Kant kwaan mbill Débora nu Barac
5
Mbizh zee, Débora nu Barac xgann Abinoam mbill snee:2 Nel ngwaner xaa nabeyy lo re xaa Israel,
nel lee re xaa yezh gal lextoo reke tich xaa,
zee gool be lo Xaa Tubka Nak.
3 ¡Kenzha re gu rey nu kenzha re gu xaa nkano yalnabeyy!
Lee na gol, nu gol na lo Xaa Tubka Nak,
Gol na salm lo Xaa Tubka Nak, Dios cheen xaa Israel.
4 XaaTubka Nak, leezha mroo lu Seir,
leezha mroo lu naz lach cheen Edom,
mgun yizhyo nu mxiz yiba
nu myal xkaw nu mla tub yeyxoo.
5 Nu mxiz re yi lo Xaa Tubka Nak,
mxiz Yi Sinai lo Xaa Tubka Nak,
Dios cheen xaa Israel.
6 Re mbizh cheen Samgar xgann Anat,
nu re mbizh cheen Jael mlaa re xaa naz,
nu nzha mze xaa naz win.
7 Re xaa Israel mlaa yezh cheen xaa,
lee na, Débora, mroo mod xnaa re xaa Israel,
8 Leezha mleyy xaa stub naz dios,
lee dil nzho mer roo yezh;
¡nyent kwaan nsaaw xaa nu nik tub espad nankanot tub mil xaa Israel!
9 Kwaan dub lextoo na ngwii na lo re xaa non Israel,
nu lo re xaa sawlazh na,
xaa ngwa lo dil.
¡Gool be lo Xaa Tubka Nak!
10 Re gu, xaa non, xaa nzob tich ngwes rus,
re gu xaa zob lo da,
nu re xaa kwaan nzha nze naz,
zheta ble gu xgab!
11 Re xaa kwaan nzholl paro nzho ma,
baa nii xaa lee Xaa Tubka Nak mle gan,
nu baa nii xaa lee re xaa yezh Israel mle gan.
zee roo re xaa zo xaa roo yezh.
12 ¡Guxche, guxche, Débora!
¡guxche, guxche, bill tub kant!
Lee lu Barac, xgann Abinoam,
be re xaa kwaan mle gu gan lo dil.
13 Zee mbid re xaa Israel;
mbid xaa nkano yalnabeyy;
mbid xaa Xaa Tubka Nak;
nu mbid xaa nanzhebt lo na.
14 Tub naz xaa mbid lo dii cheen Efraín,
nze lak xaa nzho naz Amalec,
naz tras nze lu Benjamín, kwaan re xaa yezh cheen lu.
Naz Maquir nze re xaa non,
naz lo Zabulón nze xaa nzheno baston cheen yalnabeyy.
15 Nu lo Débora nzho re xaa Isacar, xaa non;
Isacar mzhaal kwaan Barac,
nu mla dil re xaa axta lo lach.
Nu re xaa lo dii cheen Ben
mle doo xaa xgab:
16 ¿Chozhiin mlake xaa leen korrel,
kayon xaa lee xaa nkanap mbakxiil kabezh mbakxiil?
17 Galaad mlake stub ta roo Yuu Jordán,
Lee Dan ¿chozhiin mlake xaa lo kano?
Nu lee Aser mlake roo nistoo paro nzho xaa.
18 Nu lee re xaa dii cheen Zabulón nu dii cheen Neftalí mle xaa reyez,
mzaa xaa yalnaban cheen xaa yet xaa lo dil.
19 Mzhin re rey nu mdil xaa;
Re rey cheen Canaán mdil naz Taanac,
per nik tub kwaan nambet nixa plat.
20 Axta naz yiba mdil re mbal yiba.
axta naz leen yiba mdil ma kwaan Sísara.
21 Nu yuu gox cheen Cisón,
mselaw rese xaa nayii ne xaa.
Na, Débora, tubka ya na naz delant kwaan yalnabeyy.
22 Zee kwezh re yiib kwaan nzho nii re gway
nu kapra, kapra mchexonn re xaa nanzhebt gway.
23 Zee nzhé mandad cheen Xaa Tubka Nak> "Xobde yezh Meroz,
zee la yalnayii tich re xaa xaa,
nel namlet re xaa yud Xaa Tubka Nak,
namlet re xaa yud dil xaa kwaan re xaa ngezh.
24 Wen Jael, xngwnaa Heber, xaa Ceneo;
nu wenra me lo rese ngwnaa, me nzho leen yoo yed.
25 Sísara ngunaab nis, lee Jael mzaa nizh ngu xaa;
nu mzaa me kwaan wenra leen tas kwaan chul doo nlu.
26 Nu yaa me lad beg mzen me stak cheen yoo,
nu yaa me lad li mzen me mas kwaan nkano me zhiin.
nu mzaa golp me yek Sísara,
nu mted me stak ta lechuzh yek xaa,
tira mlux me yek xaa.
27 Nu mla xaa lo yo,
nu mla xaa lo yo gax nii me,
nu paro ngut xaa.
28 Zee le xnaa Sísara mzo ngwii roo bentant,
nu nzhé me:
"¿Chozhiin tant nen nze xkaret sa na?
¿Chozhiin nyent mod gon na rezh kwaan nle xkaret xaa?"
29 Zee lee ngwnaa, me nke zhiin lo me, me mas nzhak lo me nzhé,
nu nzhé me leeka kwaan:
30 "¿Che naleet kagiiz xaa kwaan mkiib xaa lo dil?
Nzaa xaa tub ngwnaa mad o chop ngwnaa mad yalzo yizata xaa ngwa lo dil;
nu lee ler kwaan re kolor kwaan mkiib xaa yalzo Sísara;
Nu re ler kwaan mtib me kwaan re kolor;
nu ler kolor kwaan mtib me rop ta,
Re kwaane, kwaan mkiib xaa, yalzo re xaa ngwa lo dil.
31 Sbaaka luux re xaa nayii ne lu, Xaa Tubka Nak.
Per lee re xaa nkela lu gak mod xni mbizh,
nu gak xaa mod mbizh gorna nlena.
Zee lee re yezh ngu wen tub choo liin.