11
Zee lee Jefté, xaa yezh Galaad, ngok xaa xiin tub ngwnaa, me nto cho. Ngok xaa tub xaa ndil nu tub xaa nanzhebt. 2 Nu noka Galaad mkano stub naz xgann xaa kwaan sa, nu gorna ngok gro xgann xaa, zee mloo xaa Jefté, nu nzhé xaa lo xaa:—Nyent mod yiso lu yizhyo kwaan nak cheen xuz be nel nak lu xiin stub ngwnaa.
3 Zee mxonn Jefté lo re wech xaa, zee nya xaa ngu xaa naz yizhyo cheen Tob, zee mzhaal re xaa naras kwaan lee xaa nu mreke re xaa tich xaa nle xaa kwaan nawent.
4 Ngulo mded lak liin zee le re xaa Amón mdil kwaan re xaa Israel, 5 Zee lee re xaa gol, xaa Galaad, ngwaxii Jefté naz yizhyo Tob, 6 nu nzhé xaa lo xaa:
—Te, zee gak lu xaa nabeyy lo re nu zee dil be kwaan re xaa Amón.
7 Zee mkeb Jefté lo re xaa gol, xaa Galaad:
—¿Che nalet re gu nak xaa nayii ne na nu mloo gu na garli xuz na? ¿ Chozhiin nze gu nkwaan gu na nal gorna nales nzhak gu?
8 Zee mkeb re xaa gol, xaa Galaad, lo Jefté nu nzhé xaa:
—Kwaanzee nze nu lo lu, zee yiid lu lo re nu zee dil be kwaan re xaa Amón nu zee nabeyy lu lo re nu, xaa Galaad.
9 Zee nzhé Jefté lo re xaa gol, xaa Galaad:
—Chelee gu we gu na dil be kwaan re xaa Amón nu lee Xaa Tubka Nak le yud na le be gan lo re xaa, zee ¿che wlipa gak na xaa nabeyy lo gu?
10 Zee nzhé re xaa gol lo Jefté:
—Xaa Tubka Nak gak testig lo be chelee lee nu nalet nu kwaan né lu.
11 Zee ngwa Jefté kwaan re xaa gol, xaa Galaad, zee lee re xaa yezh mleyy Jefté zee nabeyy xaa lo re xaa. Nu gorna nzo xaa naz Mizpa zee nzhé xaa lo Xaa Tubka Nak leeka kwaan nzhé axta yilo.
12 Zee mxaal xaa xaa ngwa lo rey, xaa yezh Amón, nu nzhé xaa lo xaa:
—¿Cho kwaan nkano lu kwaan nu, zee yiid lu dil lu kwaan kwaan yezh cheen nu?
13 Zee lee rey cheen xaa Amón mkeb lo xaa mxal Jefté:
—Gorna mroo re gu, xaa Israel, Egipto, mkiib gu xkizhyo na axta Yuu Arnón nu axta Yuu Jaboc nu axta Yuu Jordán. Nala, zereya lo na zee nadilt be.
—Né Jefté kwaane: "Nazent nu, xaa Israel, yizhyo cheen re xaa Moab nu nixa yizhyo cheen re xaa Amón. 16 Nel leezha mroo re xey nu naz Egipto nu mze xaa naz wen cheen Nistoo Naxne nu mzhin xaa axta Cades. 17 Zee mxaal re xey nu xaa ngwa lo rey xaa Edom nu nzhé xaa: 'Naab na lo lu zee zaa leen xkizhyo lu ded nu', per lee rey, xaa Edom, nambint. Zee mxaal xaa stub xaa lo rey Moab, per nambint xaa kwaan nzhé, zee mlakeka re xaa mbaz Cades. 18 Zeera ngwa xaa naz wen cheen yizhyo Edom nu Moab, naz pa nlen mbizh xkizhyo xaa. Mzhin xaa axta stub ta Yuu Arnón, per nangdedt xaa xkizhyo Moab sinka mded xaa Yuu Arnón pa nanakta xkizhyo xaa. 19 Zee mxaal xaa xaa ngwa lo Sehón, rey xaa Amorreo, xaa ngu Hesbón nu nzhé xaa lo xaa: 'Naab na lo lu zee zaa lu leen xkizhyo lu ded nya nu naz axta xkizhyo nu'. 20 Per rey Sehón nambint kwaan nzhé Israel namzaat xaa xkizhyo xaa ded re xaa, zee mtoop xaa re xsoldad nu msaaw xaa naz Jahaza nu mdil xaa kwaan re xey nu. 21 Per lee Xaa Tubka Nak, Dios cheen nu, xaa Israel, mzaa rey Sehón kwaan re xaa yezh cheen xaa lo re xey nu, zee mle xaa gan lo xaa. Snee ngunabeyy nu, xaa Israel, dubse xkizhyo re xaa Amorreo, xaa nzho yizhyo zee. 22 Zee ngunabeyy nu yizhyo cheen re xaa Amorreo, axta Yuu Arnón nu axta Yuu Jaboc, nu neta yizhyo bizh nu axta Yuu Jordán.
23 &Xaa Tubka Nak mkiib yizhyo lo re xaa Amorreo zee mzaa xaaya lo re nu, xaa Israel, ¿leel lu kiiba? 24 ¡Nix gak lextoo gu yo gu pa mzaa Quemos, xtios gu, yo gu, per lee nu yo pa mzaa Xaa Tubka Nak yo nu! 25 ¿Napa ne lu nzak lu wenra lu lo Balac xgann Zipor, rey xaa Moab? Namdilt xaa kwaan re xey nu, xaa Israel. 26 Nzhala chon gayoo liin mzen xey nu Hesbón nu Aroer, kwaan re yezh cheena nu rese yezh win kwaan nzhi gax Yuu Arnón ¿Chozhiin namlet gu gan mkiib guya zee? 27 Kwaanzee, nik tub jwalt namlet na lo lu per lu kale kwaan nawent dil lu kwaan na. Lee Xaa Tubka Nak nak xaa naab kwent nal lo re nu, xaa Israel, nu lo re gu, xaa Amón."
28 Per rey, xaa nabeyy lo re xaa Amón, namlet xaa kas kwaan nzhé xaa mxaal Jefté lo xaa.
29 Zee lee Mbi Naban cheen Xaa Tubka Nak mla tich Jefté. Mded xaa lo Galaad nu Manasés, nu mded xaa Mizpa cheen Galaad, nu mzhin xaa lo re xaa Amón. 30 Zee myaan Jefté kwaan Xaa Tubka Nak, nu nzhé xaa:
—Chelee lu zaa lu re xaa Amón lo na, 31 zee loka xaa yilotlaka roo leen li na kayaa na, gorna bare na le na gan lo re xaa Amón, xaa zee ted na lo mdo lo lu, Xaa Tubka Nak.
32 Zee ngwa Jefté mdil kwaan re xaa Amón, zee lee Xaa Tubka Nak mzaa re xaa lo xaa. 33 Neta Aroer axta Minit, mdil xaa kwaan tub gal yezh, nu axta Abel Queramín, nu mbit xaa zyen doo xaa. Sbaa mle re xaa Israel gan lo re xaa Amón.
34 Gorna mbare Jefté garli xaa, naz Mizpa, zee mroo xchaap xaa nu mkayaa me xaa kwaan briink nu kwaan tambor chut. Tubka madnaa mkano xaa; nankanotra xaa xgann xaa nixa xchaap xaa. 35 Nu gorna ngune xaa lo me, mchaz xaa xab xaa, nu nzhé xaa:
—¡Ay xchaap na! aka ne mlee lu lextoo na; mle lu ngok ne lextoo na. Myaan na kwaan Xaa Tubka Nak tub kwaan nu nkin le naya.
36 Zee lee me mkeb nu nzhé me:
—Xuz na, chelee lu myaan lu kwaan Xaa Tubka Nak, ble kwaan myaan lu kwaan lee xaa, nel lee xaa mle zee mle lu gan lo re xaa Amón, xaa nayii ne be.
37 Nu noka nzhé me:
—Laa na ya na yek yi chop mbee nu ya gonn na kwaan re xmig na nel nal nyent mod chelya na tub xaabyi.
38 Zee mkeb Jefté:
—Gwa.
Zee mlaa xaa ngwa me xaa chop mbee. Zee ngwa me kwaan re me nyenn yek yi nu mbinn me nel nachelyat me xaabyi. 39 Nu gorna ngulo nguxoob chop mbee zee mbare me lo xuz me stuba, zee mle xaa kwaan nzhé xaa lo Dios. Nu namchelyat me xaabyi. 40 Kwaanzee nal, yizata liin lee rese ngwnaa mad, me Israel, nyayonn yi tap mbizh kwent cheen yalgut cheen xchaap Jefté, xaa Galaad.