Malami gheke Anania no Safila
5
Hakabheele muntu ghumwi isiina lyajhe Anania, akabheele no mukasi najhitilwe Safila. Bhaabho naagho, bhakaghūsyanga ibhāla lyabho. 2 Anania teghakalubhusyanga mahela ghonse ghobhakabheele bhaghūsya, ghakafisanga ghandi. Bhakehulikanga no mukasi kufisa mahela. Anania ghafela ghalya mahela ghakasibhanga kwa mintengwe, ghaabhala ti gho ghaagha mahela ghonangūsyanga ibhāla.3 Tukubha Petelo ghamulomba ghaabhala, “Ughwe Anania! Nasi Syetania ghajhingila mu mwēgho ghoobhe, ghwatenda malami kwa Mwēgho Mulafu ghweke Kabhumba?b Ulikubhala ti ghwalenta mahela ghonse ghomwaghūsyanga ibhāla kansi ghandi ghwaghafisa. 4 Bhokabheele nosyali kulighūsya ibhāla, likabheele nsābho jhyobhe, no bhokabheele ghwalighūsya, ghaagho mahela ghakabheele gha koobhe, unakaghakosye bhohensile. Nonwe ni sighanyi syasūla ghwajhīla bhoobhu? Tutensile malami ku bhantu, ghwatenda malami kwa Kabhumba.”
5 Anania bhoghakabhanga ghahulika ghaagha maghāmbo ghoghakatendanga Petelo, haahoe ghaghwa hansi, ghafwa. Bhantu bhonse ^bhakaghahulikanga ghaagho, bhasūpa nkana. 6 Bhajhisa bhalughalugha bhamutwala, bhaghuhamba mu sanda mutūmba ghwajhe, bhakaghusiika.
7 Bhoghakabhanga ghahita mansa kobhe atatu, mukasi nagho ghajhisa ghajhingila mukati, tyajhinsi ne fyasūlika. 8 Petelo ghamubhasya ghaabhala, “Ntānyisye, ghaagha gho mahela ghonse ghomwapātanga bhomwaghūsyanga ibhāla lyenyu?” Ghahindula ghaabhala, “Elo! Twaghūsyanga ku ghaagho mahela.” 9 Petelo ghamulomba ghaabhala, “Fyabhanga bhuti ughwe ne ibhalo mwalihulika kutenda malami kumutēbha Mwēgho Mulafu ghweke Sifwe Bhusya Kabhumba? Akūnga bhalughalugha bhamusiika ibhalo, bhaheleela, bhali ha mulyāngo, bhalakukufela kunse noghwe!”
10 Haahoe Safila ghaghwa hansi mu maghūlu ibhānda gheke Petelo, ghafwa. Bhalya bhalughalugha bhobhakabhanga bhajhingila, bhasangaana Safila nagho ghafwa. Bhamufumya kunse, bhamusiika ha bhwihi ne ibha. 11 Leelyo ighāmbo lyakasūlanga bhahemba bhonse, hamwi na bhandi bhonse ^bhakahulikanga seesyo mpola, bhaghubhaha nkana.
Mintengwe bheke Jheesu bhalikwīla maleebha mengi
12 Mintengwe bheke Jheesu bhakajhōjhyanga lusante na maleebha mengi, bhantu bhaghalōla. Na bhahemba bhonse ku mwēgho ghumwi bhakabheele tebhakomenkana ha Nyumba Nkulu jhya Ipeelelo lyeke Kabhumba, luhande lukabheele lujhitilwe ibhanja lyeke Solomoni. 13 Hamwi na bhantu kubhafela mpunda bhahemba bheke Jheesu, tukubha bhakaghubhahanga kwipampika kumwi nabho. 14 Hamwi na ghaagho, mulēgha ghwa bhantu ^bhakabheele bhalikumwisigha Sifwe Bhusya Jheesu, bhakabheele bhalikughungilika nkana, bhakeema ku bhaghoosi. 15 Bhantu ^bhakabheele na bhalwele bhakabheele bhalikubhafela ku mbalimbali na nsīla. Haaho bhakabheele bhalikubhalaasya ku tuliili no ku mikēka, akulinga Petelo kubha nalikuhita, bhakukabha bhahitilwa singa tu ne linsimwansimwa lyajhe, bhasile. 16 Linyabhwingi lya bhantu kufuma mu ngo ^sikabheele siniengele lugho lwa Jhelusalemu, bhakabheele bhalikukomenkana. Mu kukomenkana, bhalikulenta bhalwele bhaabho, na ^bhakabheele na mamisāgha, bhonse bhakasisibhwanga.
Mintengwe bheke Jheesu bhalikusanfisibhwa
17 Kundi mupeesi mukuluc hamwi na bhenaajhe bhalya Bhasadukaajho, bhaabha bhalikubhalōlela ibhubha mintengwe bheke Jheesu. 18 Haaho bhabhanīgha bhabheghalila mwi ighelesya. 19 Tukubha bhufuku bhoobho, musambwa ghweke Kabhumba ghajhisa, ghajhighūla milyāngo jhya ighelesya, ghabhafumya kunse. Kundi ghabhalomba ghaabhala, 20 “Kajhe mu lusinga lwa Nyumba Nkulu jhya Ipeelelo, mukabhalombe bhantu maghāmbo ghonse gha bhupanga bhwa nfuku syonse.” 21 Bhobhakabhanga bhaghahulika ghaagho, bhakajhanga mulāabho mulāabho mu lusinga lwa Nyumba Nkulu jhya Ipeelelo mu kulāngulula Ighāmbo lyeke Kabhumba.
Mu leelyo ikunkae, mupeesi mukulu na bhenaajhe, bhajhita bhakulu bhonse bha Bhesilaheeli bhasangaane mwi ibhalasa ikulu.d Bhalaghiila bhakanya kulalilila ighelesya bhajhe bhakabhajhite mintengwe. 22 Bhobhakabhanga bhafīka tebhakabhalōlanga mwi ighelesya. Kundi bhaheleela mukafumya lupola bhabhala, 23 “Bhotwafīkanga he ighelesya, twasānganga milyāngo jhyonse jhijhigheele fisogha, na bhakanya kulalilila bhajhughalele ha mulyāngo. Tukubha bhotwajhīghulanga twajhingila mukati, tetwalōlanga muntu ghoghonse.” 24 Mukulu ghwa bhakanya kulalilila Nyumba Nkulu jhya Ipeelelo na bhapeesi bhakulu, bhobhakahulikanga ghaagho maghāmbo fyabhalubha, bhajha kwibhasya, “Leeli ighāmbo lilakubha bhuti?” 25 Kundi hajhisa muntu ghumwi ghabhalomba ghaabhala, “Ahulikisye! Bhantu bhomukajhīghaliile mwi ighelesya, bhali mu lusinga lwa Nyumba Nkulu jhya Ipeelelo bhalikulāngulula bhantu!” 26 Kundi ghulya mukulu ghwa bhasilikale, hamwi na bhasilikale bhaajhe, bhaajha bhakabhatwala bhalya mintengwe bhabhalenta. Tebhakabhafelanga ku managha, bhakaghubhahanga kuhuulwa na mabhwe.
27 Bhobhakabhanga bhabhafīsya mwi ibhalasa, bhabhajhughalalika ha mbele jhya bhonse. Kundi mupeesi mukulu ghabhabhasya ghaabhala, 28 “Teeti, tetwakamulesyanga tukaliihe kubhala ti lēke kulāngulula bhantu kwi isiina lyeke Jheesu? Tukubha umwe mwalalasya maghāmbo gha malāngululo ghaagho, mu lugho lonse lwa Jhelusalemu! Kabhili mulikubhala, maghāmbo ghonse gha kufwa kwajhe ghali kumwetu!” 29 Petelo ne mintengwe bhenaajhe bhabhala, “Ghwa kutiikisya ni Kabhumba bhuhela, te muntu. 30 Kabhumba ghwa bhanyinefwekulu ghakamusyulanga Jheesu kufuma ku bhafu, hamwi no kubha umwe mwakamwihaghanga mwamubhamba ku musalabha. 31 Kabhumba ghakamujhimbika ghamubhiika ku kubhoko kwajhe kwa kwene, akulinga abhe Mukulu, Kasābhula. Ghaagho ghonse ni kuhensa Bhesilaheeli bhaghalaghale, bhalesibhwe bhubhi bhwabho. 32 Ufwe hamwi no Mwēgho Mulafu, Kabhumba ghwabhaheele bhantu bhonse bhamutikiisye, tuli bhakalōla bha maghāmbo ghonse ghaagho.”
33 Bhakulu bha ibhalasa bhobhakabhanga bhahulika ghaagho, bhaghājha nkana, bhahensa kubhehagha Petelo na bhenaajhe. 34 Tukubha mu leelyo ibhalasa, akabheelemo Mufalisaajhoe ghumwi isiina lyajhe Ghamalyeli. Ghoogho akabheele ikota ghwa Kabhāngo keke Musa, ni muntu ^akabheele natikisiibhwe nkana na bhantu bhonse. Ghajhughalala ha mbele jhya ibhalasa, ghahamulisya bhalya mintengwe bhafume kunse nyinambele. 35 Kundi ghabhalomba bhaghosibhakulu bhenaajhe ghaabhala, “Ale bhajhango bha mwi Isilaheeli hulikisye, langanyie fisogha nyinambele ghaagha ghomulikuhensa kubhēlila bhaabha bhantu. 36 Jhisukile mafuku ghakahitile, hakalōleeke muntu ghumwi isiina lyajhe Teuda. Ghoogho Teuda, ghakejhīlangako muntu mukulu, na bhantu kobhe maghāna ane bhakabheele kumwi naajhe. Tukubha ku bhuhela bhwajhe ghajhihaghwa, bhonse bhwakabheele nabho bhasambaala. Milīmo jhyajhe jhyabha jhyafwa. 37 Kabhili, mu mafuku ghalya selekali jhilikupanda bhantu, hakalōlekanga Mughalilaajha ghumwi isiina lyajhe Jhuuda. Ghoogho naagho ghakabhanga na bhahemba bhengi bha kumulōnda kupumpuka ku selekali, naagho ghajhihaghwa, bhahemba bhaajhe bhasambaala. 38 Nonwe ndikumilomba kubhala, musibhasanfi bhaabha bhantu, bhalēke. Jheejhi milīmo jhyobhalikukola kubha jhili jhya bhantu tue, jhilakuhela ha lusaka. 39 Tukubha, kubha jhifumile kwa Kabhumba, temunakobhola kubhalēsya, mulakubha mulikumulēsya Kabhumba nyene.”
Kundi bhenaajhe bhaghaswa ghalya maghāmbo. 40 Kundi bhabhajhita mukati bhalya mintengwe, bhalaghiila bhabhahuule na sibhooko. Haaho bhabhakabha bhasibhi bhalikubhalāngulula bhantu kwi isiina lyeke Jheesu, bhabhalekuulula, bhaajha ku myabho.
41 Mintengwe bhafuma mu leelyo ibhalasa bhasangabheele bhukohela, bhalya bhakulu bha ibhalasa bhabhahaafusya, kobhe bhobhakamuhaafusyanga no Jheesu. Tukubha bhajhinsi ti Kabhumba ghabhanywamika. 42 Nfuku syonse bhakabheele bhalikubhatānyisya bhantu, no kulāngulula Ighāmbo lyeke Kabhumba mu lusinga lwa Nyumba Nkulu jhya Ipeelelo, no mu nyumba sya bhantu. Tebhakalēkanga kubhalomba bhantu Sikūla Sisogha sya kubhala ti Jheesu gho Muhosya kufuma kwa Kabhumba.