Sansón nchelya
14
Ngwa Sansón naz Timnat zee ngune xaa lo tub ngwnaa, me Filistia. 2 Gorna mbare xaa nu nzhé xaaya lo xuz nu lo xnaa xaa:—Ngune na lo tub ngwnaa naz Timnat, me Filistia; gunaab gu me zee gak me sa na.
3 Per lee xuz xaa nu xnaa xaa nzhé lo xaa:
—¿Che nik tub ngwnaa nyent lo dii cheen be nu re yezh cheen be, zee ya lu lo re xaa Filistia, xaa nanzhot beey cheen be?
Zee lee Sansón mkeb lo xuz:
—Naab ngwnaa ba nel nyula na me.
4 (Lee xuz xaa nu xnaa xaa nanet che naka xgab cheen Xaa Tubka Nak, nel lee xaa mkwaan tub mod luux xaa re xaa Filistia, nel lee tyemp zee re xaa Filistia ngunabeyy yezh Israel).
5 Zee ngwa Sansón kwaan xuz xaa nu kwaan xnaa xaa naz Timnat. Gorna mzhin xaa paro nzeb yag ub naz Timnat, zee mroo tub mbezh yeen, ma mbazhe lo xaa. 6 Nu lee Mbi Naban cheen Xaa Tubka Nak mla tich Sansón, zee mle byog xaa mbezh kwaan yaa xaa modxa nle byog xaa tub mit, nixa nik tub kwaan nanzhot yaa xaa. Nixa namzaat xaa kwent kwaan mle xaa lo xuz xaa nixa lo xnaa xaa. 7 Zee ngwa xaa ngunii xaa lo ngwnaa, me nyula xaa.
8 Mded lak mbizh, nu gorna mbare xaa ka xaa ngwnaa, zee mzen xaa naz yasewii xaa paro naxto mbezh ngut; zee mlu kwerp cheen mbezh ngut lo xaa. Nke tub monton mbaz choya nu tub kuchrob, ma nzho mzhin. 9 Mzen xaa cheep mzhin kwaan yaa xaa nu nzha yo xaa ma gorna nzha xaa naz. Gorna mzhaal xaa xuz xaa nu xnaa xaa nu mzaa xaa cheep mzhin ngu xaa, per nanzhét xaa lee mzhin mloo xaa cho mbezh ngut.
10 Zee lee xuz xaa ngwa wdizhno ngwnaa nu baa lee Sansón mle tub yalni, modxa nak kostumbr cheen re xaa mad, xaa nchelya. 11 Nu gorna ngune re xaa Filistia lo Sansón mrezh xaa tub galbchii xaa zo kwaan lee xaa mod xmig xaa.
12 Zee lee Sansón nzhé lo re xaa:
—Na za tub kwent nabix lo gu; cheleeya leen gazh mbizh cheen yalni ne né gu cho kwaan naka, na za galbchii bestid kwaan nak ler non doo lo gu nu tub galbchii bestid cheen yalni. 13 Per chelee gu nanét gu lo na cho kwaan naka, zee zaa gu lo na tub galbchii bestid kwaan nak ler non doo nu tub galbchii bestid cheen yalni.
Zee lee re xaa mkeb:
—Né kwent nabix lo nu.
14 Zee lee Sansón nzhé lo re xaa:
—Lee cho ma nzhaw ma, mroo kwaan nzhaw xaa,
nu lee cho ma ngezh doo mroo kwaan nax.
Mded chon mbizh namlet re xaa gan ne xaa cho kwaan nak kwent nabix ne. 15 Lee mbizh dap nzhé re xaa lo xngwnaa Sansón:
—Guzh lo sa lu zee né xaa cho kwaan nak kwent nabix ne, zee nazekt nu lu nu re xaa li lu. ¿Nap nel mrezh gu nu zee lewann gu nu?
16 Zee lee xngwnaa Sansón mbinn nu nzhé me lo xaa:
—Nayii lu ne lu na, nankelat lu na zee nanet lu né lu cho kwaan nak kwent nabix ne kwaan nzhé lu lo re xaa sawlazh na.
Zee lee Sansón mkeb:
—Nixa lo xuz na nixa lo xnaa na zer yé naya, ¿leel lo lu ni naya?
17 Per lee ngwnaa tubka mbinn lo xaa dubse tub gazh mbizh kwaan mle xaa yalni, nel tubka nle me jwers lo xaa, zee nzhé xaaya lo me; nu gorzee nzhé me lo re xaa yezh. 18 Lee mbizh gazh cheen yalni, gorna zeraka zhel yizhyo, lee re xaa yezh nzhé lo xaa:
—¿Cho kwaan nax masra ke lo mzhin?
¿Nu cho kwaan ngezhra mas ke lo mbezh?
Lee Sansón mkeb:
—Chol nanket gu gon kwaan xkoon na,
nyent mod ne gu kwent nabix ne.
19 Zee lee Mbi Naban mla tich Sansón; zee ngwa xaa naz Ascalón nu mbit xaa tub galbchii xaa nu mkiib xaa re kwaan nkano re xaa nu mzaa xaa bestid cheen re xaa nzhé cho kwaan nak kwent nabix ne. Nu kwaan xyan mbare xaa garli xuz xaa. 20 Lo tub xaa ngok mod xmig Sansón lo yalnchelya, mlake xngwnaa Sansón.