Lee Mandad cheen Xaa Tubka Nak ngunii naz Boquim
2
Lee mandad cheen Xaa Tubka Naka, nguxoob naz Gilgal axta Boquim, nu nzhé xaa:—Na mlo gu naz yizhyo Egipto nu mbe na gu yizhyo kwaan myaan za na lo re xey gu, leezha nzhé na lo re xaa: "Tira naluuxt na trat kwaan myaan na kwaan re gu, 2 per nayaant gu nik tub trat kwaan re xaa nzho yizhyo ne, bluux gu re mdo cheen re xaa". Per nambint re gu xtizh na. ¿Chozhiin mle gu kwaane? 3 Kwaanzee noka ni na lo gu: "Nakot na re xaa yezh ne lo gu, sinka re xaa nu dios cheen xaa gak tub tramp lo gu".
4 Gorna lee mandad cheen Xaa Tubka Nak ngulo ngunii, rese xaa Israel mrazhe xaa nu mbinn xaa. 5 Kwaanzee mloole xaa lugar ba Boquimb nu baa mted xaa ma lo Xaa Tubka Nak.
Yalgut cheen Josué
(Jos 24.29-31)
6 Gorna lee Josué ngulo mlaa re xaa yezh zee lee re xaa Israel nya nu kad xaa mzen xaa xkizhyo xaa. 7 Re xaa Israel mbill lo Xaa Tubka Nak, leezha mban Josué nu leezha mbanaka re xaa gol, xaa Israel, xaa ngok testig lo re kwaan gro kwaan mle Xaa Tubka Nak lo xaa Israel.
8 Per lee Josué xgann Nun, xaa nak xmos Xaa Tubka Nak, nzho xaa tub gayoo chii liin leezha ngut xaa. 9 Nu mkaach xaa xaa xkizhyo xaa naz Timnat-sera, kwaan nzhi naz yi cheen Efraín naz ta ya yi cheen Gaas. 10 Ngut re dii cheen xaa Israel, xaa nzexen kwaan Josué, zeera ngu stub naz dii, xaa namlabeyyt Xaa Tubka Nak, xaa nangunet re kwaan gro kwaan mle xaa lo re xaa Israel.
Mlaa Israel Dios nu mxaal Dios xaa naab kwent lo xaa
11 Gwluzh zeera lee re xaa Israel mle kwaan nawent lo Xaa Tubka Nak, nu mbill xaa lo dios Baal. 12 Mlaa xaa Xaa Tubka Nak, xaa nak Xtios re xey xaa, xaa mloo xaa naz yizhyo Egipto, nu mbill lo stub naz dios cheen re xaa kwaan nzho gax pa nzho xaa nu mle xaa zee ngunayii Xaa Tubka Nak. 13 Mlaa xaa Xaa Tubka Nak, nu mbill xaa lo dios Baal nu lo dios Astarotc. 14 Kwaanzee lee Xaa Tubka Nak, ngunayii ne re xaa Israel zee mlaa xaa xaa lo re wann zee mkiib xaa re xcheen xaa nu mlaa xaa mle re xaa nayii ne xaa gan lo xaa, re xaa nzho gax. 15 Kad welt gorna lee re xaa Israel nya lo dil lee Xaa Tubka Nak, nanlet yud xaa nu mlaa xaa xaa lo re xaa nayii ne xaa, modxa mcheroo xaa nu modxa nzhé xaa; zee nales doo ngok re xaa Israel.
16 Zee lee Xaa Tubka Nak, mleey xaa naab kwent zee le xaa yud xaa lo re wann xaa mkiib xcheen xaa. 17 Per lee re xaa Israel nambint xaa xtizh re xaa naab kwent sinka mlaa xaa naz kwaan mze re xey xaa, xaa mle kwaan nzhé Xaa Tubka Nak, per lee re xaa namleta. 18 Gorna lee Xaa Tubka Nak nzo xaa naab kwent, nzo xaa kwaan lee xaa zee nle xaa yud re xaa Israel lo re xaa nayii ne xaa nel nkano Xaa Tubka Nak yalnles gorna nzhon xaa lee yezh cheen xaa nales nzhak nu nded bid. 19 Per gorna nzhet re xaa naab kwent lee re xaa Israel mbare nle jwalt masra mod mle re xey xaa, xaa yilo; mreke tich stub naz dios nu mbill xaa loya nu mkichxub xaa loya nu sbaa tubka mle xaa. 20 Zee lee yalnayii cheen Xaa Tubka Nak mla tich re xaa Israel, nu nzhé xaa:
—Re xaa ne mdiich trat kwaan myaan na kwaan re xey xaa nu nambint xaa xtizh na, 21 nixa nakoot na re xaa nayii ne xaa, re xaa kwaan mlake Josué leezha ngut xaa. 22 Sbaa nzhekla na le xaa preb re xaa Israel zee nel che zreke xaa tich na modxa mreke re xey xaa, xaa yilo, tich na.
23 Kwaanzee lee Xaa Tubka Nak mlaa re xaa zee lo re xaa Israel nu namlet xaa zee lee Josué gan.