Xaa nabeyy
Judá nu Simeón mkiib yizhyo Adoni-bezec
1
13Gorna ngulo ngut Josué, zee lee re xaa Israel ngunabdizh lo XaaTubka Nak:—¿Cho tub re nu yixoob dil kwaan re xaa Canaán?
2 Zee mkeb Xaa Tubka Nak:
—Lee dii cheen Judá yixoob yilo; nel lo xaa mzaa na re yezh baa lo.
3 Zee nzhé Judá lo wech xaa Simeón:
—Chaa ya be yizhyo kwaan ngolzo nu, zee dil be kwaan re xaa Canaán; zeera ya be yizhyo kwaan ngolzo gu.
Zee ngwa re xaa dii cheen Judá nu dii cheen Simeón.
4 Zee gorna ngwa Judá dil kwaan re xaa Canaán nu re xaa Ferezeo, zee mzaa Xaa Tubka Nak xaa lo re zee Israel, mbit xaa chii mil xaa naz Bezec. 5 Zee mzhaal xaa Adoni-bezec naz Bezec zee mdil xaa kwaan re xaa zee mle xaa gan lo re xaa Canaán nu lo re xaa Ferezeo. 6 Zee mxonn Adoni-bezec lo re xaa per mreke xaa tich re xaa nu gorna nguga xaa lo xaa zee mchoog xaa kwen yaa xaa kwaan ndok nu kwen nii xaa kwaan ndok. 7 Zee nzhé Adoni-bezec:
—Chongal nzho chii rey mchoog na kwen yaa kwaan ndok nu kwen nii kwaan ndok nu ndaw xaa re kwaan ngob lo mes cheen na; leeka mod mle na lo re xaa leeka sbaa mle Dios lo na.
Zee mbe xaa xaa naz Jerusalén, nu naz ba ngut xaa.
Judá mle xaa gan lo Jerusalén nu Hebrón
8 Mdil re xaa dii cheen Judá kwaan xaa Jerusalén zee mle xaa gan lo re xaa, nu mbit xaa re xaa kwaan spad nu mzek xaa yezh cheen xaa kwaan ki. 9 Zeera ngwa re xaa dii cheen Judá mdil kwaan re xaa Canaán xaa nzho naz re yi nu naz Neguev nu naz Sefelá. 10 Nu noka mdil xaa kwaan re xaa Canaán, xaa nzho naz Hebrón, yezh kwaan le axta yilo Quiriat-arba; nu mbit re xaa Sesai nu Ahimán nu Talmai.
Otoniel mle xaa gan lo Debir zee mka xaa Acsa
(Jos 15.15-19)
—Loka xaa kwaan le gan kiib Quiriat-sefer, na za Acsa, xchaap na, ka xaa.
13 Zee ngwa Otoniel, xgann Cenaz, wech Caleb xaa win, nu mle xaa gan yezh, zee mzaa Caleb Acsa, xchaap xaa mka xaa. 14 Nu tub mbizh gorna nzha me kwaan lee xaa, zee mdizhno xaa me zee naab me tub le yizhyo lo xuz me. Zee ngwa me lo xuz me nu gorna mla me tich ngwes, zee nzhé Caleb lo me:
—¿Cho kwaan nzak lu?
15 Zee lee me mkeb nzhé:
—Naab tub jabor lo lu, ngulola mzaa lu yizhyo Neguev lo na per noka nzhekla na zaa lu xlen lo na.
Zeera Caleb mzaa chop xlen lo me, tuba naz ya nu stuba naz yat.
Dil kwaan mle gan Judá nu Ben
16 Re xaa dii cheen Ceneo, xnaazhap Ches, ngwa ke tich re xaa lo dii cheen Judá leezha mroo xaa Yezh Yina axta naz wen cheen Judá kwaan nzhi naz Neguev. Ngu xaa gax Arad, kwaan re xaa nzho yizhyo bizh.
17 Zeera ngwa re xaa lo dii cheen Judá kwaan re wech xaa, xaa lo dii cheen Simeón, zee mdil xaa kwaan re xaa Canaán, xaa nzho Sefat, yezh kwaan mluux xaa tira. Zee mlo le xaaya Sefat, zee mroole xaa yezh Hormab. 18 Re xaa Judá noka mle gan yezh Gaza, Ascalón nu Ecrón nu kwaan dubse yizhyo cheen xaa. 19 Nu lee Xaa Tubka Nak nzo kwaan xaa Judá. Nu mka xaa dubse yizhyo yi per lee lo re xaa nzho yizhyo lach namlet xaa gan ngoo xaa re xaa, nel nkano xaa karet yiib. 20 Modxa nzhé Ches lo xaa, Caleb mkayaa Hebrón nu mloo xaa yon xgann Anac, xaa nzho baa. 21 Per re xaa Jebús, xaa nzho Jerusalén, namlet dii cheen Ben gan kiib xaa xaa, kwaanzee axta mbizh nalzhe nzhoka re xaa Jebús Jerusalén xsaw lo re xaa lo dii cheen Ben.
Che mle gan lo Bet-el
22 Noka re xaa dii cheen Che nguxoob mdil kwaan re xaa Bet-el nel Xaa Tubka Nak nzo kwaan re xaa. 23 Zee mxaal xaa xaa ngwa selach Bet-el, yezh kwaan noka le Luz axta yilo. 24 Zee mzhaal xaa lo tub xaa nzha roo leen yezh, nu nzhé xaa lo xaa:
—¡Né, xomod reep nu leen yezh zee lesla nu ne nu lu!
25 Zee lee xaa zee nzhé lo xaa xomod reep xaa leen yezh nu zee mbit dii cheen Che rese xaa nzho yezh ba, per lee xaa kwaan nzhé lo xaa xomod reep xaa leen yezh, nambita xaa re xaa li xaa zee. 26 Zee mya xaa ngu xaa yizhyo cheen xaa Het nu baa mlek xaa tub yezh kwaan le Luz, kwaan seetaka le axta mbizh nalzhe.
Nguyo Manasés rop Efraín
27 Nu namlet re xaa lo dii cheen Manasés gan ngoo re xaa Bet-seán nu re xaa yezh win cheena, nu nixa re xaa Taanac kwaan re yezh win cheena nu nixa re xaa Dor kwaan re yezh win cheena nu nixa re xaa Ibleam kwaan re yezh win cheena nu nixa Meguido kwaan re yezh win cheena, nel re xaa Canaán namlet xgab roo yizhyo baa. 28 Per gorna lee re xaa Israel ngok nyera lo re xaa Canaán zee mkano xaa re xaa zhiin per namloot xaa re xaa.
29 Nu noka re Efraín namloot re xaa Canaán, xaa nzho Gezer, sinka mlaa xaa ngu xaa lo re xaa.
Nguyo re stub naz dii Israel
30 Noka Zabulón namloot re xaa nzho Quitrón, nu nixa re xaa nzho Naalal, sinka mlaa ngu re xaa Canaán lo re xaa nixa mkano doo xaa re xaa zhiin.
31 Noka re xaa lo dii cheen Aser namloot xaa nzho Aco nu nixa re xaa nzho yezh Sidón nu nixa re xaa Ahlab nu nixa re xaa Aczib, nu nixa re xaa Helba nu nixa re xaa Afec nu nixa re xaa Rehob. 32 Nu ngu re xaa Aser lo re xaa Canaán, xaa ngu yizhyo ba, nu namloot xaa re xaa.
33 Nixa Neftalí namloot re xaa nzho Bet-semes nu nixa re xaa nzho Bet-anat, sinka ngu xaa lo re xaa Canaán, xaa ngu yizhyo ba; per re xaa Bet-semes nu re xaa yezh Bet-anat ngok xaa xaa mke zhin lo xaa Neftalí.
34 Lee re xaa Amorreo mzere re xaa lo dii cheen Dan axta yi, nu namlaat xaa yo xaa lo lach. 35 Nu noka re xaa Amorreo namlaat xaa yo xaa yek yi Heres, naz Ajalón nu Saalbim. Per gorna ngok nye re xaa lo dii cheen Che zee mkano xaa re xaa Amorreo zhiin.
36 Lee paro nzhaal re xaa Amorreo nak axta yi pa nzho nix axta Selá nu masra naz ya.