Ngunaab xaa yud lo Dios kwent cheen re xaa nayii ne xaa
Kwaan nzholl xaa, Salm kwaan mkee David, nu mzaa xaaya lo xaa nabeyy lo re xaa nzholl.
108
Xtios na,
nali nak lextoo na lo lu;
listla nzo na gol na salm lo lu.
2 Yixche na nu gol na lo lu kwaan bagwel kwaan nkano chiibchop yib
nu yixche na garziil zee gol na lo lu kwaan bagwel kwaan nkano chii yib.
3 Xaa Tubka Nak,
lee na gol lo lu delant lo re xaa;
gol na salm lo lu delant lo re yezh.
4 Gro doo nak yalnkela cheen lu nzhina axta yiba;
¡nu axta lo xkaw nzhin xtizh lu kwaan wli!
5 ¡Lee lu Dios,
non doo lu naz leen yiba
nu yalnabeyy cheen lu nzho dubse lo yizhyo!
6 ¡Ble yud nu kwaan yalnabeyy cheen lu!
¡Bkeb zee nzho mod le lu yud nu!
7 Dios ngunii axta pa nak leen li xaa:
“Gak nix lextoo na kiiz na yizhyo Siquem
nu za na yizhyo lach cheen Sucot lo re xaa na.
8 Cheen na nak yizhyo Galaad
nu cheen na nak Manasés;
Efraín nak kwaan nsaaw yek na
nu Judá nak bastona kwaan nzho yaa na.
9 Moab nak chee kwaan nyanag na leen,
lo Edom nlebi na xkelyed na;
nu nkee na bi nel mle na gan lo re xaa Filistea.”
10 ¿Cho wee na lo yezh kwaan nyaaw bla?
¿Cho wee na zee zeeb na leen yizhyo Edom?
11 Telise luya Xtios na,
che naleet lu mlaa lu nu,
per mlaa lu nu,
nu nanyatra lu kwaan re xsoldad nu lo dil.
12 Ble yud nu lo xaa nayii ne nu,
nanont yud cheen re myet.
13 ¡Kwaan yud cheen Dios telise le be re kwaan gro;
lee xaa taazh tich re xaa nayii ne be!