Tub xaa Leví nu xngwnaa xaa
19
Lee re mbizh zee nyent rey Israel, zee ngu tub xaa lo dii cheen Leví, xaa nzho naz re yi cheen Efraín zit lo yezh ndok. Mkano xaa tub ngwnaa, me Belén cheen yizhyo Judá. 2 per lee me nanalit ngok lo xaa, zee mlaa me xaa zee nya me garli xuz me naz Belén yizhyo Judá. 3 Zee mreke xaa tich me nu chul doo nzhekla xaa nii xaa lo me zee bare me kwaan lee xaa. Nzheno xaa tub xaa nke zhiin lo xaa nu nzheno xaa chop ngwes. Nu gorna nzha xaa mwii me lo xaa nu mreep mted me xaa garli xuz me. Nu lee xuz me chul mkayaa xaa Leví. 4 Nu gorna ngune xuz me lo xaa, nyakdoola xaa mkayaa xaa xaa. Zee nzhé xaa lo xuzh xaa lake lo xaa nu zee mlake xaa lo xaa chon mbizh zee ndaw xaa nu ngu xaa nu leeka zee ngoot xaa.5 Lee mbizh dap nguxche re xaa garziil doo, nu lee xaa Leví mdexkwaa xcheen xaa zee nya xaa, per lee xuz ngwnaa nzhé lo xaa:
—Daw cha yat zee yo jwers lu nya lu.
6 Zee mzob rop xaa ngu xaa nu ndaw xaa. Zee nzhé xuz ngwnaa lo xaabyi zee:
—Naab na lo lu zee kwazaka lu kwaan nu nalyall nu telise gak nix doo lextoo lu kwaz lu.
7 Nu gorna nguzo xaa nya xaa, zee xuzyee xaa nzhé lo xaa kwaz xaa stub yaal.
8 Lee mbizh gaay, garziil doo nguxche xaa zee nya xaa per xuz ngwnaa nzhé lo xaa:
—Bye lextoo lu blaz axta yilo zhel yizhyo nu gaw lu tub kwaan.
Zee mlazh xaa ndaw xaa.
9 Zee nguxso nya xaa kwaan xngwnaa xaa nu kwaan xaa nke zhiin lo xaa. Zee nzhé xuz ngwnaa lo xaa mad:
—Ngulo mzhel yizhyo, blazaka gu nee nalyall. Ngulo mded mbizh gotaka gu nee zee gak nix lextoo gu. Yee garziil doo nzho mod nya gu garli gu.
10 Per lee xaa mad nanzheklatra kwaz xaa stub yaal, zee nya xaa. Nu nzha xaa naz Jebús (kwaan nak Jerusalén) kwaan rop ngwes nu kwaan xngwnaa xaa.
11 Nu gorna nzo xaa gax Jebús, ngulola mzhel doo yizhyo zee nzhé xmos xaa lo xaa:
—Ya be naz yezh cheen re xaa Jebús, zee kwaz be yaal.
12 Zee lee xaa Leví, xaa nabeyy lo xaa mkeb lo xaa nzhé:
—Nayat be nik tub re yezh cheen re xaa zit, xaa nanakt xaa Israel, sinka nzha be axta zhin be Gabaa. 13 —Nu noka nzhé xaa: —Nzha be zee kwaz be Gabaa o Ramá.
14 Zee nzhaka xaa, lee mbizh ngwaazla lee xaa mzhin Gabaa, yezh cheen xaa lo dii cheen Benjamín. 15 Zee mroo xaa naz zee ngwa xaa Gabaa zee kwaz xaa yaal. Mlaz xaa lo xbi, nel nyent cho xaa mzaa pa kwaz xaa.
16 Zee nyaad tub xaa gol ngwa wen mzhel yizhyo, xaa ngu leen re yi cheen Efraín per mbizh zee nzho xaa naz Gabaa. Ngok Gabaa yezh re xaa lo dii cheen Benjamín. 17 Nu gorna mlep xaa gol ne yek xaa zee mwii xaa lo xbi lee xaa zit nzob baa, nu nzhé xaa lo xaa
—¿Pa naz ya gu? ¿Pa naz nze gu?
18 Zee lee xaa mkeb nu nzhé xaa:
—Lee nu nze naz Belén yizhyo cheen Judá nu nya nu naz leen re yi cheen Efraín nel xaa naz zee nak na. Ngwa na naz Belén cheen yizhyo Judá, per lee nal nya na naz garli Xaa Tubka Nak. Nal nyent cho xaa nee zaa pa kwaz nu yaal. 19 Nkano na paj nu nkano na yix kwaan gaw ngwes na; nu nkano na yat nu xis ub kwaan go yon xngwnaa na, xmos na nu na. Nik tub kwaan nanzhojwalt lo na.
20 Zee lee xaa gol nzhé:
—Wen kwaz lu garli na. Rese kwaan nkin lu nkano na, nanzhaalt kwaz lu lo xbi.
21 Zee mbe xaa xaa garli xaa nu mzaa xaa kwaan ndaw xngwes xaa. Nu gorna ngulo mzet re xaa nii xaa zee ndaw xaa nu ngu xaa kwaan lee xaa.
22 Nu nix doo nzhi re xaa, per zee lee re xaa nakap yezh mchaal dub welt yoo nu mzaa golp xaa garli xaa nu nzhé xaa lo xaa gol, xaa nak cheen yoo:
—Bloo xaa mreep garli lu nel nzhekla nu kano nu xaa.
23 Zee mroo xaa nak li yoo nu nzhé:
—Xmig na, naab na lo gu nalet gu kwaan nawent, nel xaa ne nak xaa mzaa na pa kwaz; nalet gu kwaan nawent lo xaa. 24 Nkano na tub xchaap na me zer chaal xaabyi nu ngwnaa kwaan nzeke tich xaa ne; nzho mod koo na me zee le gu kwaan nzhekla gu lo me; per lee xaa ne nalet gu kwaan nawent lo xaa.
25 Per nambint re xaaya. Zee lee xaa Leví mloo xngwnaa xaa nax jwer, zee mkano re xaa me dub yaal axta ngunii yizhyo zee msela xaa me. 26 Nu gorna merla nzelen mbizh mbare me garli xaa gol, xaa mzaa pa kwaz me, per gorna mzhin me roo li xaa mla me lo yo nu baa ngoot me axta mxal xaa roo yo. 27 Nu gorna ngulo nguni wen yizhyo zee mxal xaa Leví roo yoo, listla roo xaa nzha xaa naz stuba, zee nguné xaa lee xngwnaa xaa naxtoo nzhibse ya roo yoo. 28 Zee nzhé xaa Leví:
—Guxso, chaa.
Per nik tub kwaan nakebt me. Zee mlep xaa me nu nzhiib xaa me tich ngwes, nu nya xaa garli xaa. 29 Nu gorna mzhin xaa garli xaa nu mzen xaa tub kuchi nu mchoog xaa xngwnaa xaa chiibchop le nu mxaal xaaya lo rese dii Israel. 30 Zee lee re xaa nguné kwaane nzhé:
—Nik tub welt zer ne be kwaane dubse leezha mroo re xey be, xaa Israel, yizhyo Egipto axta mbizh nalzhe. Ble gu xgab kwaane nu cho kwaan nzhaal le be kwaan kwaane.