Micaía nu dii cheen Dan
18
Lee re liin zee nyent rey yezh Israel. Lee dii cheen Dan nkwaan yizhyo pa yo xaa nu yizhyo kwaan gak xcheen xaa, nel zer kano xaa xkizhyo xaa lo dii cheen re xaa Israel. 2 Kwaanzee lee dii cheen Dan mxaal xaa gaay xaabyi yasewii tub yizhyo. Mroo xaa Zora nu Estaol lo dii cheen xaa. Zee nzhé re xaa lo xaa:—Gwasewii gu lo yizhyo.
Re xaa ne kaded naz re yi cheen Efraín nu mzhin xaa garli Micaía baa mlaz re xaa dubse yaal. 3 Gorna nzhi re xaa gax garli Micaía, mlabeyy xaa mod nzhedizh tub xaa Leví, tub mad xaa, zee ngunabdizh re xaa lo xaa:
—¿Cho nzeno lu nee? ¿ Cho kwaan kale lu nee? ¿Cho kwaan nkwaan lu nee?
4 Zee mkeb xaa lo re xaa:
—Myaan na tub trat kwaan Micaía zee gak na xngwleyy xaa.
5 Zee lee re xaa nzhé lo xaa:
—Nii lo Dios nal, zee ne nu che wen ya nu welt ne.
6 Zee lee ngwleyy nzhé lo re xaa:
—Wen ya gu nel lee Xaa Tubka Nak kanap gu naz.
7 Zee mroo gaay xaabyi zee nu mzhin xaa Lais. Zee ngune xaa wen nzho re xaa yezh ba nu nanlet re xaa xgab nu nkano xaa rese kwaan modxa nzho re xaa Sidón nu nik tub kwaan namlet xaa xgab. Nu zit nzhi yezh cheen xaa lo re xaa Sidón nu nixa nayennt xaa kwaan nik stub naz baa.
8 Gorna lee xaabyi zee mbare ngwa Zora nu Estaol zee ngunabdizh re wechxinn xaa lo xaa:
—¿Xomod ngwa gu?
Lee re xaa mkeb:
9 —Chaa gu, ya be dil be kwaan re xaa nel lee yizhyo kwaan ngwasewii nu lo naka yizhyo wen doo. ¡Ya zen beya! Nachaabt gu, chaa gu ya be zee zen be yizhyo ba zee gaka xcheen be. 10 Gorna zhin be naz baa zee wii gu leeya nak tub yezh pa nzho re xaa wen, Dios zaa yizhyo lo be; nel naka tub yizhyo pa nzho rese kwaan.
11 Zee mroo tub xoop gayoo xaa nak dii cheen Dan naz Zora nu Estaol kwaan xkiib xaa nu nzha xaa lo dil. 12 Nu mzhin xaa naz yizhyo Judá nu mlaz xaa baa naz ta nyaaz mbizh Quiriat-jearim, kwaanzee axta mbizh nalzhe leya pa mbaz re xaa cheen Dan. 13 Naz ba mroo re xaa ngwa xaa re yi cheen Efraín nu mzhin xaa axta garli Micaía.
14 Zee lee gaay xaabyi xaa ngwasewii lo yizhyo Lais nzhé xaa lo re wechxinn xaa:
—¡Wii gu leen yoo ba nzho tub kwaan nzhak kwenta xab ngwleyy, nu re ngwneb, nu tub dios kwaan mdexkwaa xaa kwaan marti nu stuba nak mdexkwaa kwaan plat mye! Wii gu, nen cho kwaan le gu. 15 Gorna mzhin xaa baa nu mzeeb xaa leen li Micaía pa nzho xaa Leví nu ngunabdizh lo xaa xomod nzho xaa. 16 Lee xoop gayoo xaa lo dii cheen Dan, mzen re xaa xkiib xaa kwaan nya xaa lo dil nu nzhi re xaa naz roo pwert nkanap xaa. 17 Lee gaay xaabyi, xaa ngwasewii lo yizhyo, mzeeb xaa leen yoo nu mbe xaa maj kwaan ndexkwaa kwaan marti nu kwaan nzhak kwenta mandil, nu re ngwneb, nu maj kwaan ndexkwaa kwaan plat myal; lee ngwleyy nzoka kwaan xoop gayoo xaa nya lo dil naz roo pwert. 18 Zee mzeeb re xaa leen li Micaía nu mbe xaa maj kwaan ndexkwaa xaa kwaan marti nu kwaan nzhak kwenta mandil, nu re ngwneb, nu maj kwaan ndexkwaa kwaan plat mye. Zee lee ngwleyy nzhé lo re xaa:
—¿Cho kwaan kale gu?
19 Lee re xaa mkeb:
—Saaw roo lu, te lo nu, zee gak lu xngwleyy nu. ¿Che wen gak lu ngwleyy garli tuka xaa ke gak lu ngwleyy lo tub dii nu lo rese xaa Israel.
20 Zee lee ngwleyy nix doo ngok lextoo nu mzen xaa ler kwaan nzhak kwenta mandil, nu re ngwneb nu maj kwaan nak yiib, nu nya xaa kwaan re xaa. 21 Zee mroo re xaa nya xaa kwaan re xaa Dan, tubka kwaan xaa win xaa nu re ngoon nu rese kwaan nzhap xaa. 22 Gorna nzha roo zitla re xaa garli Micaía, zee lee re xaa nzho gax garli Micaía mkasa nu mreke re xaa tich dii cheen Dan. 23 Gorna mbazhe re xaa Micaía nzeke tich re xaa Dan nu ngunabdizh re xaa lo Micaía:
—¿Cho kwaan nzak lu zee nzeno lu re xaa lu? ¿Che nzhekla gu dil be?
24 Lee xaa mkeb:
—Gu mbe re maj kwaan mdexkwaa na nu mbe gu xngwleyy na. Nu nya gu, nu nik stub kwaan namlaket lo na. ¿Chozhiin nabdizh gu lo na cho kwaan nzak na?
25 Zee lee dii cheen Dan mkeb:
—Nagakt gaya lu lo nu, nap lee tub re xaa na kayut lu, nu noka re xaa li lu kayet.
26 Zee lee dii cheen Dan mzen naz nya, nu lee Micaía mwii zyen doo re xaa zee mbare xaa garli xaa stuba. 27 Nu lee re xaa Dan mbe re kwaan mdexkwaa Micaía nu ngwleyy zee mzhin xaa Lais, tub yezh wen nzho, pa re xaa nanlet xgab. Mbit xaa re xaa nzho zee kwaan spad nu mzek xaa yezh. 28 Nyent cho ngle yud re xaa nel zit nzhiya lo yezh Sidón nel nayennt xaa re xaa zee. Lee yezh Lais nzhi lo lach gax Bet-rehob. Zeera mdexkwaa re xaa yezh stuba nu ngu xaaya. 29 Nu mlole xaa yezh ba Dan, modxa le xgaan xaa, xaa nak Dan, xgann Israel, nixa yilo leya Lais. 30 Baa mzelo dii cheen Dan mbil lo maj kwaan mdexkwaa xaa. Nu lee Jonatán, xaa dii cheen Gersón xos Ches nu re xgann xaa ngok ngwleyy lo dii cheen Dan axta mbizh kwaan mbe re xaa stub yizhyo. 31 Lee dubse liin kwaan mzob li Dios naz Silo, mbill re xaa lo maj kwaan mdexkwaa Micaía.