Ngwnaa kwaan ka re xaa lo dii cheen Benjamín
21
Re xaa Israel myaan naz Mizpa, zee nik tub xaa nazaat xchaap ka re xaa lo dii cheen Benjamín.2 Zeera ngwa xaa yezh garli Dios nu dubse yaal mlaz xaa garli Dios. Ngunii xaa lo xaa nu mbinn doo xaa. 3 Nu nzhé xaa:
—Xaa Tubka Nak, Dios cheen re be, xaa Israel. ¿Chozhiin ngok kwaane lo re nu xaa Israel, lee nal nzho jwalt tub dii lo re nu xaa Israel.
4 Lee stub mbizh lee re xaa yezh nguxche garziil doo; nu mdexkwaa xaa tub mdo paro zek ma zee kwaan kwii wen xaa. 5 Nu ngunabdizh xaa:
—¿Cho re xaa Israel nangwat paro mkasa re be lo Xaa Tubka Nak?
6 Nales doo nzhak lextoo re xaa Israel lo kwaan ngok lo dii cheen Benjamín, sawlizh xaa, nu nzhé xaa lo wechxinn xaa:
—Nalzhe mlux tub dii lo re xtii be, Israel. 7 ¿Xomod zaa be ngwnaa ka re xaa mlake? Ngulo mcheroo be lo Xaa Tubka Nak nazaat nu xchaap nu ka re xaa.
8 Zee ngwanabdizh xaa nu nzhé xaa:
—¿Xana xaa lo dii cheen be, xaa Israel, nangwat lo Xaa Tubka Nak naz Mizpa?
Zee mzeen xaa nik tub re xaa Jabes-galaad nambiidt paro mkasa re xaa, paro mlaz re xaa lo junt. 9 Nel mted xaa le re yezh zee ngune xaa nik tub re xaa Jabes-galaad nyent baa, 10 zee lee re xaa yezh mxaal chiibchop mil xaa nanzhebt nu mxaal xaa xaa nu nzhé xaa lo xaa:
—Gwayut gu re xaabyi nzho yezh Jabes-galaad, noka bit gu re ngwnaa nu re madwin. 11 Kwaane nak kwaan le gu: Gut gu rese xaabyi xaa mchelya ngwnaa nu rese ngwnaa me mchelya xaabyi.
12 Zee lo re xaa nzho Jabes-galaad nguzhal xaa tap gayoo ngwnaa mad, me zer chaal nik tub xaabyi; zee mbe xaa re me naz paro mbaz re xaa naz Silo, naz yizhyo Canaán. 13 Zee rese xaa ngwa nzhé lo re xaa dii cheen Benjamín, xaa nzho naz leen kelag Rimón, zee kwi wen xaa. 14 Zee mbare re xaa lo dii cheen Benjamín, zee mzaa xaa re ngwnaa mad, me Jabes-galaad, re me kwaan nambita xaa, lo xaa Benjamín, per namgat me mka re xaa. 15 Mles lextoo re xaa yezh ngune xaa dii Benjamín, nel Xaa Tubka Nak mluux tub dii cheen Israel. 16 Zee ngunabdizh re xaa gol lo re xaa yezh nu nzhé xaa:
—¿Xomod zaa be ngwnaa ka re xaa mlake, nel re ngwnaa me lo dii cheen Benjamín ngutla.
17 Zee nzhé re xaa:
—Nkin re xaa lo dii cheen Benjamín ngwnaa zee naluxt tub dii cheen re be, xaa Israel; 18 per lee re nu nyent mod zaa nu xchap nu ka re xaa, nel mcheroo re be, xaa Israel nu nzhé be: "Xobde Dios re xaa zaa xchaap ka re xaa lo dii cheen Benjamín". 19 Nu noka nzhé xaa: —Per nal wii gu, merla la yalni cheen Xaa Tubka Nak, kwaan nla yizata liin naz Silo. Gaka naz ta ya Bet-el nu naz ta nlen mbizh lo naz kwaan nzha naz Bet-el naz Siquem, kwaan noka naz ta yat Lebona.
20 Zee nzhé re xaa nabeyy Israel lo re xaa lo dii cheen Benjamín:
—Gwa kaxlaan gu leen re yag ub. 21 Nu list bzo gu, gorna lee re ngwnaa mad, me Silo, roo kani, gorzee roo gu leen yag ub nu zen gu tubga me ka, nu gwa gu yizhyo cheen re gu lo dii cheen Benjamín. 22 Nu chelee xuz me nu bzan me nze né tub kwaan lo nu, zee yé nu lo xaa gak xaa nadoo, nel lo dil namkat re xaa be ngwnaa zee zaa nu me lo gu, nel namgat me. Nu yé nu: "Nankanot gu kulp, nel namzaat gu me mka xaa".
23 Sbaa mle re xaa lo dii cheen Benjamín. Gorna lee re ngwnaa mkani, zee kad tub xaa mbe tub me nu nyano xaa me yizhyo cheen xaa nu baa ngu xaa.