Re dios cheen ngwleyy Micaía
—Tub mil kwaan tub gayoo demi plat kwaan mlewann xaa lu, nu mxobde lu xaa mlewann lu, lee na mlewann demi plat cheen lu.
Zee nzhé xnaa xaa lo xaa.
—¡Xaa Tubka Nak le wen lo lu xgaan!
3 Nu gorna mzere xaa demi lo xnaa xaa zee lee me mzen tub mil kwaan tub gayoo demi plat lo xaa zee nzhé me:
—Nebse kwaan le na nak, za na demi plat ne lo Me Tubka Nak zee le nambey meya; zee kwaan demi plat ne, kwaan mzere xgann na, dexkwaa chop dios yiib, tuba kwaan marti nu stuba kwaan plat myal. Snee lee nal zere naya lo lu.
4 Nu gorna mzere xaaya lo xnaa xaa, zee lee me mzen chopgayoo demi plat nu mzaa meya lo xaa ndexkwaa dios plat. Lee xaa mdexkwaa chop dios, tuba kwaan marti nu stuba kwaan plat mye. Nu rop dios ne mzob Micaía leen li xaa.
5 Zee mkano Micaía tub pa mbill xaa lo dios nu noka mdexkwaa xaa xab ngwleyy kwaan re dios kwaan nkano xaa nu mle nzhul xaa tub xgaan zee gak xaa ngwleyy. 6 Nu re mbizh zee nyent rey Israel zee rese xaa nle loka kwaan nzhekla xaa.
7 Ngu tub xaa lo dii cheen Leví, xaa ngu Belén cheen yizhyo Judá. 8 Xaa ne mroo yezh Belén cheen yizhyo Judá nu nzha kwaan xaa pa yo xaa; nu gorna nzha kwaan xaa pa yo xaa zee mzhin xaa garli Micaía naz leen re yi cheen Efraín.
9 Zee Micaía ngunabdizh lo xaa nu nzhé xaa:
—¿Pa naz nze lu?
Zee lee xaa lo dii cheen Leví mkeb nu nzhé:
—Na nak xaa Belén cheen yizhyo Judá nu nze kwaan na pa yo na.
10 Zee nzhé Micaía lo xaa:
—Blaz garli na zee gak lu xuz na nu xngwleyy na; zee kix na chii demi plat ka lu kad liin nu za na kwaan gaw lu nu kwaan gak lu.
Zee mlake xaa Leví garli xaa
11 nu nyakla xaa, nu ngok xaa mod tub xgann Micaía. 12 Zee Micaía mle nzhul xaa Leví; zee ngok xaa ngwleyy nu sbaa tira ngu xaa garli Micaía. 13 Zee mle Micaía xgab nu nzhé lo leeka lee xaa:
—Nalsi ne na lee Xaa Tubka Nak zaa kwaan nkin na lo na, nel nkano na tub xaa Leví nak ngwleyy garli na.