Yon mchazi chop yezh kwaan namlet yud xaa lee dii cheen Efraín nzhé lo Yon:
8
—¿Cho kwaan kwaane kale lo nu? ¿Chozhiin nanét lo nu? ¡Lee lu ngdil kwaan re xaa Madián!—Néla gu, ¿che grora kwaan mle na lo gu? ¿Che naleet re gu xaa kwaan mlake yizhyo cheen re xaa lo dii cheen Efraín nonra lo re xaa kwaan mlake yizhyo cheen re xaa lo dii cheen Ahiezer? 3 Dios mzaa Oreb nu Zeeb, xaa nabeyy lo re xaa Madián lo gu; ¡nik tub kwaan nyent mod le na mod kwaan mle gu!
Gorna mbin re xaa nzhé Yon sbaa zee mlaz xyan lo re xaa.
4 Mzhin Yon Yuu Jordán nu mded xaa yuu kwaan tub chongayoo xsoldad xaa nixa nguzha doo re xaa per seetaka mreke xaa tich re xaa Madián. 5 Zee nzhé xaa lo re xaa Sucot:
—Naab na lo gu zaa gu chep kwaan gaw re xsoldad na nel nguzha doo nu, nu seetaka kareke nu tich Zeba nu Zalmuna, rey cheen re xaa Madián.
6 Zee lee re xaa non yezh Sucot mkeb nu nzhé xaa :
—¿Che mzenla lu Zeba nu Zalmuna zee zaa nu kwaan gaw re xsoldad lu?
7 Zee lee Yon nzhé:
—Gorna lee Xaa Tubka Nak zaa Zeba nu Zalmuna lo na zeera bare nu nee, zee za naya yenn gu kwaan yag yich nu kwaan yag yich yixnizh kwaan nzeb naz yizhyo bizh.
8 Zeera nguxoob xaa naz Peniel nu nzhé xaa leeka wdizh ne lo re xaa. Lee re xaa Peniel mkeb leeka wdizh kwaan mkeb re xaa Sucot. 9 Zee lee Yon nzhé lo re xaa Peniel:
—Gorna lee na bare zee luux na yoo ndok ne.
10 Zeba nu Zalmuna nzho naz Carcor kwaan chiin mil soldad, xaa mlake lo re xaa mzhin naz ta nlen mbizh, nel ngulola ngut tub gayoo gal mil soldad, xaa kwaan spad. 11 Zeera nguxoob Yon naz ta nlen mbizh yizhyo bizh cheen Noba nu yizhyo cheen Jogbeha, nu mzhin xaa pa mbaz re xaa, gorna lee re soldad nankanapt. 12 Zeba nu Zalmuna mrexonn per lee Yon mreke tich xaa axta nguga xaa lo xaa zee mzen xaa xaa nu lee re xsoldad xaa mzheb doo.
13 Gorna lee Yon, xgann Joás, mbare ngwa lo dil nu nyixoob naz kwaan le Jeres, 14 mbe xaa tub xaa mad xaa Sucot nu ngunabdizh xaa lo xaa. Zee lee xaa mad zee mkee chon gal nzho chiinmchop le re xaa non zee lo yech nu le re xaa gol, xaa Sucot. 15 Zee ngwa xaa yezh Sucot nu nzhé xaa lo re xaa:
—Lee Zeba nu Zalmuna nee. Nel kwent cheen xaa ne zee mxizhno gu na, leezha né gu: "¿Che mzenla lu Zeba nu Zalmuna zee zaa nu kwaan gaw re xsoldad lu? ¡Kwaanzee nazaat nu yat gaw re xsoldad lu!"
16 Zee mzen Yon yag yich nu yag yich yixnizh kwaan nzeb naz wen yizhyo bizh nu mzaa xaaya yenn re xaa gol xaa yezh Sucot. 17 Nu mluux xaa yoo ndok kwaan nzob Peniel nu mbit xaa re xaa yezh 18 Zeera nzhé xaa lo Zeba nu lo Zalmuna:
—¿Xomod nzhak re xaa mbit gu naz Tabor?
Lee rop xaa mkeb nzhé:
—Mod lu nzhak re xaa; rese xaa nzhak mod xgann rey.
19 Zee lee Yon mrazhe:
—Wech na nak re xaa mbit gu, xinn xnaa naya. ¡Mban Xaa Tubka Nak, chol nanguta gu xaa, zeesi naguta na gu!
20 Zee nzhé xaa lo Jeter, xaa yilo lo re xgann xaa:
—Zoza bit rop xaa ne.
Per namloot xaa spad xaa nel nzheb xaa nu nel nak xaa tub xaa mad. 21 Zee lee Zeba nu Zalmuna nzhé lo Yon:
—Zoza bit nu chelee lu nanzhebt lu.
Zee nguxso Yon nu mbit xaa Zeba nu Zalmuna nu mkiib xaa nguzbga or kwaan nzho yenn xkamey xaa.
22 Zee lee re xaa Israel nzhé lo Yon:
—Lu nu re xinn lu nu re xos lu gak xaa nabeyy lo nu, nel mloo lu nu lo re xaa Madián.
23 Per lee Yon nzhé lo re xaa:
—Nagakt na xaa nabeyy lo gu, nixa xiin na; Xaa Tubka Nak, nak xaa nabeyy lo re be.
24 Nu nzhé xaa:
—Nzhekla na naab na lo kad tub gu zaa tub ani or kwaan mle gu gan lo dil.
25 Zee lee re xaa mkeb:
—Kwaan dub lextoo nu zaa nuya.
Nu mdix/mchil xaa tub lee ler lo yo nu kad tub xaa mlo tub ani kwaan mle xaa gan lo dil lo ler. 26 Lee rese ani or kwaan ngunaab xaa lo re xaa nga chiinmtap kil or, nu namloot xaa kwent nguzbga or kwaan nyu yenn rop rey, xaa Madián, nixa kaden kwaan nyu yenn xaa, nixa ler sul kwaan nkano xaa, nixa nguzbga or kwaan nyu yenn kamey. 27 Rese or kwaan mtoop Yon mdexkwaa xaa tub mandil chul doo nu mzo xaaya naz Ofra, pa nak lazh xaa. Nu rese xaa Israel mbill lo mandil ba, zee ngoka tub kwaan nawent lo Yon nu lo re xaa li xaa.
Ngut Yon
28 Nu sbaa ngu re xaa Madián xan yalnabeyy cheen re xaa Israel nu nangunayiitra re xaa. Nu dubse tub choo liin leezha mban Yon mri wen re xaa Israel.
29 Zee lee Yon, xgann Joás, nya ngu garli, 30 nu mkano Yon chon gal nzho chii xinn xaa nu ngok zyen dii cheen xaa nel mkano xaa zyen doo ngwnaa. 31 Noka stub me ngok mod sa xaa, me ngu naz Siquem, nu mkano me tub xgann xaa, xaa le Abimelec.
32 Ngoxla Yon, xgann Joás, leezha ngut xaa nu msebyo xaa xaa leeka pa ngubyo xuz xaa naz Ofra, yizhyo dii cheen re xaa Ahiezer.