Yezh cheen re xaa nak dii cheen Leví
35
Ngunii Xaa Tubka Nak lo Ches naz yo bizh cheen Moab, gax Yuu Jordán, pa nyun Jericó nu nzhé xaa:2 —Guzh lo re xaa Israel zee zaa xaa yezh nu yix kwaan nyalzo re xaa nak dii cheen Leví nu yizhyo kwaan gak xkizhyo xaa, 3 zee kano re xaa pa yo xaa nu yizhyo wen pa kwi re xma xaa, ngoon, mbakxiil nu chib. 4 Yo wen kwaan zaa gu lo re xaa nak dii cheen Leví chiix gu neta lo bla naz jwer cheen yezh tub mil zhit yaa xaa dub welt. 5 Nu chiix gu naz jwer yezh tub mil zhit yaa xaa naz ta nlen mbizh tub mil zhit yaa xaa naz ta nyaaz mbizh tub mil zhit yaa xaa naz ta yat tub mil zhit yaa xaa naz ya nu lee yezh lake xsaw lo yo wen.
6 &Lo re yezh kwaan zaa gu lo re xaa nak dii cheen Leví, xoopa gak yezh pa xoonn xaa chelee xaa gut xaa tub xaa zee nya xaa yo xaa yezh ba. Nu noka zaa gu lo xaa stub choobchop yezh. 7 Rese yezh kwaan zaa gu lo re xaa nak dii cheen Leví gak choobxon yezh nu re yo wen. 8 Lee re yezh cheen re xaa Israel kwaan zaa gu lo re xaa nak dii cheen Leví, lo dii kwaan nkano groya zen gu groya lee lo dii kwaan nkano cheepse zen gu cheepse, zee zaa guya lo re xaa nak dii cheen Leví.
Yezh pa nya xaa gorna nzhut xaa myet
(Dt 19.1-13)
9 Ngunii Xaa Tubka Nak lo Ches nu nzhé xaa:
10 —Ngunii lo re xaa Israel nu guzh lo xaa: Gorna yilo ded gu stub ta Yuu Jordán nu zhin gu yizhyo Canaán, 11 bley gu yezh pa nya yo xaa gorna gut xaa tub xaa kwaan namlet xaa xgab gut xaa. 12 Re yezh ne gak yezh kwaan kanap re nzhut, xaa namlet xgab gut myet zee wen yo xaa lo re xaa nayii ne xaa gorna yilo naab re xaa Israel kwent cheen xaa zhin. 13 Xoop yezh kweey gu lo re xaa nak dii Leví kwaan gak kwaan kayaa xaa gorna gut xaa tub xaa. 14 Chon yezh kweey gu naz ta Yuu Jordán nu xchon naz yizhyo Canaán, yezh kwaan nyaa yo xaa gorna gut xaa tub xaa. 15 Xoop yezh ne kayaa re xaa Israel nu re xaa zit xaa nzho lo gu, gorna xoonn xaa yezh ba, xaa kwaan namlet xgab gut wechxiin.
16 &Chelee xaa seweey xaa tub xaa kwaan tub kwaan nak yiib nu yet xaa, noka lee xaa nzhaal yet.
17 &Chelee xaa seweey tub xaa kwaan ke nu yet xaa, noka lee xaa zhaal yet.
18 &Chelee xaa seweey tub xaa kwaan tub le yag nu yet xaa, noka lee xaa zhaal yet. 19 Lee sawlizh xaa kwaan mbit xaa gorna zhaal xaa xaa gut xaa xaa.
20 &Chelee xaa gut xaa xaa nu nayii xaa ne xaa xaa nu mzobyaa xaa xaa o kee xaa tub kwaan yek xaa ta ngut xaa, 21 o nel nayii xaa ne xaa xaa zee mseweey xaa xaa kwaan yaa xaa zee ngut xaa nu noka xaa ne, xaa mbit xaa nzhaal yet. Nu sawlizh xaa kwaan mbit xaa gorna zhaal xaa xaa gut xaa xaa.
22 &Per chelee xaa mzobya xaa xaa sbaasa nu nanayiit xaa ne xaa xaa o mkee xaa tub kwaan yek xaa sinka namlet xaa xgab kee xaaya yek xaa 23 o nangunet xaa nzo xaa nu mle xaa zee mrenzeb tub ke mla yek xaa nu ngut xaa, per nanakta nel nayii xaa ne xaa, nu nixa namlet xaa xgab le xaa kwaan nawent lo xaa, 24 zee lee xaa yezh naab kwent lo xaa mbit xaa nu lo sawlizh xaa ngut, xaa nzhekla gut xaa, modxa nak re ley ne. 25 Zee lee xaa yezh nalaat gut xaa xaa mbit xaa. Nu lee re xaa yezh xaal xaa xaa zee nya xaa yezh kwaan nkayaa xaa gorna nzhut xaa xaa, baa nkin kwaz xaa axta yilo yet ngwleyy non doo xaa mchub nseyt nzhul yek xaa.
26 &Per chelee xaa mbit xaa roo paro nabeyy yezh kwaan mkayaa xaa gorna mxonn xaa mbit xaa xaa, 27 nu chelee sawlizh xaa ngut zhaal xaa naz tub lad roo yezh kwaan mkayaa xaa, zee lee sawlizh xaa zee gut xaa per nanzhobt jwalt tich xaa. 28 Lee xaa mbit xaa nkin kwaz yezh kwaan nkayaa xaa gorna mbit xaa xaa axta yilo yet ngwleyy non doo. Gorna yilo yet ngwleyy non doo, zee lee xaa mbit xaa bare yezh cheen xaa stuba.
29 &Kwaane nak tub ley kwaan nali lo re gu, nu lo re dii cheen gu nexa paro nzho gu.
30 &Loka xaa gut tub xaa, nu kwaan yé re xaa nguneya zee le xaa mbit myet nzhaal yet. Per lee tuka testig nalet gan gut stub xaa.
31 &Nyent mod sela gu xaa mbit xaa kwent cheen demi o stub kwaan zaa xaa lo gu, sinka telise nzhaal yet xaa nel mbit xaa xaa.
32 &Nu chelee xaa mxonn yezh kwaan nkayaa xaa gorna mbit xaa xaa nyent mod bare xaa yezh cheen xaa kwent cheen demi kwaan zaa xaa o stub kwaan, Leezha zeraka yet ngwleyy non doo.
33 & Nalebeedt gu yizhyo pa nzho gu, nel ren cheen xaa mbit xaa le zee gak beed yizhyo, nu lee yizhyo gak nzhul axta gorna gut xaa xaa mbit xaa nu xo xaa xren xaa.
34 &Nalebeedt gu yizhyo pa nzho gu, nel noka na nzhoo lo re gu, nel na nak Xaa Tubka Nak, xaa nzhoo lo re gu xaa Israel.