Sitefano ali mwi ibhalasa ikulu
7
Kundi mupeesi mukulua ghamubhasya Sitefano kubhala, “Teeti, ghaagha ghobhalikutenda ni bhwene?” 2 Sitefano ghahindula ghaabhala, “Bhamughana ghwane nomwe bhataata nhulikisye! Kabhumba ghwa mpunda singi ghakamwisilanga nyinefwekulu Bhulahimub bhwakabheele nali ku Mesopotamia, nasyali kujha ku Halani, 3 Kabhumba ghakamulombanga, ‘Bhuuka ufume mu sihugho syobhe, ubhalēke bhantu bha bhukwa bhoobhe, kajhe mu sihugho syondakukulānsya.’c 4 Kundi Bhulahimu ghatuuluka ku sihugho sya Bhukalidajho, ghaajha mu kwīkala ku Halani. Bhoghakabhanga usye ghasumaalika, Kabhumba ghamutuulusya kabhili ku Halani, ghajhisa ghajhīkala mu seesi sihugho syomumwīkeelemo nonwe.5 “Kabhumba teghakamuhangamo bhuhyana bhobhonse mu seesi sihugho, nenga tu ha bhukulu bhwa lupambala. Tukubha Kabhumba ghakamulombanga kubhala, unyene ne nfuuke jhyajhe bhalokasihyana seesi sihugho,d hamwi no kubha mu nfuku seesyo Bhulahimu tyakabheele na mwana. 6 Kabhumba ghakamulombanga ghaabhala, ‘Nfuuke jhyobhe bhalobha bhanyēnyi mu sihugho sya bhandi. Bhantu bha mu seesyo sihugho bhalokabhahindulako bhasya bhalikubhajhyukila myaka maghāna ane.e 7 Tukubha une ndokabhahuula bheene seesyo sihugho ^silokabhēelako bhasya. Hamwi na ghaagho, nonkabhatuulusya kufuma mu seesyo sihugho bhakese bhakampeele mu seesi sihugho.’ 8 Kundi Kabhumba ghabhiika kalaghano no Bhulahimu. Ghalaghiila bhaana bhonse bhaghoosi bhaputwe nkōpa,f gho lusante lwa kalaghano. Bhulahimu bhoghakabhanga ghamufyala Isaka, ghamuputa nkōpa mwi ifuku lya munane nafuukile, Isaka naagho ghaajhīla bhoobhoe kwa Jhakobho, no Jhakobho naagho ghaajhīla bhoobhoe ku bhaana bhaajhe ikumi na bhabhili bhalya bhanyinefwekulu.
9 “Bhalya bhanyinefwekulu bhakamulōlelanga ibhubha Jhusufu ghwamughana ghwabho, bhamughūsya ku sihugho sya Miisili akabhe musya. Tukubha Kabhumba akabheele kumwi naajhe, 10 ghamusābhula mu mabhi no kusamba konse kukabheele kumwajhe. Kabhili, Kabhumba ghamupambulila masāla gha kujhughalala ha mbele jhyeke Falao, mwami ghwa ku Miisili. Ghoogho mwami ghakamubhikanga Jhusufu ajhughalalile sihugho ne nyumba jhya bhwami.
11 “Kundi mwasūlika nsāla mu sihugho syonse sya Miisili no mu Kanaani, bhaabho bhanyinefwekulu naagho bhaghwa mu nsāla. 12 Jhakobho bhoghakabhanga ghahulika ti kooko ku Miisili kuli fyakulya, ghakabhalaghilanga bhaana bhaajhe bhajheko, bhaabho bhanyinefwekulu. Loolu lukabheele gho lwēndo lwa kusumbula kujhako. 13 Bhobhakajhanga lwēndo lwa bhubhili, Jhusufu ghalibhuula ku bhamughana ghwajhe, bhamughana ghwajhe naagho bhalimānya no Falao. 14 Kundi Jhusufu ghalaghiila bhakamulente usye Jhakobho na bhamughana ghwajhe bhonse. Bhakabheele bhantu makumi ndwi na bhataanu. 15 Jhakobho ghabha ghasooka ku Miisili, kooko koghakafwilanga unyene na bhaana bhaajhe. 16 Mafuha ghaabho ghakahelesibhwanga ku Syekemu, ghasiikwa mwi ibhāla lyoghakaghūlanga Bhulahimu ku bhaana bheke Hamooli kooko ku Syekemu.
17 “Mafuku bhoghakabhanga ghakoleela ghoghakabhalanga Kabhumba gha kukwisya kalaghano kaajhe kwa Bhulahimu, bhakabheele bhakafyalana, bhakaghungilika nkana kooko ku Miisili. 18 Mukubha ghahita mafuku ghaagho, ghakajhimanga ghundi mwami ku Miisili ^asisijhinsi mpola syeke Jhusufu.g 19 Ghoogho mwami ghakabhabhunusyanga fibhi bhantu bha bhukwa bhwetu, bhanyinefwekulu bhajhyuka nkana. Ghabhalomba bhonse ^bhakabheele na bhaana bhasebhase bhabhabhiike kunse aleke bhafwe.
20 “Mafuku ghaagho gho ghakafuukilangamo Musa, akabheele mwana musogha nkana. Ghakatobhelwanga na bhamufyele myensi itatu. 21 Bhobhakabhanga bhapootwa kumufisa, bhamubhiika mu kasalaghano, bhamulēka ku mbalimbali na monga. Kafumilo ka haaho mwanaajhe mukeema ghweke Falao ghamusōla, ghabha nalikumutobhela. 22 Musa ghakula, ghalāngwa masāla ghonse gha Bhamiisili, ghabha na managha ku fya kukola no bhulonfi.
23 “Bhoghakabhanga ghafīsya myaka makumi ane, ghalanganyia kujha mu kubhaposya bha kumwabho. 24 Kooko ghamulōla Mwisilaheeli ghumwi nalikuhuulwa na Mumiisili. Mu kulīhiisya kafinda ghamuhuula ghulya Mumiisili, ghamwihagha. 25 Musa akabheele nalikulanganyia kubhala ti bhamughana ghwajhe Bhesilaheeli bhajhinsi ti Kabhumba alakubhasābhula kufuma mu bhusya kuhitila kumwajhe, tukubha tebhakabheele bhajhinsi.
26 “Mulāabho ghwajhe ghabhasānga Bhesilaheeli bhabhili bhalikusoola, ghahensa ti abhafunge, ghaabhala, ‘Umwe muli bhamughana, nasi mulikuhensa kwifulasya?’ 27 Ghulya ^akabheele nalikumuhuula mwinaajhe ghamutēnkela ku mbali Musa, ghaabhala, ‘Ni ghanyi ghakakubhiika utujhughalalile ghwanabha mujhangusi ghwetu? 28 Teeti, ulikuhensa kunjihagha kobhe bhokamwiheghe Mumiisili isoneka?’ 29 Musa bhoghakahulikanga ghaagho ghajhilukila ku sihugho sya Midiani, ghajhīkala kobhe munyēnyi, kooko ghafyala bhaana bhabhili bhaghoosi.
30 “Bhojhyakabhanga jhyahita myaka makumi ane, musambwa ghweke Kabhumba ghamwisila Musa mwi ighulungu ha bhwihi na musosi ghwa Sinai. Akabheele mwi ifuubhila ^likabheele lilikughaka mulīlo. 31 Musa bhoghakalōlanga ghaagho ghalikosa mahi. Mukubha nalikukoleela akomenkesye, ghahulika silongo syeke Sifwe Bhusya Kabhumba kubhala, 32 ‘Une ndi Kabhumba ghwa bhaaso, Kabhumba ghweke Bhulahimu, Isaka no Jhakobho.’h Musa ghasūpa, ghajha kusughuma, teghakasīmyanga kukūngako kabhili.
33 “Kabhumba ghamubhalila, ‘Fuula nkwābho syobhe, hanu hojhughalele ni nsi jhyonankatenteka. 34 Nankulōla kusamba kwa bhantu bhaane bhali mu sihugho sya Miisili, nanhulika sililo syabho, nansooka imbasābhule. Nonwe ndikukulaghiila uujhe ku sihugho sya Miisili.’i
35 “Ghoogho Musa ghobhakatunanga bhabhala, ‘Ni ghanyi ghakakubhiika utujhughalalile ghwanabha mujhangusi ghwetu?’j Ghoogho gho akabheele nalaghisilwe nonyene Kabhumba ku kuhitila ghulya musambwa ghwakamunyalikilanga mu lilya ifuubhila, abhe mughosimukulu ghwa kubhajhughalalila no kubhasābhula. 36 Ghakabhalombolanga Bhesilaheeli kufuma ku Miisili, ku lusante na maleebha mengi kooko ku Miisili, mu tanganika jhya Syamu no mwi ighulungu ku myaka makumi ane.
37 “Ghoogho Musa gho munyakubhalomba Bhesilaheeli, ‘Siinywe Bhusya Kabhumba alobhuusyamo mughwelaghu kobhe une mu umwe.’k 38 Ghoogho Musa gho akabheele mu linyabhwingi lyobhakabheele bhasangaana mwi ighulungu mu musosi ghwa Sinai hamwi na bhanyinefwekulu. Gho ghakatensanyianga no musambwa ghweke Kabhumba, ghaheebhwa maghāmbo gha bhupanga, ghatulentela.
39 “Tukubha bhanyinefwekulu bhakatunanga kumuhulikisya Musa, bhamutunila kule, bhajhelekesya myēgho jhyabho ku Miisili kobhakafumanga. 40 Bhamulomba Haluni,l ‘Tujhōojhisye mikiti ^jhilakutulombola, bhukohela ghooghu Musa ghakatufumyanga ku Miisili tetujhinsi fyoghabha kooko.’m 41 Haaho hobhakajhōojhyanga mukiti ghususeene ne ituntughulu lya ng'ombe, bhalenta ne mpeesi jhya kupeela ghulya mukiti gho bhajhōojhyanga na mabhoko ghaabho. 42 Haaho Kabhumba ghaliijheka, ghabhalēka bhapeele mikiti jhyabho jhya ntangwa, mwensi ne isyubha, kobhe bhofibhasilwe mu maghāmbo gha bhaghwelaghu kubhala,
‘Teeti umwe Bhesilaheeli,
myaka makumi ane jhyomwakalyātanga mwi ighulungu,
mwakanfumisyanga une fisongwa ne mpeesi?
43 Mwakatwalanga kalunsi keke mughābho Moleki,
no lutangwa lweke mughābho ghwenyu Lefani.
Mikiti jhya mighābho jheejhyo mwakajhijhōojhyanga,
akukabha mubhe mulikujhipeela.
Teetyo, mulakubha bhasampwa,
nankumifela kule kusumba ku Bhabheli.’n
44 “Bhanyinefwekulu bhakabheele ne iheemao lya kulānsya ti Kabhumba ali kumwi nabho mwi ighulungu. Likabheele lijhōojhisiibhwe kobhe bhoghakalaghilanga Kabhumba kwa Musa, bhobhakalijhōojhyanga. 45 Haaho bhanyinefwekulu bhakabheele bhalikuhelunkana bheene ku bheene mpaka mu nfuku syeke Jhosua bhwakabheele nabhajhughalaliile. Bhobhakabhanga bhasitwala seesi sihugho kufuma mu mabhoko gha bhantu bha mabhufi ghasimwisighile Kabhumba, haaho lyakēkalanga mpaka mu nfuku syeke mwami Daudi.p
46 “Daudi mu kumujhimbika Kabhumba, ghakasēeghanga ti amughubhakile Kabhumba ghweke Jhakobho nyumba jhya ipeelelo.q 47 Tukubha mwanaajhe Solomoni gho ghakamughubhakilanga jheejhyo nyumba. 48 Hamwi na ghaagho, Kabhumba Mukulu ghwa Fyonse tyanajhīkala mu nyumba jhya kughubhakwa ku mabhoko gha bhantu. Kobhe bhwabhasile mughwelaghu,
49 ‘Kabhumba atensile,
“Ighūlu ni ikonko lyane lya njimiisi,
na ha bhweleelo gho ha kubhiika maghūlu ghaane.
Mulakungubhakila nyumba jhya bhuti?
Ajhe ha kwīkala une nantamuka, hanabha ha bhuti?
50 Teeti, feefi fyonse teene kanya kufibhumba?”’r
51 “Ale bhakabhansi! Myēgho na matwi ghenyu ni kobhe bhantu bhasimwisighile Kabhumba. Umwe ni kobhe bhanyinenywekulu, nfuku syonse mujhīkeele mulikumutuna Mwēgho Mulafu ghweke Kabhumba.s 52 Teeti, ni mughwelaghu ghuuhe asyakasanfisibhwanga na bhanyinefwekulu? Bhakabhajhihaghanga bhalya ^bhakalaghulanga kwisa kwajhe ghulya Muhosya Musila Kanyanyala.t Umwe ghoogho mwamuteelanyia mwanamwihagha. 53 Umwe ghomwe mwakapokelanga Kabhāngo kakalentwanga na misambwa kumwenyu, tukubha temwakakanīghanga.”
Sitefano alikwihaghwa
54 Bhalya bhakulu bha ibhalasa bhobhakabhanga bhahulika ghaagho, bhaghājha nkana, bhajha kutetaghula meeno ku sisila. 55 Tukubha unyene Sitefano nabhumbiike Mwēgho Mulafu ghweke Kabhumba, ghajhelekesya menso ghaajhe mwi ighūlu, ghaalōla bhukulu bhweke Kabhumba, no Jheesu najhughalele ku luhande lwa kwene lweke Kabhumba. 56 Sitefano ghaabhala, “Nandōla ighūlu lyajhighuka, no Mwana ghwa Muntuu ajhughalele ku luhande lwa kwene lweke Kabhumba.”
57 Tukubha bheene bhatangiila ku silongo sikulu, bhajhīghala matwi, bhamughwako Sitefano, 58 bhamufumya kunse na lugho, bhasumbula kumuhuula na mabhwe. Bhalya bhakalōla bhafuula maghwanda ghaabho, bhabhiika ha maghūlu gha mulughalugha ghumwi ^akabheele najhitilwe Sauli. 59 Mukubha bhalikumuhuula na mabhwe Sitefano, ghakatendajhyukanga ghaabhala, “Taata Bhusya Jheesu, ndikusumalikila mu mabhoko ghoobhe.” 60 Kundi ghasukama, ghalīla ku silongo sikulu, ghaabhala, “Taata Bhusya, nosighakūngi ghaagha mabhi ghobhalikunjīlila.” Bhoghakabhanga ghahwa kutenda ghaagho, kundi ghasumaalika.