Sansón mdil kwaan re xaa Filistia
15
Mded lak mbee nu mer ngol mbizh toop xaa yalgon cheen nzhobxtil, zee nzhano Sansón tub mit zaa xaa lo xngwnaa xaa. Nu gorna mzhin xaa nu nzhé:—Lee na nzhaal nze sewii lo xngwnaa na leen yo pa nax me.
Per lee xuz me namlaat mreep xaa,
2 sinka nzhé xaa lo xaa:
—Lee na mle xgab nanzheklat lu me, zee mzaa na me mka xmig lu. Per nzoka bal me, me yenn, ¿che nanzakt lu chulra nzhak me lo me? Ka me yeen kwent cheen me gox.
3 Zee lee Sansón nzhé:
—Nalsi naleet tich na kwib re kwaan nawent kwaan le na lo re xaa Filistia. 4 Zee ngwa zen xaa chongayoo mbaz nu mkadoo xaa xkol chopga ma nu mkadoo xaa yerbal xkol ma. 5 Nu zeera mkanki xaa yerbal nu msela xaa rese mbaz leen yalgon cheen re xaa Filistia, zee nguk re nzhobxtil nu re yag ub nu re yag olib cheen re xaa. 6 Zee nzhé re xaa Filistia:
—¿Cho mle kwaane?
Zee nzhé re xaa:
—Sansón, xuzh xaa nzho Timna, nel mkiib xaa ngwnaa kwaan nak diizh ka xaa nu mzaa xaa me mka tub xmig xaa.
Zee ngunayii re xaa Filistia, zee ngwa zek xaa me nu xuz me.
7 Zee nzhé Sansón:
—Nel sbaa mle gu zee tira nalaat na ted na gu bid.
8 Nu nakap doo mle xaa lo re xaa. Zee nya xaa ngu xaa naz leen yeer leen ke naz Etam.
Sansón mbit re xaa Filistia naz Lehi
9 Re xaa Filistia nguxoob msaaw naz Judá nu mrech re xaa axta naz Lehi. 10 Zee ngunabdizh re xaa Judá nu nzhé xaa:
—¿Chozhiin nze gu dil gu kwaan re nu?
Zee lee re xaa mkeb nu nzhé xaa:
—Lee nu nze wee Sansón yo lozhyib, nel leeka kwaan mle xaa lo nu le nu lo xaa. 11 Nu gorna mbin re xaa kwaane, gorzee mroo chon mil xaa Judá leen yeer cheen ke Etam nu nzhé xaa lo Sansón:
—¿Che nanet lu xaa Filistia nabeyy lo re be? ¿Chozhiin kale lu kwaan ne?
Zee lee xaa mkeb nu nzhé xaa:
—Na kale kwaan mle xaa lo na.
12 Zee lee re xaa Judá mkeb nu nzhé:
—Nu nze kadoo ni lu zaa nu lu lo re xaa Filistia.
Zee lee Sansón mkeb nu nzhé:
—Bcheroo gu zee ne na naguta gu na.
13 Zee nzhé re xaa:
—Wena, naguta nu lu nebse kadoo nu lu nu zaa nu lu lo re xaa Filistia.
Zee mkadoo xaa xaa kwaan chop lee doo kub nu mloo xaa xaa leen yeer ke.
14 Nu gorna mzhin Sansón Lehi, zee lee re xaa Filistia mbazhe mroo xonn mzhaal kwaan xaa nu lee Mbi Naban cheen Xaa Tubka Nak mla lo xaa. Nu gorzee lee doo kwaan nkadoo yaa xaa ngok mod kwaan nguk kwaan ki nu mrenzeba yaa xaa. 15 Nu gorzee myun tub lee zhit roo ngwes kwaan nye lo xaa, nu mzen xaaya nu mbit xaa tub mil xaa. 16 Zee nzhé Sansón:
Kwaan zhit roo tub ngwes,
mle na xaa tub monton chop monton;
kwaan zhit roo ngwes
mbit na tub mil xaa.
17 Nu gorna ngulo nzhé xaa kwaane, nu mlabi xaa zhit roo ngwes nu mlole xaa zee Ramat-lehia.
18 Nu ngok nzhek doo lextoo xaa zee ngunii xaa lo Xaa Tubka Nak:
—Lu mle lo na, xaa nak mos cheen lu, zee mle na gan lo re xaa ne, ¿napa né lu laa lu yet na lo yizhnzhek zee yiga na lo re xaa nakap ne? 19 Zee lee Dios mxal yeer naz Lehi zee mroo nisa. Zee ngu Sansón nis, zee ngu jwers xaa nu ngu balor lextoo xaa. Kwaanzee paro mroo nis naz Lehi mlole xaa En-hacore.
20 Zee ngunabeyy Sansón Israel tub gal liin leezha ngunabeyy re xaa Filistia re yezh zee.