Naab xaa zee lux re xaa nakap
Salm kwaan mkee David nu mzaa xaaya lo xaa nabeyy lo re xaa nzholl.
109
Dios,
xaa nzholl na lo,
keb lo na.
2 Nel roo re xaa nakap
nu roo re xaa nkade,
nzhedizh nawent xaa na
nu nzhib xaa kwaan nawlit tich na.
3 Nzhedizh nawent xaa na,
ndil xaa kwaan na nixa namlet na nik kwaan lo xaa.
4 Lee na nle wen lo xaa,
nu lee xaa nayii ne na,
per lee na tubka nii xkwent xaa lo Dios.
5 Nle na kwaan wen lo xaa,
per lee xaa nle kwaan nawent lo na,
nkela na xaa,
per lee xaa nayii ne na.
6 Nzhekla na zo lu tub xaa nakap lo xaa
nu lee lad li lo xaa zo tub xaa gaazh kwaan tich xaa.
7 Lee gorna naab xaa kwent lo xaa,
nzhekla na zee gak xaa xaa nzeb jwalt
nu lee kwaan nii xaa lo Dios le zee kwibra mas jwalt tich xaa.
8 Nzhekla na cheepse gak liin kwaan ban xaa
nu stub xaa kayaa xchinn xaa.
9 Nzhekla na lee re xinn xaa lake ngwzeb
nu lee sa xaa lake byud.
10 Nzhekla na lee re xinn xaa gak xaa nkanze nu naab xaa karda
nu kwaan xaa pa yo xaa.
11 Nzhekla na lee xaa nzeb xaa lo kiib re kwaan nkano xaa
nu re xaa zit kiib re kwaan nzhaan xaa.
12 Nzhekla na nayot xaa kano yalnles lo xaa,
nixa nayot xaa kano yalnles lo re xinn xaa,
xaa ngwzeb.
13 Nzhekla na tira lux re dii cheen xaa,
zee zhe le xaa lo re dii kwaan nze gwluzh.
14 Nzhekla na lee Xaa Tubka Nak,
nayenlazht jwalt cheen xuz xaa
nu nazhet jwalt cheen xnaa xaa.
15 Nzhekla na lee Xaa Tubka Nak,
tubka wii lo re xjwalt xaa
nu nyentra cho selazh xaa lo yizhyo.
16 Nel myenlazh xaa kano xaa yalnles lo re xaa prob,
lo xaa nadoo nu lo xaa nales nzhak,
mrenal xaa xaa nu axta mbit xaa xaa.
17 Nel ngula xaa nxobde xaa,
la yalxobde yek xaa,
nel nangulat xaa nii wen xaa lo xaa,
laa bachi kwaan wen lo xaa.
18 Kwaan nxobde xaa nak kwenta ler kwaan nzhak xaa
nu nzeeba cho xaa kwenta nis
nu nzeeba leen zhit cheen xaa kwenta nseyt.
19 Nzhekla na kwaan nxobde xaa gak ler cheen xaa
nu tubka ziiya lextoo xaa kwentaxa nzii yed leen xaa.
20 Nzhekla na kix Xaa Tubka Nak,
lo re xaa ne,
xaa nii nawent na
nu lo re xaa nzhedizh nawent na.
21 Per lu,
Xaa Tubka Nak,
Xaa Nabeyy na,
wen le lo na sbaa lee re myet nii wen le lu;
bloo na,
nel wen nak yalnkela cheen lu.
22 Nel prob na nu nales nzhak na
nu mweey lextoo na.
23 Nya na kwenta xkaw kwaan nded
nu ngol mbi na kwenta mbeso.
24 Ngulo nxiz nii na nel nkwan na
nu ngulo mles na nel nanzhawt na.
25 Na nak xkit cheen re xaa
nu nebse yek xaa nkun xaa,
nel nxizhno xaa na.
26 Xtios na,
Xaa Tubka Nak le yud na,
¡kanap na kwaan yalnkela cheen lu!
27 Zee ne re xaa lee kwaane nak kwaan mle lu,
nel leeka lu,
Xaa Tubka Nak,
nak xaa mleya.
28 Nexa per xobde xaa lo na,
per lee lu nii wen lo na.
Nzho mod kee xaaya yek na,
per ton xaa,
per lee xmos lu gak nix lextoo.
29 Rese xaa nayii ne na luu xkalnto,
nu xkalnto xaa luu kwenta tub ler kwaan nzhak xaa.
30 Per lee na za dixkix lo Xaa Tubka Nak
nu gol na pa nzhi zyen doo xaa.
31 Nel lee xaa nzo le yud re xaa prob,
zee kanap xaa xaa lo re xaa naab kwent lo xaa.