Yon mle gan lo re xaa Madián
7
Jerobaal, nak stub le Yon, nu re xaa nzo kwaan lee xaa, nguxche garziil doo zee mlaz xaa naz xlen Harod. Nu lee paro mlaz re xaa Madián nak naz ta ya roo lach xan yi cheen More.2 Zee nzhé Xaa Tubka Nak lo Yon:
—Nkano lu zyen doo xaa zee zaa na re xaa Madián lo lu, napa yé re xaa Israel leeka re xaa mle gan lo xaa. 3 Lee nal guzh lo re xaa yezh: "Loka Xaa xiz kwaan yalnacheb, laa xaa yek Yi Galaad nee nu nya xaa garli xaa. Nu mbare tub galbchop mil xaa garli xaa nu mlake chii mil xaa.
4 Zee nzhé Xaa Tubka Nak lo Yon stuba:
—Seetaka nzho zyen doo xaa. Be re xaa go xaa nis zee kweey lu xaa, zee nel xa xaa ya kwaan lu nu xana xaa kwaan nayat kwaan lu.
5 Zee mbe Yon re xaa go xaa nis, zee nzhé Xaa Tubka Nak lo xaa:
—Loka xaa go nis kwaan luzh mod nzho mbak nis, xaa zee koxa lu nu zeka koxa lu xaa kwaan kichxub go nis.
6 Chon gayoo xaa mtele lo nis kwaan yaa xaa, per lee stub naz xaa mkichxub ngu nis. 7 Zee nzhé Xaa Tubka nak lo Yon:
—Kwaan chon gayooka xaa, xaa ngu nis mod mbak, na le zee le gu gan lo re xaa zee; nu na zaa re xaa Madián lo gu; per lee stub naz xaa bare xaa nya xaa garli.
8 Zee lee Yon mxaal re stub naz xaa Israel nya xaa leen yoo yed cheen xaa; nebse mlake xaa kwaan chon gayoo xaa mleey xaa, nu noka mlake xaa kwaan re kwaan mzeno re xaa gaw nu re xkach mbakxiil xaa. Lee roo lach naz yat mlaz re xaa Madián.
9 Lee ngol yaal zee ngunii Xaa Tubka NaK lo Yon nu nzhé xaa:
—List bzo la lu naz yat paro mbaz re xaa Madián, nel lee na zaa re xaa Madián lo lu. 10 Chelee lu nzheb lu dil lu kwaan re xaa zee, yilo bla lu kwaan Fura, xaa nkee zhiin lo lu, pa mbaz re xaa. 11 Zee gon lu kwaan yé xaa, zee nazhebt lu dil gu kwaan re xaa.
Zee mla rop xaa Fura, xaa nkee zhiin lo xaa, axta paro nzhi re soldad, xaa nkanap paro mbaz re xaa. 12 Re xaa Madián nu re xaa Amalek nu re stub naz yezh kwaan nzhi naz ta nlen mbizh mlaz roo lach kwaan xkamey xaa, nu ngu zyen doo xaa mod mbeso nu mod re yux kwaan nzhi roo nistoo.
13 Mer gorna mzhin Yon lee tub xaa kazaa kwent kwaan mchaa lextoo xaa lo xmig xaa nu nzhé xaa:
—Nzak na cha yat sebad nyaad baxche axta paro nzho re be, xaa Madián nee, nu nye doo nzha mbaxcheya zee mkana cho tub yoo yed nu tira mluxa yoo yed.
14 Zee lee xmig xaa mkeb nzhé:
—Kwaane nanakt stub kwaan, sinka leeya nak spad cheen Yon, xgann Joás, xaa Israel. Dios zaa re be, xaa Madián, nu pa mbaz be lo xaa.
15 Nu gorna ngulo mbin Yon cho kwaan nak kwaan mchaa lextoo xaa zee mkichxub Yon nu mbill xaa lo Xaa Tubka Nak. Zee mbare xaa pa nzhi re xaa Israel zee ngunabeyy xaa nu nzhé xaa:
—¡List bzo gu nal, nel Xaa Tubka Nak zaa xaa Madián lo be!
16 Zee lee Yon mle rol chon gayoo xaa zee ngok xaa chon naz, nu mzaa xaa xkach mbakxiil nu yas kwaan nzho yerbal leen lo re xaa.
17 Zee nzhé xaa lo re xaa:
—Wii gu lo na. Ble gu kwaan le na; gorna zhin be lach jwer pa mbaz re xaa, zee le gu leeka kwaan le na. 18 Gorna ne gu lee na kwaan re xaa kwaan nzhi lo na kwezh kach noka re gu kwezha dub welt pa nzho re xaa Madián, nu yé gu: "¡Kwent cheen Xaa Tubka Nak nu kwent cheen Yon!
19 Zee lee Yon mzhin kwaan tub gayoo xsoldad, xaa kwaan nzhake tich xaa, mer gorna lee xaa nkanap roo paro mbaz re xaa mzhee. Zee mkwezh re xaa xkach xaa nu mlee xaa re yas kwaan nzheno xaa. 20 Yonse naz xaa mkwezh kach cheen xaa nu mlee xaa yaas kwaan nzho yaa xaa, nu mzen xaa yerbal lad beg nu lee lad li mzen xaa kach kwaan mkwezh xaa, nu mbazhe xaa:
—¡Ya dil be kwent cheen Xaa Tubka Nak nu kwent cheen Yon!
21 Rese xaa Israel zheta mri re xaa dub welt paro mbaz re xaa Madián, nu re xaa Madián mbazhe xaa nu mrexonn xaa. 22 Nu gorna lee chongayoo xaa mkwezh kach cheen xaa, gorzee lee Xaa Tubka Nak mle zee mdil leeka xaa Madián kwaan leeka xaa Madián kwaan spad cheen xaa. Nu mrexonn re soldad naz Zerera axta Bet-sitá, nu axta Abel-mehola gax Tabat, paro paro nzhaal xkizhyo xaa.
23 Zee mzhaal re xaa Israel, xaa Neftalí, xaa Aser nu re xaa Manasés, zee mreke xaa tich re xaa Madián.
24 Nu noka mxaal Yon xaa dubse leen yii cheen re xaa Efraín nu nzhé xaa:
—Te gu dil be kwaan re xaa Madián, zen gu Bet-bara nal zeraka ded re xaa roo Yuu Jordán.
Zee tubka myaan re xaa Efraín mzen xaa Bet-bara nu roo Yuu Jordán. 25 Zee mzen xaa chop xaa non lo re xaa Madián, Oreb nu Zeeb, nu mbit xaa Oreb yek Ke Oreb nu lee Zeeb mbit xaa pa nsii xaa ub kwaan le Zeeb. Ngulo mreke xaa tich re xaa Madián, zee mbe xaa yek Oreb nu Zeeb lo Yon naz stub ta roo Yuu Jordán.