Yech yilo cheen
Samuel
Xomod ngol Samuel
1
Ngu tub xaa leen re yi cheen Efraín, xaa le Elcana. Ngu xaa yezh Ramataim cheen re xaa Zuf. Elcana ngok xgann Jeroham, xaa ngok xgann Eliú, xgann Tohu, xgann Zuf, xaa nak dii cheen Efraín. 2 Elcana mkano chop ngwnaa; tub me le An lee stub me le Penina. Penina nkano chop xgann, per lee Ana nankanot mad. 3 Rese liin Elcana nya naz yezh Silo nyayoll lo Xaa Tubka Nak nu nya ted xaa ma lo Xaa Tubka Nak, xaa nkano dubse yalnabeyy. Naz ba nzho rop xgann Li, Ofni nu Finees, xaa ngok ngwleyy cheen Xaa Tubka Nak. 4 Nu gorna mzhin mbizh kwaan nted Elcana ma, zee nzaa xaa baal nyalzo Penina nu kwaan nyalzo re xgann me nu re xchaap me. 5 Per lo An mzaa xaa tub lee baal kwaan wen doo, nel nkedoola xaa me. Nu nixa namzaat Xaa Tubka Nak nik tub mad lo me. 6 Per lee Penina mle zee nayii ngok An nu xizhno me me nel Xaa Tubka Nak namzaat mad lo me. 7 Nu yizata liin gorna nya xaa garli Xaa Tubka Nak, lee Penina tubka nchaldil me An zee nzhonn me nu nanzhawt me. 8 Zee nzhé Elcana lo sa xaa: "An, ¿chozhiin nzhonn lu? ¿Chozhiin nanzhawt lu? ¿Chozhiin nales doo nzhak lextoo lu? ¿Che nanakta na xwara lo chii mad lo lu?9 Nu welt gorna nzo An naz Silo, gorna ngulo ndaw me rop sa nu ngwa me roo li Xaa Tubka Nak, pa mzob ngwleyy Li gax roo Li Xaa Tubka Nak. 10 Kwaan yalnales doo ngunii me lo Xaa Tubka Nak nu mbinn doo me. 11 Zee myaan me nu nzhé me: "Me Tubka Nak, me nkano dubse yalnabeyy, blesla lu ne lu na, me nak xmos lu. Nalaat lu deed na bid, bzaa tub madbyi lo na, zee za na mad le mad zhiin lo lu dubse mbizh kwaan mban mad, nu tira nachoogt mad yich yek mad.a
12 Nu xche doo ngunii me lo Xaa Tubka Nak, zee ngwii Li roo me. 13 Per xlaan nii me lo Dios nebse ngun roo me, nu nanyunt nel cho kwaan nii me, zee lee Li mle xgab nzuzh me.
14 Zee lee Li nzhé lo me:
—¿Axta pa gor kaxni lu? ¡Blaa nzoo!
15 Zee lee An mkeb nu nzhé:
—Aka, me nabeyy na; nanzuzht na sinka nales doo nzhak na zee nzhal na nii na rese kwaan nzhekla na lo Me Tubka Nak. 16 Nazobt lu na mod tub me nawent; sinka lee na mbdizh kwaan Me Tubka Nak nel nales doo nzhak na lo re xgab cheen na.
17 Zee lee Li mkeb nu nzhé:
—Wen nya lu, Dios cheen xaa Israel zaa kwaan ngunaab lu lo xaa.
18 Zee lee An mkeb nu nzhé:
—Wen chol tubka chul nii lu lo na, me nak xmos lu.
Nu nya me ndaw me nu nangoktnalestra lextoo me.
19 Nu stub mbizh garziil doo nguxche Elcana nu re xaa li xaa, nu ngwa re xaa mbill xaa lo Xaa Tubka Nak, nu nya xaa naz garli xaa naz Ramá. 20 Nu gorna lee Ana mbeyxinn nu gorna mzhin mbizh kwaan ngol xiin me nu mlole me mad Samuel nel ngunaab me mad Xaa Tubka Nak.
21 Zee stub liin ngwa Elcana kwaan re xaa li xaa, zee teed xaa ma lo Xaa Tubka Nak modxa nle xaa yizata liin, zee le xaa kwaan myaan xaa. 22 Per lee An nangwat kwaan re xaa, zee nzhé me lo sa me: "Nayat na nal sinka lee na ya axta gorna lee mad roo nizh, zee we na mad, zee za na mad lo Me Tubka Nak, zee tira lake mad baa dubse mbizh kwaan mban mad". 23 Zee mkeb Elcana lo me nu nzhé xaa: "Le kwaan nzak lu wen, nu kwaz axta gorna yilo roo mad nizh, zee le Me Tubka Nak kwaan né me lo lu ".
Zee mlake me baa, axta ngulo mroo mad nizh. 24 Nu gorna ngulo mroo mad nizh zee mbe me mad garli Xaa Tubka Nak naz Silo nixa win mad, nu mbe me chon la ngoon yeen nu tub chiinmtub kil arin nu tub mbud yed kwaan nzho xis ub leen. 25 Zee mted ngwleyy ngoon yeen ma mbe me lo Li. 26 Zee lee An nzhé:
—Me nabeyy na, wlipa na, na ngunii lo lu, na nak ngwnaa me kwaan mzo lo lu, gorna ngunii na lo Me Tubka Nak. 27 Ngunaab na madwin ne lo Me Tubka Nak, zee mzaa me mad lo na. 28 Lee nal za na mad lo Me Tubka Nak zee dubse mbizh kwaan mban mad le mad zhiin lo Me Tubka Nak.
Nu zee mbill xaa lo Xaa Tubka Nak.