Tola nu Jair ngunabeyy lo re xaa Israel
10
Gwluzh lo Abimelec zeera mzob tub xaa ngunabeyy yezh Israel, xaa ne le Tola xgann Fúa, xos Dodo, xaa nze lo dii cheen Isacar. Ngu xaa naz Samir naz leen re yi Efraín. 2 Tola mzob ngunabeyy yezh Israel tub galbchon liin. Zee ngut xaa nu mkaach xaa xaa naz Samir. 3 Lee gwluzh lo Tola mzob Jair, xaa nze lo dii cheen Galaad nu ngunabeyy xaa yezh Israel tub galbchop liin. 4 Mkano xaa tub galbchii xgann xaa nu rese xgann xaa mkano tubga ngwes; nu kad tub xaa ngunabeyy tub yezh cheen xaa naz Galaad. Nu axta mbizh nalzhe lee re yezh ba nlabeyy re xaa mod yezh cheen Jair. 5 Gorna ngut Jair zee mgaach xaa naz Camón.Jefté msela re xaa Israel lo re xaa Amón
6 Per lee re xaa Israel mbare mle kwaan nawent lo Xaa Tubka Nak, nu mbill xaa lo re dios Baal, lo re dios Astarot, lo re dios cheen xaa Siria, lo re dios cheen xaa Sidón, lo re dios cheen xaa Moab, lo re dios cheen xaa Amón nu lo re dios cheen xaa Filistia. Nu mlaa xaa Xaa Tubka Nak. 7 Zee lee yalnayii cheen Xaa Tubka Nak mla tich re xaa Israel zee mlaa/mzaa xaa xaa lo re xaa Filistia nu lo re xaa Amón, 8 zee dubse tub chiinmchon liin mted re xaa Filistia nu xaa Amón bid re xaa Israel, xaa ngu naz yizhyo Galaad stub ta Yuu Jordán, xkizhyo re xaa Amorreo. 9 Zee lee re xaa Amón mded Yuu Jordán nu noka mdil xaa kwaan dii cheen Judá, kwaan dii cheen Benjamín nu kwaan dii cheen Efraín nu mded doo re xaa Israel bid. 10 Zee lee re xaa Israel ngunii xaa lo Xaa Tubka Nak, nu nzhé xaa:
—Mle nu jwalt lo lu, nel mlaa nu lu, xaa nak Xtios nu, nu mbill nu lo re dios Baal.
11 Zee lee Xaa Tubka Nak mkeb lo re xaa Israel:
—Gu mded bid lo re xaa Egipto, lo re xaa Amorreo, lo re xaa Amón, lo re xaa Filistia, 12 lo re xaa Sidón, lo re xaa Amalec nu lo re xaa Maón? Nu lee gorna ngunii gu lo na, na mle yud gu. 13 Per lee re gu mlaa gu na nu mbill gu lo re maj; Kwaanzee naletra na yud gu. 14 Gwa gu nu gunii gu lo re maj kwaan mleyy gu; zee leeya le yud gu gorna ded gu bid.
15 Zee lee re xaa Israel mkeb lo Xaa Tubka Nak:
—Mle nu jwalt lo lu; ble kwaan nzhekla lu lo nu, per ble yud nu nal.
16 Zee mluux re xaa maj kwaan nkano xaa nu mbill xaa lo Xaa Tubka Nak, zee nales doo ngok lextoo Xaa Tubka Nak mwii xaa xomod kaded re xaa Israel bid.
17 Zee mkasa re xaa Amón nu mlaz xaa naz Galaad; seeka mkasa re xaa Israel nu mlaz xaa naz Mizpa. 18 Lee re xaa non Galaad nzhé xaa tub xaa nu lo stub xaa:
—Loka cho dil yilotlaka kwaan re xaa Amón, xaa zee nabeyy lo rese be nzho Galaad.