Bhantu ndwi bhalikusāaghulwa bha kubhafūnaanila mintengwe
6
Mu seesyo nfuku bhahemba bheke Jheesu bhakabheele bhalikughungilika. Haaho hakasūlikanga kung'wing'a ku Bhajhahudi ^bhakabheele bhatenda Sijhunania bhabhang'wing'ila bhalya ^bhakabheele bhatenda Sihebhulania. Bhalya ^bhakabheele bhalikutenda Sijhunani bhakajhanga kung'wing'a ti bhalekwa bhaabho bhakabheele bhalēkwa ku bhughabhusi bhwa fyakulya fya nfuku syonse. 2 Bhalya mintengwe ikumi na bhabhili bhakomenkanyia bhahemba bhonse bhabhala, “Te fisogha ufwe tulēke mulīmo ghwa kutangaasya Ighāmbo lyeke Kabhumba, tukole mulīmo ghwa kughābhula fyakulya. 3 Kansi umwe bhaabho, sāaghule mu umwe bhanabhaghoosi ndwi bhali ne mpunda nsogha, bhakanya masāla, bhakukabha bhabhumbiike Mwēgho Mulafu ghweke Kabhumba.b Bhaabho tubhaheekesye ghoogho mulīmo, 4 akulinga ufwe tubhe ne ikunka ikulu lya kutendajhyuka no kutangaasya Ighāmbo lyeke Kabhumba.”5 Mukubha bhahulika ighāmbo leelyo, bhonse bhasaata. Bhasāaghulamo Sitefano, muntu ^amwisighile Kabhumba, abhumbiike Mwēgho Mulafu ghweke Kabhumba, hamwi no Filipo, Pulokolo, Nikanoli, Timoni, Palumena no Nikolao ghwa ku Antiokia asikabheele Mujhahudi, ghakepampikanga ku Bhajhahudi ghabha nalikumupeela Kabhumba. 6 Bhaabho bhanabhaghoosi ndwi bhabhabhiika ha mbele jhya mintengwe. Mintengwe bhabhaghambikako mabhoko, bhabhatendajhyukila bhatambe lwa mpemba mu milīmo. 7 Ighāmbo lyeke Kabhumba lyajha lyakwila, na bhahemba bhaghungilika nkana mu Jhelusalemu. Kumwi na bhapeesi bhengi naagho bhamwisigha Jheesu.
Kunīghwa kweke Sitefano
8 No Sitefano napambuliilwe managha gheke Kabhumba, akabheele nalikwīla lusante na maleebha makulu, bhantu bhamwilōleela. 9 Tukubha bhandi bhantu bhajha kughatuna maghāmbo gheke Sitefano. Bhaabho bhantu bhakabheele bha mu nyumba jhya kusangaanilamoc ^jhikabheele jhijhitilwe, “Nyumba jhya kusangaanilamo ku Bhakalekuululwa kufuma mu bhusya.” Mu bhaabho bhandi bhakafumanga ku Kilene, ku Alekisandilia, bhandi bhafuma ku Kilikia no ku Asia. 10 Tukubha tebhakakobholanga kumughola bhukohela akabheele na masāla kufuma kwa Mwēgho Mulafu ghweke Kabhumba. 11 Kundi ku mbali bhamusongelela ku bhantu bhabhala, “Sitefano alikutenda maghāmbo mabhi gha matusi kwa Musa no kwa Kabhumba.” 12 Ku teetyo bhajha kubhasonganyia bhantu, bhaghosibhakulu na bhamakota bha Kabhāngo. Kundi bhamunīgha Sitefano bhamufela kwi ibhalasa.d 13 Kooko kwi ibhalasa bhajhughalalika bhantu, bhajha kutenda maghāmbo gha malami bhabhala, “Ghooghu muntu tyalēkile kutenda maghāmbo mabhi ku Nyumba jhyetu jhya Ipeelelo no ku Kabhāngo keke Musa. 14 Bhukohela twamuhulika nalikubhala itye, ‘Ghooghu Jheesu ghwa ku Nasaleti, alakuhabhiihya hanu ha Nyumba jhya Ipeelelo na malāngululo ghonse ghotuheebhilwe na Musa.’”
15 Bhantu bhonse bhakabheele mu lilya ibhalasa mukubha bhamukūngiile Sitefano, bhusyu bhwajhe bhwajha kujhengajhenga kobhe bhwa misambwa.