Sansón ngwa naz Gaza
16
Ngwa Sansón naz Gaza nu naz ba ngune xaa lo tub ngwnaa, me nto cho nu ngotno xaa me rol yaal. 2 Gorna mbin re xaa yezh Gaza lee Sansón mzhin zee mri re xaa roo pwert cheen yezh dub yaal nu namkeet re xaa rezh mle xaa xgab yani yizhyo gut xaa xaa. 3 Per lee Sansón ngoot rol yaal nu nguxche xaa nu mkiib xaa pwert cheen yezh nu rop yiso nu kwaan nyaaw rooya nu mbe xaaya kwaan yenn xaa nu nguxoob xaa axta yek yi kwaan nzhi delant yezh Hebrón.Sansón nu Dalila
4 Gwluzh Sansón myula tub ngwnaa me le Dalila, me ngu yizhyo lach cheen Sorec. 5 Zee lee re xaa nabeyy lo re xaa Filistia ngwa lo me nu nzhé re xaa:
—Bkade Sansón zee ne be chozhiin tant ngezh xaa nu xomod le be gan lo xaa. Sbaa zee nzho mod kado be xaa nu nabeyy be lo xaa, nu kad tub nu zaa tub mil gayoo demi plat.
6 Zee lee Dalila nzhé lo Sansón:
—Naab na lo lu zee né lu lo na ¿chozhiin tant ngezh doo lu nu xomod kado xaa lu zee naxekt lu?
7 Zee lee Sansón mkeb:
—Chelee xaa kado xaa na kwaan tub gazh le doo kwaan nzob xaa lo wez kwaan naye na, kwaan zer bizh, zee yiib jwers cheen na nu gak mod tub xaa sbaasa.
8 Lee xaa nabeyy lo re xaa Filistia nguxii tub gazh lee doo mod kwaan nke lo wez kwaan zer bizh zee lee me mkado xaa. 9 Nel mkaxlaanla me lak xaa naz leen yoo, zee lee Dalila mrazhe:
—¡Sansón lee re xaa Filistia nze gut lu!
Gorzee mzaa xaa jwers mchoog xaa re doo mod tub lee doo kwaan myeex lo ki zee namlet re xaa Filistia gan nge xaa pa nguxii xaa jwers.
10 Zee lee Dalila nzhé lo Sansón:
—Mkade lu na, né lu duzna kwaan nawlit lo na. Lee nal né lo na xomod kado xaa lu.
11 Lee xaa mkeb:
—Chelee xaa kado xaa na kwaan doo kwaan zer lexchinn xaa, zee yiib jwers cheen na nu gak na mod tub xaa sbaasa.
12 Zee lee Dalila mzen doo kub nu mkado me xaa nu mrazhe me:
—¡Sansón lee re xaa Filistia nze gut lu!
Per gorzee mchoog xaa doo kwaan yaa xaa mod tub lee doo les.
13 Zee lee Dalila nzhé lo Sansón:
—Axta nal kaxizhno lu na nu seetaka kakade lu na. Né xomod kado xaa lu.
Lee xaa mkeb:
—Kwaan le lu nak za lu gazh las yich yek na lo tub ler kwaan ndexkwaa lu telar, nu nye zob lu staka zeesi lee jwers cheen na yiib.
14 Nu nye doo mzob me stak nu mrazhe me:
—¡Sansón lee re xaa Filistia nze gut lu!
Gorna mroo mkaal lo xaa mkiib xaa stak nu ler cheena.
15 Zee nzhé me lo xaa:
—¿Xomod né lu lo na: "Nkela na lu", nu tubka kakade lu na? Nzhala tub chon welt kale luya lo na, nu zeraka né lu pa nguxii lu jwers. 16 Nel yizata mbizh kanabdizh me lo xaa zee nguchela xaa nu nzhekla xaa yet xaa. 17 Zeetaka nzhé xaaya lo me:
—Nel nik tub xaa zer chuub yich yek na axta leezha nzhoka na lextoo xnaa na, nzhul nak na lo Dios.a Chelee xaa chuub xaa yich yek na zee yiib jwers kwaan nkano na zee gak na mod tub xaa sbaasa.
18 Gorna lee xaa nzhé rese lo me, zee mrezh me re xaa nabeyy lo re xaa Filistia, nu nzhé me:
—Te gu nee nel né xaa reseya lo na nal.
Zee ngwa re xaa nabeyy lo me nu mbe xaa demi. 19 Zee mzhib me yek Sansón yek xub me zee mzen mkaal lo xaa nu mrezh me tub xaa mchoog gazh las yich yek xaa kwaan nliib. Zee ngok nales xaa nu myiib jwers kwaan nkano xaa.
20 Nu mrazhe me stub welt:
—¡Sansón lee re xaa Filistia nze gut lu!
Gorzee mroo mkaal lo xaa nu mle xaa xgab:
—Welt ne leeka na gan mod re welt yilo.
Per nanet xaa che ngulola mlaa Xaa Tubka Nak xaa. 21 Zee lee re xaa Filistia mzen xaa nu mloo xaa zaalo xaa nu mbe xaa xaa naz Gaza nu mkado xaa xaa kwaan kaden zee ke xaa zhiin lo molin leen lozhyib. 22 Per ngulo mchub re xaa yich yek xaa zee mzelo mxen stuba.
Yalgut cheen Sansón
23 Zee lee re xaa nabeyy lo re xaa Filistia mkasa zee teed xaa ma lo maj Dagón, kwaan nak xtios xaa, nu le xaa yalni nu nzhé re xaa:
— Lee xtios be mzaa Sansón lo be, xaa nayii ne be.
24 Gorne lee re xaa yezh nguneya rese xaa mbill lo xtios xaa, nu nzhé re xaa:
—Lee xtios be mzaa xaa nayii ne be lo be,
xaa nluux re xcheen be nu xaa mbit zyen doo xaa be.
25 Lee gorna nix doo nzhi re xaa zee nzhé xaa:
—Bloo gu Sansón lozhyib nu teno gu xaa zee gak nix lextoo re be wii be lo xaa.
Zee nguxii xaa Sansón lozhyib nu mxizhno xaa xaa lee gorna mzo xaa xaa cho yiso. 26 Zee lee Sansón nzhé lo xaa mad, xaa nzhano xaa:
—Bzo na paro nzho mod zo kag na cho yiso kwaan nzo cho yidoo zee gal na choya. 27 Lee gorzee rese xaabyi nu ngwnaa nyazhe leen yidoo nu rese xaa nabeyy lo re xaa Filistia nzhi baa. Lee pis kwaan nzob naz yek nzhi kan tub chon mil xaabyi nu ngwnaa, xaa kalaach lo bid kwaan kaded Sansón. 28 Zee lee Sansón ngunii lo Xaa Tubka Nak, nu nzhé xaa:
— Xaa Tubka Nak, Xaa Nabeyy, bselazh na nu zaa jwers lo na nebse welt ne Dios zee kix na leeka rese kwaan mle re xaa Filistia lo na nel mloo xaa rop zaalo lo na.
29 Zeera mkwaan xaa yiso kwaan nzo xsaw yidoo kwaan rop yaa xaa zee mzen tuba kwaan lad li nu stuba kwaan lad beg. 30 Nu mrazhe xaa:
—¡Tuka yet na kwaan re xaa Filistia!
Zee mzobya xaa ropse kwaan dub jwers cheen xaa zee lee yidoo mbaxche nu mla yidoo yek re xaa nabeyy nu yek rese xaa yezh xaa nzho leena. Lee re xaa ngut gorna ngut xaa, zyenra xaa ngut baa lo re xaa mbit xaa rese mbizh kwaan mban xaa lo yizhyo ne.
31 Zee ngwa re wech Sansón nu re sawlizh xaa zee mbe xaa xaa nu mkaach xaa xaa pa nzhaal Zora nu Estaol paro mgaach xuz xaa Manoa. Nu ngunabeyy xaa yezh Israel tub gal liin.