Yalnabeyy cheen Abimelec
9
Abimelec ngok xgann Jerobaal. Ngwasewii xaa lo re wech xaa, xinn xnaa xaa, naz Siquem; nu nzhé xaa lo re xaa li xuz xaa nu xnaa xaa:2 —Naab na lo gu zee yé gu lo xaa Siquem: "¿Che mas wen, nabeyy tub chongal nzho chii xgann Jerobaal gu o che wenra nabeyy tubka xaa?" Selazh gu nkano na ren cheen gu.
3 Nu gorna lee re wech xaa nzhé re kwaane lo re xaa Siquem, zee mwii re xaa respet lo Abimelec, nu nzhé re xaa:
—Wech be nak xaa.
4 Nu mzaa xaa chongal chii demi plat cheen yidoo Baal-berit lo Abimelec. Nu kwaan demi ba mree xaa lak xaa nzhut myet zee mreke tich xaa. 5 Zee ngwa re xaa naz Ofra paro ngu xuz xaa Jerobaal, nu tich tubka ke mbit xaa chongal nzho chii wech Abimelec. Nebse mkaxlaan Jotam, xgann Jerobaal, xaa winra zee naguta xaa xaa. 6 Zee mdop re xaa Siquem nu re xaa Bet-milo naz lach pa nzoli ke xan yag zin naz Siquema zee mleyy xaa Abimelec zee ngok xaa rey.
7 Nu gorna mbin Jotam kwaane, zee nguxoob xaa yek yi Gerizim nu nzhé xaa nye doo:
¡Kenzha re gu, xaa Siquem,
zee Dios kenzha kwaan yé gu!
8 Tub mbizh mroo re yag
nzha kwaan tub rey kwaan nabeyy lo re yag.
Zee nzhé re yag lo yag olib: "Gok rey cheen re nu".
9 Zee lee yag olib nzhé:
"¿Che né lu laa na nazaatra na nseyt kwaan nyakla re dios nu re myet, zee gak na rey cheen re yag?"
10 Zee nzhé re yag lo yag ig:
"Gok rey cheen nu".
11 Zee lee yag ig nzhé:
"¿Che né lu laa na nazaatra na xle wen nu kwaan chul doo nax,
zee gak na rey cheen re yag?"
12 Zee nzhé re yag lo yag ub;
Gok rey cheen nu.
13 Zee lee yag ub nzhé:
"¿Che né lu laa na nazaatra na xis ub kwaan nle nix lextoo re dios nu re myet
zee gak na rey cheen re yag?"
14 Zee gwluzhtlaka ngwa re yag lo yag yich, zee nzhé re yag lo yag yich:
"Gok rey cheen re nu".
15 Zee lee yag yich nzhé:
"Chelee gu nzhekla gu gak na rey cheen re gu,
te re gu zob gu xkal cheen na;
nu chelee gu nazobt gu xkal cheen na zee koo yich bal,
nu zeka rese yag sedr cheen Líbano".
16 &Lee nal, ¿che wen mle gu mzo gu Abimelec gak xaa rey? ¿Che ngok nali gu lo re xaa li xuz na, Jerobaal?; ¿nu che mle gu mod nzhaal le gu lo xaa? 17 Xuz na mdil kwent cheen re gu nu mzaa xaa yalnaban cheen xaa nu msela xaa gu lo re xaa Madián. 18 Per lee nal, nayii gu ne gu re xaa li xuz na; nu ¡mbit gu chongal nzho chii xgann xaa tich tubka ke! Nu mzo gu Abimelec gak xaa rey lo re gu, xaa Siquem, nixa nak xaa xinn me nke zhiin lo xuz na. Sbaa mle gu nebse nel nak xaa sawlizh gu. 19 Per lee na nii nal: Chelee gu wen mle gu nu ngwii gu respet lo Jerobaal nu lo re xaa li xaa, wen ya gu kwaan Abimelec, nu lee xaa wen ya kwaan gu; 20 per cheleeya nagakta sbaa, re xaa Siquem nu xaa Bet-milo, ¡koo ki zee zeeka re gu Abimelec!
21 Zee mxonn Jotam nu nya naz Beer. Baa ngu xaa nel nzheb xaa ne xaa wech xaa Abimelec.
22 Ngulo mded chon liin kwaan ngunabeyy Abimelec Israel, 23 zee mxaal Dios tub mbi nawent lo Abimelec nu lo re xaa Siquem, zee lee xaa Siquem mle kwaan nawent lo xaa. 24 Kwaane mle Dios lo Abimelec nu re xaa Siquem nel mbit xaa chongal nzho chii re xgann Jerobaal. Nu lee yalgut cheen re xaa ne mrib tich Abimelec nu re xaa Siquem nel re xaa mle yud mbit xaa wech Abimelec. 25 Zee ngwa saaw re xaa Siquem axta yek yi zee mlewann xaa re xaa nded naz baa; nu Abimelec mbina.
26 Zee lee Gaal, xgann Ebed, mzhin Siquem, kwaan re wech xaa nu rese xaa Siquem mwii lo xaa. 27 Nu mroo re xaa ngwa xaa naz wen nu mtoop xaa ub zee dexkwaa xaa xis ub, nu mle xaa yalni cheen yidoo cheen xtios xaa. Ndaw xaa nu ngu xaa nu mxobde xaa Abimelec. 28 Zee lee Gaal, xgann Ebed, nzhé:
—¿Cho nak Abimelec nu Siquem zee gon be xtizh xaa? ¿Che nanakt xaa xgann Jerobaal nu che naleet Zebul nak xaa nle yud xaa? Mas wen ke be zhiin lo re xaa Hamor, xuz Siquem ¿Chozhiin lo Abimelec kake be zhiin? 29 Chol na ngnabeyy re xaa yezh ne, na koo Abimelec nee nu yé na lo xaa: "Toop re xsoldad lu nu dil be."
30 Nu gorna mbin Zebul, xaa nabeyy yezh, kwaan nzhé Gaal, xgann Ebed, ngunayii doo xaa. 31 Zee xlaan mxaal xaa xaa ngwa yé lo Abimelec, nu nzhé xaa lo xaa: "Gaal, xgann Ebed, nu re wech xaa mzhin Siquem nu nii nawent xaa lu lo re xaa yezh. 32 Lee nalyall broo kwaan re xaa lu nu kwaan re xaa yezh nu kaxlaan gu naz wen. 33 Lee gorna yani yizhyo zee la gu leen yezh. Lee gorna lee Gaal roo kwaan re xaa yezh dil kwaan re gu, gorzee roo gu nu le gu loka kwaan nzho moda lo gu."
34 Zee lee Abimelec nu re xsoldad cheen xaa mroo leeka yaal zee, nu ngulaan xaa dub welt Siquem nu ngok xaa tap naz xaa. 35 Zee lee Gaal, xgaan Ebed, mroo nu mzoli xaa pwert roo yezh mer gorna lee Abimelec kwaan re xsoldad xaa mroo paro nzholaan xaa. 36 Nu gorna ngune xaa lo Gaal zee nzhé xaa lo Zebul:
—¡Wii nel xomod nzela re xaa axta yek yi!
Zee lee Zebul mkeb nzhé:
—Xkal cheen yi nyun lo lu zee nzak lu myet naka.
37 Per Gaal mbare nzhé stuba:
—¡Wii xsaw yizhyo xomod nzela re xaa yek yi nu stub naz xaa nze naz yag zin cheen wezh!
38 Zee nzhé Zebul:
—¿Xomod nguné lu yilo, gorna né lu? "¿Cho nak Abimelec zee nabeyy xaa lo be?" ¿Che naleet re xaa yezh nii nawent lu lo? Lee nal broo nu bdil kwaan re xaa Abimelec.
39 Nu gorzee mroo Gaal kwaan re xaa Siquem nu mdil xaa kwaan Abimelec. 40 Per Abimelec mreke tich xaa per lee Gaal mxonn lo xaa. Zyen doo xaa mweey naz axta roo yezh. 41 Abimelec mlake Aruma, nu lee Zebul mloo Gaal kwaan re wech xaa Siquem.
42 Lee stub mbizh lee re xaa yezh Siquem nzha naz wen. Zee ngwa yé xaa lo Abimelec. 43 Zee mrezh Abimelec re xaa xaa, nu mle rol xaa xaa, gok xaa chon naz nu mxaal xaa re xaa kaxlaan re xaa naz wen. Nu gorna ngune re soldad mroo xaa yezh, gorzee list mzo re xaa dil xaa kwaan re xaa yezh. 44 Abimelec kwaan re xaa naz cheen xaa mxonn xaa nu mzoli xaa roo yezh nu msaaw xaaya. Nu lee zchop naz xaa mlake mdil kwaan re xaa ngu wen nu mbit xaa re xaa. 45 Abimelec mdil kwaan re xaa yezh dubse zhe mbizh zee nu mzen xaa yezh cheen re xaa nu mbit xaa re xaa yezh. Mluux xaa yezh cheen xaa nu mcheech xaa zed loya.
46 Nu gorna mbin re xaa nzho leen yoo ndok cheen Siquem kwaane, gorzee mzelo xaa nya xaa ngu xaa leen yidoo cheen Baal-berit, pa nye nak. 47 Nu gorna nguné xaaya lo Abimelec, lee re xaa ngwa naz baa, 48 nu gorzee nguxoob re xaa Abimelec yi cheen Salmón. Nu mbe xaa tub yibyag nu mchoog lak ram yag, nu mzhib xaaya yenn xaa, nu nzhé xaa lo re xsoldad xaa zoza le gu leeka kwaan mle xaa. 49 Nu noka re xaa xaa mchoog ram yag nu mreke xaa tich Abimelec; nu mlek xaa re yag dub welt yidoo, pa nye nak, nu mzek xaaya, snee ngut re xaa Siquem, xaa ngu yoo ndok; kan tub mil xaabyi nu ngwnaa ngut.
50 Zee ngwa Abimelec mdil kwaan re xaa Tebes, msaaw xaaya nu mle xaa gan yezh ba. 51 Nu xsaw yezh Tebes nzob tub yoo ndok, pa mkaxlaan re xaa yezh leen, xaabyi nu ngwnaa nzho leena. Wen wen msaaw xaa roo yoo ndok nu nguxoob xaa axta yek yoo. 52 Nu gorna mzhin Abimelec roo yoo ndok nu mdil xaa kwaan re xaa. Nu gorna nzha xaa kich ki xaa yoo ndok, 53 zee lee tub ngwnaa mlabi tub ke molin nu mlaya mer yek Abimelec nu mleeya yek xaa. 54 Zee mrezh Abimelec xaa nkanap xaa nu nzhé xaa lo xaa:
—Bloo spad cheen lu nu bit na, zee nayét xaa: "Tub ngwnaa mbit xaa."
Zee lee xaa nkanap xaa mkich spad lextoo xaa zee ngut xaa. 55 Nu gorna ngune re xaa Israel lee Abimelec ngulola ngut zee nya re xaa garli xaa.