Re xaa Israel mdil kwaan dii cheen Benjamín
20
Zee mtoop re xaa dub Israel axta yezh cheen Dan nu axta yezh cheen Beerseba nu noka yizhyo cheen Galaad. Mkasa re xaa naz Mizpa lo Xaa Tubka Nak. 2 Lee re xaa non lo dii cheen Israel mzo pa mkasa re xaa nu lee yezh cheen Dios nak tub tap gayoo mil xaa nzhano spad. 3 Zee ngune dii cheen Benjamín lee re xaa Israel mkasa naz Mizpa. Zee ngunabdizh re xaa Israel:—Né xomod ngok kwaan nawent ne.
4 Lee xaa Leví, xaa nak xmbyi ngwnaa ngut mkeb:
—Na mzhin naz yezh Gabaa lo dii cheen Benjamín kwaan xngwnaa na zee kwaz na dub yaal, 5 per leeka yaal zee lee re xaa yezh Gabaa msaaw dub welt cho yoo pa naxna na nu mle xaa xgab gut xaa nu nu per lee xngwnaa na ngotno xaa nu mbit xaa me. 6 Zee mbe na me nu mle byog na me nu mxaal na tikga baal byog lo kad tub dii cheen be, xaa Israel, pa nak xkizhyo xaa, nel re xaa ne mle kwaan nawent yezh cheen be. 7 Lee nal rese gu xaa Israel, gu né cho kwaan le be.
8 Rese xaa mzoli nu nzhé re xaa:
—Nik tub nu nabaret lo yoo ler cheen nu nu nixa garli nu. 9 Kwaan nzhaal le be nak koo be swert zee ne be cho dil kwaan re xaa Gabaa. 10 Kweey be chii xaa lo tub gayoo xaa lo dii cheen Israel nu tub gayoo xaa lo tub mil xaa nu tub mil xaa lo chii mil xaa, zee kwaan xaa kwaan gaw re soldad. Gorna lee re soldad zhiin Gabaa lee stub naz xaa ya dil kwaan re xaa Gabaa zee lux re kwaan nawent ne lo re be, xaa Israel.
11 Zee lee rese xaa Israel mkasa zee luux xaa yezh. 12 Nu lee re dii cheen Israel mxaal xaa xaa lo dii cheen Benjamín nu nzhé xaa:
—¿Chozhiin mle gu kwaan nawent ne? 13 Zaa gu rese xaa mle kwaan nawent, xaa nzho yezh Gabaa, lo nu zee gut nu xaa zee nayotra kwaan nawent lo re be, xaa Israel.
Per lee dii cheen Benjamín nambint kwaan nzhé re xaa Israel, 14 sinka mtoop dii cheen Benjamín rese xaa re yezh nu mkasa xaa naz Gabaa zee dil xaa kwaan re xaa Israel. 15 Zee mtoop xaa Benjamín tub galbxoop mil soldad, xaa nzhano spad nu namloot xaa kwent gazh gayoo xaa mleey xaa, xaa nzho yezh Gabaa. 16 Lo re xaa zee nzho tub gazh gayoo xaa lad beg, rese nke mandal kwaan nkee xaa yenn tub la yich ngin xaaya. 17 Lee re stub naz xaa Israel nak tap gayoo mil soldad xaa nkano spad, nu namloot xaa kwent re xaa Benjamín.
18 Zee ngwa re xaa Israel garli Dios nu ngunii xaa lo Dios nu nzhé xaa:
—¿Xana nu ya yilotlaka dil kwaan re xaa Benjamín?
Lee Xaa Tubka Nak mkeb:
—Dii cheen Judá ya yilotlaka.
19 Zee lee re xaa Israel nguxche garziil doo nu ngwa xaa mlaz xaa gax paro nyun yezh Gabaa. 20 Zee ngwa re xaa naz delant zee gut xaa re xaa Benjamín xaa nzho naz Gabaa. 21 Per lee dii cheen Benjamín mroo mdil kwaan re xaa Israel naz Gabaa nu mbit xaa tub galbchop mil xaa Israel. 22 Per lee re xaa Israel namzhebt xaa sinka mbare xaa ngwa xaa pa mdil xaa mbizh yilotlaka, 23 lee re xaa Israel ngwa nu mbinn xaa lo Xaa Tubka Nak axta mzhel yizhyo nu nzhé re xaa:
—¿Che zya nu dil nu kwaan dii cheen Benjamín, xaa nak wech nu?
Zee lee Xaa Tubka Nak mkeb:
—Gwa dil gu kwaan re xaa.
24 Zee ngwa re xaa Israel welt rop nu mdil xaa kwaan dii cheen Benjamín. 25 Per lee mbizh rop mroo dii cheen Benjamín naz Gabaa nu mdil kwaan re xaa nu mbit xaa stub chiinmchon mil soldad xaa Israel nu yizata xaa mkano spad xaa. 26 Zee ngwa rese xaa Israel nu rese xaa yezh cheen Dios nu mzob xaa mbinn xaa lo Xaa Tubka Nak nu mkwan re xaa dubse axta mzhel yizhyo nu mzek xaa gon kwaan nzek xaa lo mdo nu gon kwaan kwi wen xaa delant lo Xaa Tubka Nak. 27 Lee re xaa Israel ngunabdizh lo Xaa Tubka Nak (nel lee kaj cheen trat cheen Dios nzob baa mbizh zee. 28 Nu lee Finees xgann Eleazar xos Aarón nzo nle zhiin lo kaj re mbizh zee). Zee ngunabdizh xaa:
—¿Che zya nu ya dil nu kwaan dii cheen Benjamín, xaa nak wech nu, o che nayatra nu?
Lee Xaa Tubka Nak mkeb:
—Gwa gu nel yee za na re xaa lo gu.
29 Zee lee re xaa Israel mkaxlaan dub welt cho yezh Gabaa. 30 Lee mbizh yon ngwa re xaa Israel mdil kwaan dii cheen Benjamín naz Gabaa, mod rop welt yilo. 31 Zee mroo dii cheen Benjamín nu mlaa yezh cheen xaa, zee mzhaal xaa kwaan re xaa Israel nu mle xaa gan mbit xaa kan stub galbchii xaa Israel naz wen, naz kwaan nzha naz Betel nu naz Gabaa. 32 Lee dii cheen Benjamín nzhé:
—Kale be gan lo re xaa mod rop welt yilo.
Per lee re xaa Israel nzhé:
—Xoon be lo re xaa zee reke xaa tich be zit roo yezh.
33 Zee mxonn re xaa Israel naz Baal-tamar, pa nzhi xaa nu mdil re xaa. Noka re xaa Israel, xaa nzholaan, mroo xaa pa nzholaan xaa naz ta nyaaz mbizh yizhyo cheen Gabaa. 34 Ngwa tub chii mil soldad xaa Israel, xaa mleey xaa lo re xaa Israel, nu mzelo xaa mdil naz Gabaa; per lee dii cheen Benjamín nanet xaa cho kwaan kayak. 35 Lee Xaa Tubka Nak mle zee mle re xaa Israel gan lo dii cheen Benjamín nu mbit xaa tub galbgaay mil nzho tub gayoo xaa nu rese xaa nkano spad xaa. 36 Leeya mlu lo dii cheen Benjamín modxa kale re xaa gan lo re xaa Israel nel lee re xaa Israel mxonn lo dil cheen Benjamín mreke xaa tich zee gut xaa xaa. Lee re xaa Israel ne wen xaa nzholaan re xaa xaa dub welt yezh Gabaa. 37 Lee re xaa nzholaan roo yezh lijer doo mzeeb xaa leen yezh nu mbit xaa rese xaa kwaan spad. 38 Lee re xaa nzholaan zeeb leen yezh mzhaal xtizh xaa kwaan stub naz xaa Israel gorna lee zhen yixoob leen yezh, 39 zee lee xaa Israel mbare lo dil.
Lee dii cheen Benjamín mzelo mseweey re xaa nu mbit xaa kan galbchii xaa Israel nu nzhé re xaa:
—Kale be gan kayut be re xaa mod welt yilo.
40 Per gorna mzelo zhen nguxoob leen yezh lee dii cheen Benjamín mwii naz tras zee ngune xaa lee zhen nyixoob axta yiba. 41 Zee mbare re xaa Israel nu lee dii cheen Benjamín mzheb doo nel mwii xaa lo re kwaan kale re xaa Israel lo re xaa. 42 Zee mrexonn xaa lo re xaa Israel naz kwaan nzha yizhyo bizh per nyent mod ngle xaa gan, per lee re xaa Israel mroo yezh nu mchoog xaa naz zee mbit xaa re xaa.
43 Lee dii cheen Benjamín mlake xsaw lo re xaa Israel, xaa mreke xaa tich re xaa nu mbit xaa re xaa axta Menúha nu axta ta ngol mbizh naz Gabaa. 44 Nu mbit xaa kan chiinmchon mil soldad lo dii cheen Benjamín. 45 Lee stub naz xaa mbare nu mxonn naz yizhyo bizh naz kelag cheen Rimón; per lee re xaa Israel mbit gaay mil xaa naz ba; nu zeera mreke xaa tich stub naz axta Gidom nu mbit xaa xchop mil xaa. 46 Rese xaa nak dii cheen Benjamín xaa ngut mbizh zee nak galbgaay mil soldad, rese xaa nkano spad. 47 Per lee stub xoop gayoo xaa mle gan mxonn naz yizhyo bizh naz kelag cheen Rimón nu ngu xaa tap mbee naz kelag cheen Rimón. 48 Lee re xaa Israel mbare xaa mbit xaa stub naz xaa nak dii cheen Benjamín nu mbit xaa xaa kwaan spad nu rese xaa nzho kad tub yezh nu rese ma nzho yezh nu rese kwaan nyizhal xaa. Sbaaka mzek xaa rese yezh kwaan nguzhal lo xaa.