Xomod ngol Sansón
13
Stub welt lee re xaa Israel mle kwaan nawent lo Xaa Tubka Nak, zee mzaa Xaa Tubka Nak re xaa lo re xaa Filistia tub choo liin.2 Yezh Zora nzho tub xaa lo dii cheen Dan le Manoa. Nu namkanot xngwnaa xaa mad nel nak me tub me nit. 3 Zee lee Mandad cheen Xaa Tubka Naka myun lo me nu nzhé xaa:
—Lu nak tub me nit per nal kano lu tub xgann lu. 4 Lee nal nagot lu xiz ub nixa nzoo, nu nixa nagawt lu kwaan beed, 5 nel weyxinn lu. Nu gorna gal mad nachubt lu yek mad nel nzhul gak mad lo Xaa Tubka Nak axta gorna gal xaa, nel lee xaa sela re xaa Israel lo re xaa Filistia.
6 Zee nya me nu nzhé meya lo sa me:
—Tub xaa Dios mbiid lo na, nu nzhak xaa mod mandad cheen Dios. Nlu xaa ngezh doo. Nagunabdizht na lo xaa pa naz nze xaa nu nixa lee xaa nangunét le xaa lo na. 7 Per né xaa lo na: "Weyxinn lu nu kano lo tub xgaan lu nu neta nal nagot lu xis ub nixa nzoo, nu nixa nagawt lu kwaan beed, nel lee mad kano lu gak nzhul lo Dios gorna gal mad nu axta gorna yet mad".
8 Zee ngunii Manoa lo Xaa Tubka Nak, nu nzhé xaa:
—Xaa Tubka Nak, naab na lo lu xaal lu xaa mxaal lu lo nu stub welt zee né xaa nel cho kwaan le nu kwaan mad gal.
9 Mbin Xaa Tubka Nak kwaan nzhé Manoa. Zee gorna nzo xngwnaa xaa naz wen zee lee Mandad cheen Dios ngwa lo me, per lee Manoa nanzot baa. 10 Zee nzhaxonn me nzha chezh me sa me, nu nzhé me:
—Nee nzo xaa kwaan mbiid lo na nzhala mbizh zee.
11 Zee ngwa Manoa kwaan lee me paro nzo xaa zee, nu nzhé xaa:
—¿Che lu ngunii lo sa na?
—Lee xaa mkeb nu nzhé xaa:
—Naya.
12 Zee lee Manoa ngunabdizh lo xaa nu nzhé xaa:
—Gorna gak re kwaan né lu, ¿xomod nzhaal yo madwin nu cho kwaan nzhaal le mad?
13 Zee lee Mandad cheen Xaa Tubka Nak mkeb lo Manoa nu nzhé xaa:
—Lee xngwnaa lu kozhaw rese kwaan nzhé na lo me: 14 "Nagot me xis ub nixa nzoo, nu nixa nagawt me nik tub kwaan beed. nu le me rese kwaan ngunabeyy na lo me le me.
15 Zee le Manoa nzhé lo Mandad cheen Xaa Tubka Nak:
—Naab na lo lu zee kwaz lu cheep, dexkwaa nu tub chib yeen.
16 Zee lee mandad cheen Xaa Tubka Nak mkeb lo Manoa nu nzhé xaa:
—Nixa sekwaz lu na, nagawt na yat cheen lu; per chelee lu nzhekla lu zaa lu tub kwaan, bzaaya lo Xaa Tubka Nak. (Manoa nanet che Mandad cheen Xaa Tubka Nak nak xaa.)
17 Zee ngunabdizh Manoa lo Mandad cheen Xaa Tubka Nak:
—¿Cho le lu, zee gorna gak re kwaan né lu zee nzho mod zaa nu dixkix lo lu?
18 Zee lee Mandad cheen Xaa Tubka Nak mkeb nu nzhé:
—¿Cho zhiin nabdizh lu le na? ¡Lee le na nak tub kwaan chul doo!
19 Zee lee Manoa mzen tub chib yenn nu gon cheen yalgon, nu mkwib xaaya tich tub ke lo Xaa Tubka Nak. Zee lee mandad cheen Xaa Tubka Nak mlu tub kwaan gro lo rop sa Manoa. 20 Nu gorzee mroo bal lo mdo nu nguxooba naz yiba nu zee ngune rop sa Manoa lee Mandad cheen Xaa Tubka Nak nguxoob leen bal kwaan mroo lo mdo. Gorzee mkichxub rop sa xaa nu axta mla lachuzh xaa lo yo. 21 Gorna neta ngune rop xngwnaa Manoa lo xaa zee ngune Manoa lee xaa nak Mandad cheen Xaa Tubka Nak.
22 Zee nzhé Manoa lo xngwnaa xaa:
—Telise yet be, nel ngune be lo Dios.
23 Zee lee xngwnaa mkeb nu nzhé:
—Chol nzhekla Xaa Tubka Nak ngut be, nangkayaat xaa ma kwaan kwaan mted be nixa gon cheen nzhobxtil kwaan mzaa be lo xaa, nu nixa nanglut xaa re kwaane lo be, nu nixa nangzaat xaa kwent cheena lo be.