Jefté nu dii cheen Efraín
12
Re xaa lo dii cheen Efraín mkasa nu mded xaa naz ta nlen mbizh Yuu Jordán naz Safón nu nzhé re xaa lo Jefté:—¿Chozhiin ngwa lu mdil lu kwaan re xaa Amón, nu namrezht lu nu zee nga re be? ¡Lee nal zeek nu lu nu re xaa li lu!
2 Zee lee Jefté mkeb lo re xaa:
—Na nu re xaa yezh cheen na nkano nu tub dil nagan kwaan re xaa Amón; lee gorna mrezh na gu nambiidt gu ngle gu yud nu lo re xaa. 3 Ne nu namlet gu yud nu zee mle nu reyez ngwa nu mbit nu re xaa Amón, nel lee Xaa Tubka Nak, mzaa xaa lo nu. ¿Chozhiin nze gu dil gu kwaan na?
4 Zee mtoop Jefté re xaa Galaad nu mdil xaa kwaan re xaa Efraín. Lee re xaa Galaad mbit re xaa Efraín, nel nzhé xaa:
—Gu, xaa Galaad, nkanze gu nzho gu xkizhyo Efraín nu Manasés.
5 Lee re xaa Galaad mri paro nazhil nzhob nis pa nded re xaa Efraín Yuu Jordán nu gorna lee tub xaa dii cheen Efraín nxonn nu mbezh xaa:
—Nzhekla na deed na,
zee lee re xaa Galaad ngunabdizh lo xaa:
—¿Che nak lu dii cheen Efraín?
Chelee xaa yé:
—¡Aa!
6 Zee lee re xaa mbezh lo xaa:
—Nii "Xibolet"
Chelee xaa yé xaa "Sibolet", nel nyent mod nii wen xaaya, mzen xaa xaa nu nchoog xaa yenn xaa roo Yuu Jordán pa nazhil nzhob nis. Nu sbaa ngut tub choobchop mil xaa nak dii cheen Efraín.
7 Jefté ngunabeyy yezh Israel xoop liin. Ngut Jefté, xaa Galaad, nu mkaach xaa xaa naz yizhyo Galaad.
Ibzán, Elón, nu Don ngu xaa nabeyy Israel
8 Gwluzh lo Jefté ngunabeyy Ibzán, xaa Belén, yezh Israel. 9 Mkano xaa galbchii xgann nu galbchii xchaap, nu rese me mka xaabyi nanakt dii cheen me, nu nguxii xaa tub galbchii ngwnaa, me nanakt dii cheen xaa, mka re xgann xaa. Nu ngunabeyy xaa yezh Israel tub gazh liin. 10 Gorna ngut Ibzán nu mkaach xaa xaa naz Belén.
11 Lee gwluzh lo Ibzán ngunabeyy Elón, xaa nze lo dii cheen Zabulón, yezh Israel tub chii liin. 12 Ngut Elón nu mkaach xaa xaa naz Ajalón, naz yizhyo cheen Zabulón.
13 Gwluzh lo Elón ngunabeyy Don, xgann Hilel, xaa nze lo dii Piratón, yezh Israel. 14 Xaa ne mkano tub choo xgann nu tub galbchii xos nu kad xaa mkano xaa tubga xngwes xaa. Nu ngunabeyy xaa yezh Israel tub xon liin. 15 Ngut Don, xgann Hilel, nu mkaach xaa xaa naz Piratón, xkizhyo Efraín, naz wen xkizhyo xaa Amalec.