Yizhyo kwaan yalzo re ngwnaa
36
Re xaa nabeyy lo re xaa dii cheen Galaad, xaa ngok xgann Maquir, xaa ngok xgann Manasés, xaa lo dii cheen xgann Che, ngwa re xaa ngunii xaa lo Ches, nu lo re xaa nabeyy lo re dii cheen xaa Israel, 2 nu nzhé re xaa:—Xaa Tubka Nak, ngunabeyy lu zee kiiz lu yizhyo kwaan swert lo re xaa Israel zee gaka xcheen xaa. Noka ngunabeyy Xaa Tubka Nak lu zee zaa lu yizhyo lo Zelofehad nu lo re xchaap xaa.a 3 Per chelee me ka me tub xaa lo stub dii cheen re xaa Israel, zee lee yizhyo kwaan ngolzo me kwaan nak cheen xuz me yiiba lo re nu zee gaka cheen dii cheen xaa ka me. Sbaa zee gak win xkizhyo nu. 4 Gorna zhin liin kwaan nkwezh re xaa Israel kachb, zee lee yizhyo kwaan ngolzo me gak xkizhyo xtii sa me nu lee yizhyo kwaan yalzo me lo dii cheen xuz me yiiba lo re nu.
5 Zee lee Ches nzhé lo re xaa Israel modxa ngunabeyy Xaa Tubka Nak:
—Wli kwaan né dii cheen Che. 6 Kwaane nak kwaan ngunabeyy Xaa Tubka Nak, lo re xchaap Zelofehad zee ka me xaa nzhekla me per nkin gak xaa leeka xaa lo dii cheen xuz me, 7 zee lee xkizhyo re xaa Israel nagakta cheen tub dii nu stub dii, nel kad tub xaa Israel nkin kanap xaa yizhyo kwaan nak dii cheen xuz xaa. 8 Nu loka me yalzo yizhyo lo dii cheen re xaa Israel, nzhaal ka me tub xaabyi, xaa nak leeka lo dii cheen xuz me, sbaa zee kad tub xaa Israel yo xaa yizhyo kwaan nak dii cheen xuz xaa, 9 zee nagakt yizhyo cheen tub dii nu stub dii kwaanzee kad tub dii cheen xaa Israel nzhaal yalzo yizhyo kwaan nak leeka dii cheen Israel.
10 Modxa ngunabeyy Xaa Tubka Nak Ches, sbaa mle re xchaap Zelofehad. 11 Zee lee Maala, Tirsa, Hogla, Milca nu Noa, re xchaap Zelofehad, mka me xgaan xich me. 12 Mka me re xaa nak lo dii cheen Manasés, xgann Che, nu sbaa mlake yizhyo kwaan ngolzo me lo dii cheen Manasés.
13 Rese kwaane nak kwaan ngunabeyy Xaa Tubka Nak, nu ley kwaan mzaa xaa lo Ches kwaan mzaa Ches lo re xaa Israel naz wen yizhyo cheen Moab gax Yuu Jordán paro nlu Jericó.