Petelo no Jhohana bhalikufelwa mwi ibhalasa lya Bhajhahudi
4
Mukubha Petelo no Jhohana bhasyali bhalikutenda na bhantu, halabhuka bhapeesi,a kalombo ghwa bhalalilisi bha Nyumba Nkulu jhya Ipeelelo lyeke Kabhumba na bhandi mu Bhasadukaajho.b 2 Bhaabho bhantu bhajhisa bhaghājhile nkana, bhukohela Petelo no Jhohana mu kulāngulula bhantu bhalikubhala ti, Jheesu ghakasyukanga kufuma kusimu. Kusyuka kweke Jheesu gho kulikulānsya ti Kabhumba alokabhasyula bhafu. 3 Kundi bhabhanīgha, tukubha bhoghukabheele ghwabha mugholo bhabhafela mwi ighelesya bhalalamo. 4 Tukubha ghalya malāngululo gheke Petelo no Jhohana ghobhakabheele bhabhalomba bhantu, bhengi bhakabheele bhahwa kughaswa. Bhantu ^bhakabheele bhaghaswa ghalya maghāmbo, bhanamwisigha no Jheesu, bhanabhaghoosi bhakabheele kobhe elufu itaanu.5 Mulāabho ghwajhe, bhapeesi bhakulu, bhaghosibhakulu bha Bhajhahudi na bhamakota bha Kabhāngo bhakomenkana ha Jhelusalemu, 6 Mu leelyo ibhalasa,c akabheelemo Anasi ^akabheele mukulu ghwa bhapeesi, Kajhafa, Jhohana, Alekisanda na bhandi bhantu bha bhukwa bhweke mupeesi mukulu. 7 Haaho bhalaghiila Petelo no Jhohana bhalentwe mwi ibhalasa, bhabhajhughalalika hakati, bhajha kubhabhasya bhabhala, “Ghaagha maghāmbo ghomwakola, mwaghakola ku managha gheke ghanyi? Amilaghiisile kukola ghaagha ni ghanyi?” 8 Kundi Petelo nabhumbiike Mwēgho Mulafu ghweke Kabhumbad ghaabhala, “Ale bhanyampala nomwe bhaghosibhakulu bha mwi Isilaheeli, 9 mulikutubhasilisya maghāmbo mengi ku masogha ghoghajhīlilwa ghooghu muntu akabheele sisyeta. Mulikutubhasya kubhala ti ghasila bhuti. 10 Umwe mwense, hamwi na Bhesilaheeli bhonse, ndikuhensa mumānye kubhala, ghooghu muntu ajhughalele ha mbele jhyenyu ghasila ku managha gha isiina lyeke Jheesu Kiliisito ghwa ku Nasaleti. Jheesu gho ghulya ghomwakabhambanga ku musalabha, tukubha Kabhumba ghamusyula kufuma ku bhafu. 11 Ghoogho gho atendelelwe mwi Ighāmbo lyeke Kabhumba kubhala,
‘Ibhwe lyomwakatunanga umwe bhaghubhaki,
nonwe gho ibhwe ikulu lya ku kapako.’e
12 “Ni hatuhu ghundi ghoghonse akobhwele kutusābhula, bhukohela ni hatuhu lindi isiina lyotuheebhilwe ha bhweleelo lili na managha gha kutusābhula ufwe.”
13 Bhalya bhakulu bha ibhalasa bhobhakalōlanga Petelo no Jhohana bhobhalikutenda ku bhusimu, bhalikosa mahi, bhukohela ni bhantu bhasila kisomo jhyojhyonse. Kundi bhamānya ti Petelo no Jhohana bhakabheele kumwi na Jheesu. 14 Bhukohela ghulya muntu ghakasilanga bhwakabheele najhughalele no Petelo no Jhohana, bhantu bhonse bhabhwene, bhakabhulwanga lya kutenda. 15 Kundi bhalya bhakulu bhabhalomba Petelo no Jhohana bhafume kunse, bhasīibha bhalikutensanyia bheene ku bheene. 16 Mukubha bhali mu kalimbo bhabhala, “Tulakubhēla bhuti bhaabha bhantu? Bhekasi bhonse bha mu Jhelusalemu bhajhinsi kubhala ti bhaajhīla lusante lukulu lusinakobholeka, ufwe tetunakobhola kutuna. 17 Nonwe tubhakalihile bhasijhililiki no ghooghu mulīmo ghwa kubhalomba no kubhasisya bhantu kwi isiina lyeke Jheesu, akubha seesi mpola sisikwili ku bhantu.”
18 Kundi bhalya bhakulu bha ibhalasa bhabhajhita Petelo no Jhohana, bhajha kubhakalihila bhabhala, “Musilitibhi kabhili leelyo isiina, ajhe kubhalāngulula bhantu kwi isiina lyeke Jheesu.” 19 Tukubha Petelo no Jhohana bhabhahindula bhabhala, “Kookwe ghakale mwebheene, bhwene ni bhuuhe, kumihulikisya umwe bhantu, ajhe kumuhulikisya Kabhumba? 20 Ufwe tetunalēka kughatenda ghotwakahulikanga no ghotwakalōlanga.”
21 Petelo no Jhohana bhobhakabhanga bhahwa kutenda ghaagho, bhakulu bha ibhalasa bhabhakalihila nkana, kundi bhabhalēka bhaajha. Tukubha tebhakabhēlanga ighāmbo lyolyonse ibhi, bhukohela bhantu bhonse bhakabheele bhalikumulumba Kabhumba ku maghāmbo ghonse ^ghakabheele ghakoleka. 22 Ghoogho muntu ^ghakasilanga ku leeli ileebha, akabheele na myaka kusumba makumi ane.
Mintengwe bheke Jheesu bhalikumusēegha Kabhumba abhasīipye
23 Petelo no Jhohana bhobhakabhanga bhalekuululwa, bhaheleela ku bhahemba bhenaabho, bhabhalomba maghāmbo ghonse ghobhakalombwanga na bhapeesi bhakulu na bhaghosibhakulu bha Bhajhahudi. 24 Mukubha bhenaabho bhahulika ghaagho, kundi bhonse silihamwi bhajha kumusēegha Kabhumba bhabhala, “Ee Sifwe Bhusya Mukulu ghwa fyonse, ughwe ghoghwe ubhunfile ighūlu ne ntambo, tanganika ne fyonse filimo. 25 Ghoghwe ghwakatendanga ku Mwēgho Mulafu ghweke Kabhumba kuhitila kwa nyinefwekulu Daudi,f mukola milīmo ghoobhe kubhala,
‘Nasi bhantu bha findi fihugho bhalikughājha?
Kabhili nasi bhantu bha tutendelo tundi bhalikulanganyia kukola fintu fibhi?
26 Bhaami bha ha bhweleelo,
na bhandi bhakalombo, bhakomenkana hamwi,
akulinga bhamutune Sifwe Bhusya Kabhumba
no Muhosyag ghoghalibhiika.’h
27 “Ni bhwene, mwami Helodei no Pontio Pilaato, bhakakomenkananga hamwi na Bhajhahudi na bhantu bhasili Bhajhahudi bha mu loolu lugho, bhamubhuuluke Jheesu mukola milīmo ghoobhe Musila Kanyanyala gho ghwalisāaghula abhe Muhosya. 28 Ghaagho ghobhakēlanga bhaabho, ghokabheele nobhasile kufuma kale ghakoleke ku managha ghoobhe no ku kutēha koobhe. 29 Ee Sifwe Bhusya, ubhwene bhuli bhobhalikutusūpika. Nonwe tufūnaanile ufwe bhakola milīmo bhoobhe tubhe na bhusimu bhwa kutenda Ighāmbo lyobhe. 30 Gholola kubhoko koobhe ubhasisye bhalwele, ujhīle lusante na maleebha kwi isiina lyeke Jheesu mukola milīmo ghoobhe Musila Kanyanyala.”
31 Bhobhakabhanga bhahwa kutendajhyuka kwa Kabhumba, halya hobhakabheele bhakomenkana hatengana. Bhonse bhabhumbika managha gha Mwēgho Mulafu ghweke Kabhumba, bhajha kubhalāngulula bhantu Ighāmbo lyeke Kabhumba ku bhusimu.
Bhahemba bhalikuliila hamwi fintu fyabho
32 Bhonse bhakamwisighanga Jheesu, bhakabheele na mwēgho ghumwi. Tehakabheele ghwa kubhala ti fintu fyali nafyo ni fya kumwajhe, fyonse bhakabheele bhafikolela kumwi. 33 Mintengwe bheke Jheesu bhakabheele bhalikubhalomba bhantu ku managha kubhala, Jheesu ghakasyukanga kufuma ku bhafu. No Kabhumba ghakabhapambulilanga nkana. 34 Hatuhu ^akabheele naseheelwe sintu, bhukohela mu bhaabho bhantu ^bhakabheele na mabhāla ajhe nyumba, bhakabheele tebhaghūsya, bhalenta mahela gha fintu fyobhaghūsya, 35 bhaghafela kwa mintengwe, naagho ketebhamuheekesya muntu kulōnda filya fyalikusamba. 36 Hakabheele Mulawij ghumwi isiina lyajhe Jhusufu, ghwa kufuukila mu kalila ka Kiipulo. Mintengwe bheke Jheesu bhakamwilikangako Bhalinaabha. Kubhala bhoobho ni kubhala, “Ghwa kubhasīkya mwēgho.” 37 Ghoogho naagho ghaghūsya ibhāla lyajhe, mahela ghaghafela kwa mintengwe.