo kwakasūlikanga kubhunusibhwa kukulu nkana kwa bhahemba mu Jhelusalemu, bhahemba bhonse bhakilima bhasambaalana. Mu kukilima bhandi bhaajha kooku no kooku mu Jhudea na bhandi ku Samalia, hasīibha mintengwe bhuhela. 2 Bhoghakabhanga ghafwa Sitefano, bhantu bhandi bhasogha ^bhakabheele kumwi naajhe, bhakamusiikanga bhanamughandila ne sililo. 3 Mu nfuku seesyo Sauli akabheele nalikubhasanfya nkana bhahemba. Mu nyumba syonse ^sikabheele simwisighile Jheesu bhakeema ku bhaghoosi akabheele nalikubhanīgha ghanabhajhīghalila.

Filipo alikutangaasya Ighāmbo lyeke Kabhumba mu sihugho sya Samalia

4 Bhalya ^bhakabheele bhalikusambaalana, kobhakabheele bhalikujha, bhakabheele bhalikutangaasya ku bhantu Ighāmbo lyeke Kabhumba. 5 Filipo naagho ghaajha mu sihugho sya Samalia, ghabhatangaasisya bhekasi mpola syeke Kiliisito. 6 Linyabhwingi lya bhantu bhobhakabhanga bhamuhulika, bhanalōla na maleebha ghwakabheele nalikwīla, kusumbulila haaho bhantu bhajha kumuhulikisya nkana. 7 Mamisāgha mabhi ghakabheele ghalikubhafumako bhantu bhengi no kooku ghalikuloloma, na bhantu bhengi ^bhakabheele na malwele gha ighōnde ne fisyeta bhasila. 8 Mu loolo lugho mwabha nseko nseko nkana.

Petelo alikumukalihila Simoni mulōsi

9 Hakabheele no muntu ghumwi isiina lyajhe Simoni ^akabheele ghaajhīla mengi ku silōsi, mu loolo lugho lwa Samalia, bhantu ketebhalikosa mahi. Ghalitiipa nkana kubhala ti unyene ni muntu mukulu. 10 Bhantu bhonse bhakulu ku bhatwana, bhakabheele bhamujhimbiike nkana ketebhabhala, “Ghooghu muntu, ni managha makulu gheke Kabhumba.” 11 Bhakabheele bhalikumwilōleela bhukohela akabheele na maleebha mengi gha silōsi ku nfuku singi.

12 Tukubha Filipo bhoghakajhanga kubhatangaasisya Sikūla Sisogha sya Bhwami bhweke Kabhumba, ne isiina lyeke Jheesu Kiliisito, bhakaswanga isiina lyeke Jheesu, bhabhatisibhwa bhanabhakeema na bhanabhaghoosi. 13 Kumwi no Simoni naagho ghaghaswa ghalya maghāmbo, ghabhatisibhwa, ghalipampika kwa Filipo. Ghalōndekana naajhe nfuku syonse, hohonse hoghaajha, ghaalōla lusante na maleebha mengi ghwakabheele nalikwīla Filipo.

14 Kundi bhalya mintengwe ^bhakabheele ku Jhelusalemu bhobhakahulikanga ti bhantu bha ku Samalia bhaaswa kulipokeela Ighāmbo lyeke Kabhumba, bhabhalaghiilako Petelo no Jhohana. 15 Bhaabho bhobhakabhanga bhafīka, bhabhatendajhyukila bhalya bhahemba bhamupokeele Mwēgho Mulafu ghweke Kabhumba. 16 Bhukohela mu seesyo nfuku, hakabheele hatuhu singa tu ghumwi mu lugho lwa Samalia ^akabheele ghakasookelwa na Mwēgho Mulafu ghweke Kabhumba, bhakabheele bhakabhatisibhwa tue kwi isiina lyeke Sifwe Bhusya Jheesu. 17 Kundi Petelo no Jhohana bhaghambika mabhoko ghaabho ku bhaabhali bhakabhatisibhwanga, bhabha bhapokeela Mwēgho Mulafu ghweke Kabhumba.

18 Ghulya Simoni bhoghakalōlanga bhuli mintengwe bhobhalikubhiika mabhoko ku bhantu, bhalikupokeela Mwēgho Mulafu ghweke Kabhumba, ghabhaheekesya mahela ghaabhala, 19 “Mpekesye none ghaagha managha akulinga muntu ghoghonse ^ghonambiikako mabhoko ghaane ghapāta Mwēgho Mulafu ghweke Kabhumba.”

20 Petelo ghamuhindula ghaabhala, “Fuma hanu hotuli ughwe na mahela ghoobhe, bhukohela ujhinsi ti unapāta managha gheke Kabhumba ku mahela! 21 Ughwe tuli na simaanya syosyonse ku mulīmo ghooghu ghotulikwīla, bhukohela mwēgho ghoobhe te musogha ha mbele jhyeke Kabhumba. 22 Kansi ughwe ghalaghala bhubhi bhoobhe, umusēeghe Kabhumba, hamwi analesya mabhi ghali mu mwēgho ghoobhe. 23 Bhukohela nkubhwene uli ne iitama nkana no mwēgho ghoobhe ghubhumbiike bhubhi.” 24 Kundi Simoni ghamuhindula ghaabhala, “Umwe ntendajhyukile kwa Sifwe Bhusya Kabhumba, akulinga ghaagho ghomwatenda ghasinfīkiko.”

25 Petelo no Jhohana bhobhakabhanga bhahwa kutangaasya Ighāmbo lyeke Kabhumba, no kubhalāngulula bhantu bha mu loolo lugho, bhasumbula lwēndo lwa kuheleela ku Jhelusalemu. Mukubha bhaheleesile, bhakahitanga mu mahala mengi gha Bhasamalia, bhaajha bhatānyia seesyo Sikūla Sisogha.

Filipo no kaloghojho ghwa ku Esiopia

26 Haaho musambwa ghweke Kabhumba ghamulomba Filipo ghaabhala, “Bhuuka ujhe luhande lwa kuusi, ghwahita nsīla jhisookile kufuma ku lugho lwa Jhelusalemu, jhijhiile ku lugho lwa Ghaasa.” Jheejhyo nsīla jhihitile mwi isēnga. 27 Kundi Filipo ghabhuuka ghalōnda jheejhyo nsīla. Mukubha najhiile ghasangaana na mughosimukulu ghumwi ghwa sihugho sya Esiopia, kaloghojho, akabheele mujhughalasi mukulu najhughalaliile mbiika syonse syeke Kandake, mwami mwanamukeema ghwa ku Esiopia. Ghoogho kaloghojho akabheele nafumile ku Jhelusalemu mukapeela. 28 Nali mu muutuka jhyajhe jhya kutambwa na manywele, nahelesile ku lugho, akabheele nalikusōma sitaabhu syeke mughwelaghu Isaajha.

29 Mwēgho Mulafu ghweke Kabhumba ghamulomba Filipo ghaabhala, “Koleela ha bhwihi na muutuka.” 30 Filipo ghakoleela ha bhwihi ne jhilya muutuka, ghamuhulika ghoogho muntu nalikusōma sitaabhu syeke mughwelaghu Isaajha. Kundi ghamubhasya, “Teeti, ulikughamānya ghaagha gholikusōma?” 31 Ghulya kaloghojho ghaabhala, “Nankughamānya bhuti bhusila muntu ghwa kuntobhololela?” Kundi ghamulebhelesya Filipo ajhingile mu jheejhyo muutuka bhajhīkale hamwi. 32 Na maghāmbo ghwakabheele nalikusōma ghoogho kaloghojho ni aaghe,

“Ghakalombosibhwanga kobhe ntaama ^jhifelitwe ku ibhaaghilo.

Teghakatendanga sintu,

akabheele nahumbwile kobhe mwana ghwa ntaama bhwakohumbula,

ha mbele jhya muntu alikujhiputa bhoosa.

33 Bhakamufwisyanga nsonyi,

tebhakamukalilanga ku kulōnda bhwene.

Hatuhu anajhitendelela nfuuke jhyajhe,

bhukohela bhakamwihaghanga ghafwa bhusila mwana.”

34 Ghulya mughosimukulu ghamubhasya Filipo ghaabhala, “Akooko ntānyisye, ghooghu mughwelaghu ghaagha maghāmbo alikwibhala nyene, ajhe alikubhala ghundi muntu?” 35 Kundi Filipo ghasumbulila ku ghaagho maghāmbo kumutānyisya Sikūla Sisogha syeke Jheesu.

36 Mukubha bhajhililiike no lwēndo lwabho, mu nsīla bhahita hakabheele mansi. Ghulya mughosimukulu ghamulomba Filipo ghaabhala, “Akūnga mansi ghaagha, ni sighanyi silakulēsya nensibhatisibhwi?” [ 37 Filipo ghamuhindula ghaabhala, “Kubha ghwamwisigha Jheesu Kiliisito ku mwēgho ghoobhe ghonse, unabhatisibhwa.” Ghulya mughosimukulu ghaabhala, “Nanswa kubhala, Jheesu Kiliisito gho Mwana ghweke Kabhumba.”] 38 Haaho ghajhughalalika jhilya muutuka. Bhasooka mu mansi bhonse bhabhili, ghulya kaloghojho no Filipo, kundi Filipo ghamubhatisya. 39 Bhobhakabhanga bhafuma mu mansi, Mwēgho Mulafu ghweke Kabhumba, ghamutwala Filipo. Ghulya mughosimukulu teghakamulōlanga kabhili, tukubha ghakajhanga nasangabheele. 40 Filipo naagho ghapampamuka nakali ku lugho lwa Asoota. Kufuma mu loolo lugho ghakajhanga ghatānyia Ighāmbo lyeke Kabhumba mu ngo syakabheele nalikuhita, ghasumwa ghafīka mu lugho lwa Kalisaalia.