Yezh kwaan namluxt le preb Israel
3
Lee Xaa Tubka Nak mlaa yezh zee le xaa preb re xaa Israel, xaa nangunet xomod ngu dil Canaán; 2 nebse mle xaa kwaane zee seed stub dii xaa Israel xomod dil xaa. 3 Nu mlake gaay xaa non lo re xaa Filistia, rese xaa Canaán, xaa Sidón nu re xaa Het, xaa nzho yi Líbano, axta yi Baal-Hermón nu axta nzhin Hamat. 4 Zee mlaa Xaa Tubka Nak re xaa zee, zee le xaa preb re xaa Israel, zee nel che zle xaa kwaan nzhé ley kwaan mzaa xaa lo Ches lo re xey xaa, xaa yilo. 5 Zee lee re xaa Israel ngu lo re xaa Canaán, xaa Het, xaa Amorreo, xaa Ferezeo, xaa Heveo nu re xaa Jebús; 6 zee mka xchaap re xaa re xaa yezh ba, zee mbill re xaa lo dios yag cheen re xaa yezh ba.Otoniel msela re xaa Israel lo Cusan-risataim
7 Re xaa Israel mle kwaan nawent lo Xaa Tubka Nak, myenlazh xaa Xaa Tubka Nak, xaa nak Xtios xaa, mwii xaa lo dios Baal nu lo dios Asera. 8 Kwaanzee ngunayii Xaa Tubka Nak lo re xaa Israel zee mzaa xaa re xaa lo Cusan-risataim, rey xaa Mesopotamia, tub xon liin mke re xaa zhiin lo xaa. 9 Zee ngunii re xaa lo Xaa Tubka Nak, zee mzaa xaa Otoniel koo xaa xaa lo re xaa ba. Otoniel ngok xgann Cenaz, wech Caleb xaa win. Mloo Otoniel re xaa Israel lo yalnabeyy xaa ba. 10 Zee lee Mbi Naban cheen XaaTubka Nak mla tich Otoniel, zee ngok xaa tub xaa dil kwent cheen re xaa Israel nu ngwa xaa lo dil, zee lee Xaa Tubka Nak mzaa re xaa Cusan-risataim, zee mle xaa gan lo re xaa. 11 Zee mlaz dil tub choo liin axta ngulo ngut Otoniel, xgann Cenaz.
Aod msela Israel xaa Moab
12 Stub welt re xaa Israel mle kwaan nawent zee nayii Xaa Tubka Nak, zee mzaa xaa xaa lo yalnabeyy cheen Eglón, rey xaa Moab. 13 Zee mzhaal Eglón re xaa Moab kwaan re xaa Amón nu re xaa Amalec, nu mdil re xaa kwaan xaa Israel zee mkiib xaa yezh yagyina lo re xaa Israel. 14 Kwaanzee lee re xaa Israel ngu xan yalnabeyy cheen Eglón, rey cheen Moab, tub chiinmchon liin.
15 Zee mbare re xaa Israel ngunaab lo Xaa Tubka Nak stuba, zee lee Xaa Tubka Nak mzo Aod, xgann Gera, zee le xaa yud re xaa; ngok xaa lo dii cheen Benjamín nu ngok xaa tub xaa lad beg. Tub mbizh re xaa Israel mxaal Aod lo Eglón, rey xaa Moab, kwaan nzeb xaa kix xaa lo xaa. 16 Per lee Aod mdexkwaa tub spad kwaan dox rop ta lo, kwaan noll tub zhit yaa xaa nu mkee xaaya roo leen xaa lad li. 17 Zee mzaa xaa kwaan nzeb kwaan nzhano xaa lo Eglón, rey xaa Moab; nu nachaa doo nak xaa. 18 Nu gorna ngulo mzaa Aod kwaan nzhano xaa lo Eglón nu nya xaa, zee ngunii xaa lo re xaa kwaan mbeya zee nya re xaa. 19 Per lee xaa mbare paro mdexkwaa re xaa maj ke gax Gilgal, nu gorna mbare xaa nu nzhé xaa:
—Xaa nabeyy, nzhekla na ni na tub kwaan xlaan lo lu.
Zee lee rey nzhé lo xaa:
—Kexa.
Zee mloo rey re xaa kwaan nzhi lo xaa.
20 Zee mbii Aod lo rey paro nzob xaa lo xkagxil xaa, paro nabeyy xaa nu nzhé xaa:
—Nkano na tub kwaan né Dios lo lu.
Nu gorna ngolzo rey lo yagxil kwaan nzob xaa, 21 zee mloo Aod spad lad lad beg nu mkiich xaaya lextoo rey. 22 Nu dub terse xkach spad mcheep xaa lextoo xaa nu mdeda naz tich xaa nu msaaw dubse yed nachaa cheen Eglón lo espad kwaan mkiich xaa lextoo xaa. 23 Zee mroo Aod naz bentant nu nye msaaw xaa roo yoo. 24 Nu gorna mroo xaa, zee mzhin re xaa nke zhin lo rey, nu mwii xaa roo yoo nyaawa, nu nzhé xaa:
—Ech mandad kayaa xaa leen yoo.
25 Nu gorna nzhala lak tyemp kambaz re xaa zee mle doo re xaa xgab nel nyentaka roo. Zee mzen xaa leyaw nu mxal xaa roo yoo zee mwii xaa lee xaa naxto lo yo, ngulola ngut.
26 Lee re xaa nkambaz naz roo yoo lee Aod mroo naz bentant nu nya naz Seirat. 27 Nu gorna mzhin xaa baa, nu mkwezh xaa kach naz yi cheen Efraín nu gorzee mla re xaa Israel yek yi zee mzo Aod lo re xaa baa, 28 zee nzhé xaa:
—Breke gu tich na, nel Xaa Tubka Nak zaa re xaa Moab, xaa nayii ne be, lo be.
Zee ngwake re xaa tich xaa, zee mkiib xaa pa nded re xaa Yuu Jordán nu nixa namlaat xaa mded nik tub xaa. 29 Zee mbit xaa kan chii mil xaa Moab, xaa nanzhebt nu xaa nzhak dil; nu nik tub xaa namlet gan. 30 Zee mlake Moab lo yalnabeyy cheen xaa Israel, zee tapgal liin ngu wen re xaa.
Samgar msela re xaa Israel lo re xaa Filistia
31 Zee ngulo ngut Aod, lee Samgar xgann Anat, ngok tub xaa mloo re xaa Israel lo xaa nayii xaa. Tuka mbizh mbit xaa xoop gayoo xaa Filistia kwaan tub le yag kwaan naluch nak yek kwaan nkiich xaa reke ngoon. Sbaa mle xaa yud re xaa Israel.