Débora nu Barac
4
Gwluzh ngulo ngut Aod, re xaa Israel mbare mle kwaan nawent lo Xaa Tubka Nak, 2 zee lee Xaa Tubka Nak, mzaa re xaa lo Jabín, xaa nak rey yizhyo Canaán, xaa nabeyy yizhyo Hazor. Lee xaa ngunabeyy lo re xsoldad xaa le Sísara, xaa ngu Haroset-goim. 3 Zee lee re xaa Israel ngunii lo Xaa Tubka Nak, nel Jabín nkano tub yee gayoo karet kwaan nak yiib nu mted xaa bid re xaa Israel tub gal liin.4 Lee re mbizh zee ngunabeyy Débora, tub ngwnaa yezh Israel nu mkayaa me wdizh lo Xaa Tubka Nak. Lapidot ngok sa me. 5 Nzob nabeyy me xan yag yin (kwaan nlabeyy re xaa mod yag yin cheen Débora), kwaan nzo saaw lo Ramá nu lo Bet-el naz re yi cheen Efraín; nu lee re xaa Israel nya lo me zee naab me kwent nali lo re xaa.
6 Tub mbizh Débora mxaal xaa ngwachezh Barac, xgann Abinoam, xaa ngu Cedes tub yezh cheen Neftalí nu nzhé me:
—Lee Xaa Tubka Nak, Dios cheen re xaa Israel nzhé lo lu: "Gwa nu btoop re xaa lu Yi Tabor nu be tub chii mil xaa nak dii cheen Neftalí nu xaa nak dii cheen Zabulón. 7 Na le zee lee Sísara, xaa nabeyy lo re soldad cheen Jabín, yiid naz Yuu Cisón kwaan xkaret xaa nu re soldad cheen xaa, zee za na re xaa lo lu."
8 Zee lee Barac mkeb:
—Chelee lu ya lu kwaan na, ya na; per chelee lu nayat lu kwaan na, nayat na.
9 Zee nzhé me:
—Ya na kwaan lu; per nagoolt re xaa lo lu, nel lo tub ngwnaa zaa Xaa Tubka Nak Sísara.
Zee ngwa Débora rop Barac naz Cedes. 10 Baa mrezh Barac dii cheen Zabulón nu dii cheen Neftalí. Nu tub chii mil soldad mbid rop xaa Débora.
11 Heber, tub xaa Ceneo, xaa nak lo dii cheen Hobab xazhap Ches, mroo xaa lo re xaa Cedes nu mzob xaa yoo yed cheen xaa lo lach cheen Zaanaim gax Cedes. 12 Gorna mbin Sísara lee Barac, xgann Abinoam, nguxoob naz Yi Tabor, 13 zee mbe xaa tub yee gayoo xkaret xaa kwaan nak yiib nu rese soldad cheen xaa. Mroo xaa axta Haroset-goim nu mzhin xaa axta Yuu Cisón. 14 Zee lee Débora nzhé lo Barac:
—Gwa, nel nalzhe nak mbizh kwaan zaa Xaa Tubka Nak Sísara lozhya gu. Telise lee Xaa Tubka Nak nzha naz delant lo gu.
Barac mkato Yi Tabor kwaan chii mil soldad, xaa nkano xaa, 15 nu lee Xaa Tubka Nak, mle zee nguyo Sísara kwaan re xkaret xaa nu re xsoldad xaa gorna nzha dil kwaan re xaa Barac. Nu gorzee mla xaa lo xkaret xaa nu mxonn xaa kwaan nii xaa, 16 per lee Barac mreke tich re soldad nu re karet axta Haroset-goim. Lee mbizh zee rese soldad cheen Sísara ngut kwaan spad nu nik stub xaa namlaketra.
17 Sísara mxonn nya nu mzhin xaa yoo yed cheen Jael, xngwnaa Heber, xaa Ceneo, nel wen nzhikwaa Jabín, rey cheen Hazor, kwaan re xaa li Heber, xaa Ceneo. 18 Gorzee mroo Jael mkayaa Sísara nu nzhé me:
—Me nabeyy, bded, nazhebt lu.
Zee mzeeb xaa leen yoo yed cheen me zee mkaxlaan xaa nu mzhib me tub lee ler tich xaa. 19 Zee lee Sísara nzhé:
—Naab na lo lu zaa lu cheep nis goo na nel nzhek doo lextoo na.
Jael mxal yeg kwaan nak yed pa ngozhaw me nizh nu mzaa meya ngu xaa nu mbare me msaaw me tich xaa stuba. 20 Zee lee xaa nzhé lo me:
—Bzo roo pwert cheleeya nzho cho xaa yiid nabdizh né lo lu: "¿Che nzho cho mzhin nee?", zee yé lu: "Nyent choya".
21 Per lee Jael, xngwnaa Heber mzen tub stak cheen yoo nu mzen mas nu zhega mbii gax me lo xaa nu nel nayetra xaa lo mkaal, mkiich me stak chata yek xaa, nu sbaa ngut xaa.
22 Gorna mzhin Barac nzhakwaan Sísara zee mroo Jael mkayaa me xaa nu nzhé me lo xaa:
—Te, zee lu na xaa kakwaan lu lo lu.