Xaa Tubka Nak mrezh Yon
6
Re xaa Israel mle kwaan nawent lo Xaa Tubka nak, zee mzaa xaa re xaa lo re xaa Madián tub gazh liin. 2 Nel lee re xaa Madián mted re xaa Israel bid nel nzheb xaa ne xaa re xaa Madián zee mdexkwaa xaa Israel yiloo naz wen pa nkaxlan xaa lo re xaa. 3 Gorna lee re xaa Israel mlo ben lo yo, zee lee re xaa Madián nu re xaa Amalek nu re xaa nzho naz ta nlen mbizh mbid nu mdil xaa. 4 Nu mbaz re xaa leen xkizhyo re xaa Israel nu nlux xaa re yalgon cheen xaa nu axta yizhyo Gaza sbaa nle xaa. Nu nanlaat xaa nik tub kwaan naban xkizhyo re xaa Israel, nixa mbakxiil, nixa ngoon, nixa ngwes. 5 Nu mzhin xaa kwaan re xkoon xaa, kwaan yoo yed cheen xaa, mod yalzi cheen mbeso nyal zyen doo xaa tich xkamey xaa, nu axta mle cheey xaa nu xma xaa yizhyo. 6 Nu snee mlake prob re xaa Israel kwent cheen xaa Madián zee ngunaab re xaa lo Xaa Tubka Nak.7 Gorna lee re xaa Israel ngunii lo Xaa Tubka Nak, kwent cheen re xaa Madián, 8 Xaa Tubka Nak mxaal tub xaa mzaa kwent kwaan nzhé xaa lo xaa, nu nzhé xaa:
—Snee né Xaa Tubka Nak, Dios cheen re xaa Israel: "Na mloo xey be naz yizhyo Egipto nu mloo na xey be pa mke doo xaa zhiin. 9 Mloo na re xaa lo yalnabeyy cheen re xaa Egipto nu lo re xaa mted xaa bid nu mloo na re xaa nee lo xey gu nu mza na xkizhyo xaa lo rese gu. 10 Noka né na: 'Na nak Xaa Tubka Nak, xaa nak Xtios gu: Nagoolt gu lo dios cheen re xaa Amorreo paro nzho gu nal'. Per nambint gu xtizh na.
11 Zee mbid mandad cheen Xaa Tubka Nak, mzob xan tub yag zin kwaan nzo naz Ofra, kwaan nak cheen Joás, xaa nak lo dii cheen Ahiezer. Lee Yon, xgann xaa kadexkwaa nzhobxtil leen tub pa nsii xaa ub, zee kaxlaan xaaya lo re xaa Madián, 12 Gorna mlu mandad cheen Xaa Tubka Nak lo Yon nu nzhé xaa:
—Xaa Tubka Nak nzo kwaan lu, xaa ngezh nu xaa nanzhebt.
13 Zee lee Yon mkeb:
—Ah, xaa nabeyy na, cheleeya nzo Xaa Tubka Nak kwaan be, ¿chozhiin kayak re kwaane lo be? ¿Xana re chul kwaan mle xaa kwaan né re xey be lo be, leezha né xaa: "Mloo xaa nu naz yizhyo Egipto?" Nu lee nal mlaa xaa be lo re xaa Madián.
14 Zee lee Xaa Tubka Nak, mwii lo xaa nu nzhé xaa:
—Ble xchinn jwers kwaan nkano lu nu gwa ble yud re xaa Israel lo re xaa Madián. ¡Na xaal lu!
15 Nu lee Yon mkeb stub welt:
—Ah, xaa nabeyy na, ¿xomod le na yud re xaa Israel? Lee dii cheen na mas prob lo dii cheen Manasés nu na nak xaa yeen garli xuz na.
16 Nu lee Xaa Tubka Nak nzhé:
—Nzho mod le luya nel na zo kwaan lu, gut lu rese xaa Madián.
17 Nu lee xaa mkeb:
—Naab na lo lu, chelee lu wlipa ngwii lu lo na sbaa, zaa tub nseyn ke lee lu wlipa ngunii lo na. 18 Naab na lo lu, nabachiit lu nee, lee na yaxi gon cheen na nu zhib naya delant lo lu.
Lee Xaa Tubka Nak mkeb:
—Kwaz na axta gorna bare lu.
19 Zee lee Yon nya mdexkwaa tub chib nu yat kwaan nanyut lebadur leen kwaan nak galbchop litr arin. Nu mlo xaa baal leen tub chekwid nu lee kalt mlo xaa leen tub yas nu mbe xaaya zee mlek xaaya xan tub yag zin. 20 Zee lee mandad cheen Dios nzhé lo xaa:
—Be baal nu yat kwaan nanzhot lebadur leen, nu zhiba yek ke ne nu bxo kalt.
Nu mle Yon mod ngunabeyy mandad. 21 Zee lee mandad mkiich bar kwaan nzho yaa xaa cho baal nu cho yat kwaan nanzhot lebadur leen zee mroo bal cho ke nu mzeka baal nu yat kwaan nanzhot lebadur leen. Zee lee mandad cheen Xaa Tubka Nak namlutra lo xaa. 22 Gorna mzeen Yon naka mandad cheen Xaa Tubka Nak, zee nzhé xaa:
—¡Ah Xaa Nabeyy, Xaa Tubka Nak, ngune na lo mandad cheen lu snee sneepa!
23 Per lee Xaa Tubka Nak nzhé:
—Wen yo lu. Nazhebt lu nayeta lu.
24 Zee lee Yon mdexkwaa tub mdo cheen Xaa Tubka Nak nu mloole xaaya, Xaa Tubka Nak nzaa yalwen. Lee mdo ne seetaka nzob axta mbizh nalzhe naz Ofra leen xkizhyo dii cheen Ahiezer. 25 Leeka yaal zee lee Xaa Tubka Nak nzhé:
—Bzen tub la ngoon lo xkoon xuz lu, lee stub la ma gak ma nzho gazh liin nu bluux mdo cheen Baal, kwaan nkano xuz lu; nu bluux yizo kwaan nke maj Asera cho; 26 nu leeka yek ke ba bdexkwaa mdo cheen Xaa Tubka Nak, xaa nak Xtios lu, nu leeka yiso cheen maj yag Asera kwaan mchoog lu nu bted stub la ngoon nu bzek ma mod gon kwaan nzek xaa ma lo mdo.
27 Zee lee Yon mbe chii mos, xaa nke zhiin lo xaa, nu mle xaa modxa nzhé Xaa Tubka Nak lo xaa. Per nzheb xaa le xaaya zhe zee mle xaaya yaal nel nzheb xaa ne xaa re sawlizh xuz xaa nu re xaa yezh. 28 Lee ngunil yizhyo gorna nguxche re xaa yezh zee ngune re xaa lee mdo cheen Baal ngulola mlux nu lee yiso cheen maj Asera ngulola mroog nu ngulola mzek xaa stub la ngoon mod gon kwaan nzek xaa ma lo mdo, lo mdo kub. 29 Zee mnadizh tub xaa lo stub xaa:
—¿Cho mle kwaane?
Zee tubka ngunabdizh xaa zeera ngune xaaya, zee nzhé re xaa:
—¡Yon, xgann Joás mleya!
30 Zee lee re xaa yezh nzhé lo Joás:
—Bloo xgann lu zee gut nu xaa nel lee xaa mluux mdo cheen dios Baal nu mchoog xaa yiso cheen maj Asera kwaan nzo gax loya.
31 Per lee Joás nzhé lo re xaa:
—¿Che nkin nii lu xkwent Baal? ¿Che nzak gu zle gu yud xaa? Loka cho xaa le yud dios Baal yet gorna zeraka yani yizhyo. Cheleeya nak Baal dios laa luux xaa xaa mluux mdo cheen xaa.
32 Lee mbizh zee mloole xaa Yon Jerobaal, kwaane nii: "Lee dios Baal dil kwaan Yon", nel mluux xaa mdo cheen xaa.
33 Zee lee re xaa Madián nu xaa Amalek nu re xaa nzho naz nlen mbizh mkasa re xaa nu mded xaa Yuu Jordán nu mlaz xaa lo lach cheen Jezreel. 34 Zee lee Mbi Naban cheen Xaa Tubka Nak mla tich Yon nu gorna mkwezh xaa kach cheen mbakxiil zee mkasa re dii cheen Ahiezer kwaan lee xaa. 35 Noka mxaal xaa xaa ngunii lo dii cheen Manasés, lo dii cheen Aser, lo dii cheen Zabulón nu lo dii cheen Neftalí, zee mzhaal re xaa.
36 Zee lee Yon nzhé lo Dios:
—Chelee lu lexchinn lu na le na yud re xaa Israel modxa né lu, 37 zhib na yich led mbakxiil pa ngazya xaa nzhobxtil nu chelee gop la nebse ticha lee dub welt choya lake yo bizh zeesi ne na wlipa lexchinn lu na le na yud re xaa Israel modxa né lu.